СИНФДОШЛАР 60 ЙИЛДАН КЕЙИН ЯНА МАКТАБДА ДИЙДОРЛАШДИ

Ўқувчилик – инсон ҳаётининг энг ширин, ёрқин даври. Ўйинқароқ болалар учун устознинг ҳар бир сабоғи, синфдошлар даврасида кечган дамлар таассуротларининг адоғи бўлмайди. Йиллар ўтган сари уларнинг шуури ойдинлашиб, кўнгиллари илм зиёсидан нурафшон бўлади, бир синфда, ёнма-ён турган парталарда ўтириб устоз сабоғини олиш жараёнида мисли бир ота-она фарзандларидай, бир-бирига азиз бўлиб қолади, меҳр-оқибат, дўстлик ришталари билан мустаҳкам боғланади. Эҳтимол, шундандир, орадан неча йиллар ўтса-да, ҳаётимизда синфдош дўстларнинг ўрнини ҳеч ким боса олмайди, ҳеч ким уларчалик бўлолмайди. Эҳтимол, шундандир, собиқ синфдошлар ўзлари таълим олган масканларида учрашувларга интилаверади.

Жорий йилнинг 5 октябри Амударё туманининг Тошёп овулида фаолият юритаётган 5-сонли мактаб ўқитувчилари, ўқувчилари учун унутилмас кун бўлиб қолди. “Кексалар ҳафталиги” доирасида мактабни 60 йил муқаддам тамомлаган собиқ ўқувчилар мактабга таклиф қилинди. Ҳар бирига йиллар ўз ҳукмини ўтказган, оловқалб, улкан орзулар қанотида мактабдан 60 йил олдин учирма бўлган йигит-қизлар ҳозирги кунда сочларига қиров инган, улуғ ёшга етиб, элда ҳурмат-эҳтиборли нуронийларга айланишган.

Интиқиб кутилган учрашувга икки синф бўлиб ўқиган жами 41 нафар собиқ синфдошлардан 14 нафари келишди. Уларнинг айримлари дунёдан ўтган бўлсалар, айримлари касаллиги туфайли қатнаша олмадилар.

Собиқ синфдошларни мактаб директори Нурбек Йўлдошев, директор ўринбосари Умрбой Шукуруллаев, ўқитувчилар жамоаси, ўқувчилар гуллар билан кутиб олдилар.

Меҳмонлар байрамона безатилган муҳташам мактаб биноси олдида тайёрланган даврага жойлашганларидан сўнг ўқувчилар инсон қадрини, дўстлик-биродарликни, дийдорни улуғловчи шеърлар ижро этдилар. Ўқувчиларга собиқ синфдошлар таништирилди. Улар бунингдек ҳурмат-эҳтиром учун мактаб маъмуриятига, ўқувчиларга миннатдорчилик билдирдилар, ўзларининг ўқувчилик даври, ўша вақтлардаги оғир турмуш шароитига қарамай, устозларининг сидқидилдан таълим берганликлари натижасида ҳаётда ўз кўпгина ютуқларга эришганликлари хусусида гапириб бердилар, бугунгидай саодатли кунларга етиб келолмаган собиқ синфдошлари, фидойи устозларини эсга олдилар.

Шундан сўнг собиқ синфдошлар бугунги кунда мактабда ўқувчиларга талаблар даражасида таълим-тарбия бериш учун яратилган шароитлар билан танишдилар.

Мактаб фаоллар залида давом этган учрашувда собиқ синфдошлардан ўқитувчи бўлиб, давлат муассасаларида масъулиятли лавозимларда ишлаган, туман “Нуронийлар” жамоатчилик кенгаши раиси Бекман Алламберганов, 32-сонли мактабда ўқитувчи бўлиб ишлаган Жумабой Қалиев, 5-сонли мактабда ўқитувчи бўлиб ишлаган Кенгаш Қалиев, Норжон Йўлдошевалар йиғилганларга ўқувчилик даври хотираларидан гапириб бердилар ва ёшларни бугунги кундаги яратилган шароитлардан унумли фойдаланиб, билим асосларини чуқур эгаллашга даъват этдилар.

Ўзлари таълим олган жонажон мактаби бағрида ўқитувчилар, ўқувчилар билан ўтган мароқли учрашувдан сўнг собиқ синфдошлар Манғит шаҳрининг Олмазор маҳалласида жойлашган музейни томоша қилдилар. Улар учун туманимиз тарихи, аждодларимиз ҳаётида фойдаланилган турли асбоб-ускуналар, кийилган либослар, тақинчоқлар, бугунгидай фаровон ҳаётимиз учун курашган инсонлар ҳаёти билан танишиш ҳам жуда завқли бўлди. Кейин тўкин дастурхон атрофида ўтиришиб, гоҳ соз, гоҳ суҳбатдан кўнгиллари яйради.

Кексалар ҳафталиги доирасида ўтказилган 60 йилдан сўнгги собиқ синфдошлар учрашуви таассуротларга бой бўлди.

Ойгул РАЖАБОВА