ҚЎША ҚАРИГАНЛАР

Ҳар киши эл учун тортса агар ранж,

Оқибат муяссар бўлар унга ганж.

Мажидиддин Ҳавофий ҳазратлари таърифлаганларидай, эл учун машаққатлардан чўчимай меҳнат қилган, алал-оқибат юртдошлари меҳр-муҳаббатига, ҳурмат-эътиборига сазовор бўлган инсонлар кўп. Манғит шаҳрининг Чордара маҳалласида истиқомат қилувчи Башир ота Кенжаев, у кишининг умр ҳамдами Умида она Сариевалар ана шундайлар сирасидан.

Башир ота Кенжаев 1937 йилда туғилган. Мактабни тугатганидан сўнг Тошкент Тиббиёт институтини 1961 йилда қулоқ, томоқ, бурун касалликлари шифокори мутахассислиги бўйича битирган.

У меҳнат фаолиятини бошлаган даврларда туманда шифокорларгина эмас, ўрта тиббиёт ходимлари ҳам етишмас, кундузи бўлимда беморларни даволаб, икки кунлаб “Тез тиббий ёрдам” бўлимида навбатчилик қилишларига ҳам тўғри келарди. Сафдошлари Абдулла Мадаминов, Гаухман, Сара Исаевна, Жамол Ўтамуродовлар қатори Башир ота ҳам туман тиббиётининг моддий техника базаси ачинарли ҳолатда бўлишига қарамай, вақт билан ҳисоблашмай, беморлар дардига дармон бўлишга интилди. “Жуда толиққан вақтларимда Абдулла ака Мадаминовни эсга олардим, у киши Беруний туманидан келиб, шу эл одамларига хизмат қилиб юрибди-ку, мен чарчашим мумкинми, дея ўзимни ўзим тергаб, куч топиб, ишга отланаверардим” дея эслайди ўша вақтларини. Отахоннинг ўша йиллардан хотира бўлиб қолган бир воқеа ҳеч эсидан чиқмайди: ўша куни тез тиббий ёрдам бўлимида навбатчи эди. Кечаси Тўлқин овулининг қатнов йўлга узоқ жойлашган ҳудудига чақирувга биноан йўлга чиққанларида лой йўлдан юролмай, машинаси ботқоққа ботиб қолган. Машина ҳам эски бўлган-да. Аҳвол танг. Бироқ беморга ёрдам бериш керак. Шунда Башир Кенжаев бемор аёлни пиёда суриштириб йўлга чиққан ва топиб бориб, ўрта яшар аёлни орқасига опичиб, уч чақиримча масофадан машинагача кўтариб келган.

Чақирувдан чарчаб, совқотиб, ярим белигача лойга ботиб келган шифокорни Гаухман шифохона бўлимидаги бир бўш каравотга ўраб, ётқизиб қўйган.

Шу бўйича эрталаб ҳам ўзига келмаган Башир отани турмуш ўртоғи, шифохонада ҳамшира бўлиб ишловчи Умида Сариева излаб келган.

- Кўзимни очсам ёнимда янги кийимларим турибди, аёлим аҳволимни кўриб, уйга бориб кийим олиб келган экан, - дея хотирлайди отахон.

Башир ота, Умида оналарнинг қизғин меҳнат жараёнида кечган ҳар бир куни қаҳрамонлик, ибрат олишга арзигулик. Ҳаммаслак, ҳамкасблар оилада ҳам рўзғор юкини баравар елкалашди, бири-бирига суянч бўлишга интилишди, қийинчиликларни оқиллик билан, сабр билан енгиб ўтишди. Уларнинг аҳил оиласида вояга етган фарзандлар ҳам эл корига яраб, турли соҳаларда меҳнат қилишаяпти. Тўнғич ўғли Жумабой олий маълумотли электр алоқа ходими, Муротбой тез тиббий ёрдам бўлимида ҳайдовчи, Тамара ўқитувчи, Пўлат қурувчи, Клара ҳунарманд, Юсуф электр алоқа хизмати, Зулайҳо банк ходими.

Элга нафи тегаётганидан, беморларга шифо улашаётганидан кўнгиллари осмон бўлиб меҳнат қилган Башир ота, Умида оналар ана шундай қайноқ меҳнат жараёнидан ташқари етти нафар фарзандни вояга етказиб, ўқитиб, ҳаётда ўз ўринларини топиб, ўзларидан тингунларигача не бир заҳматлар чеккани фақат ўзларига, Яратганга аён. 40 йилдан зиёд вақт туманимиз аҳолиси соғлиғини сақлаш йўлида 2010 йилгача ишлаган отахон ва онахоннинг турмуш қурганларига 60 йилдан ошибди. 60 йилдирки, улар шу мўъжаз оиласини, фарзандларини кўзи қароқларида асрайди, қўни-қўшни, қариндошлариникига борса ҳам, ҳадемай ўз азиз гўшасига тезроқ қайтгиси келиб талпинади, шу ошиён улар учун энг оромбахш маскан, умри давомчиларининг камолидан, невара-чеваралари яйраб улғаяётганидан кўнгли тоғдай кўтарилади, ана шундай улуғ неъматлар билан сийлаган Зотга тўхтовсиз ҳамду санолар айтишади.

Бугунги кунда Башир ота, Умида оналар нафақат ўз оиласида, маҳалласида, элида эъзозли нуронийлардан.

Халқимиз тилида “Кексалар – юртимиз файзи”, “Қариси бор уйнинг париси бор” деган иборалар кўп ишлатилади. Чиндан-да, ёши улуғ инсонлар яшайдиган уйга ўзгача ҳавас билан қараймиз. Чунки нуроний отахон-онахонлар ёш авлодга меҳр-оқибат, юксак инсоний хислатлар, одоб-ахлоқдан сабоқ бериб, оилаларда, маҳаллаларда тинчлик-осойишталик муҳитини мустаҳкамлашга муносиб ҳисса қўшаётган мўътабар мураббийлардир.

Шу эл одамларига беминнат хизмат қилиб, юксак ҳурмат-эҳтиромга сазовор бўлган Башир ота, Умида оналарга “Меҳнатларингиз роҳатини кўриб, узоқ умр кўринг”, дея тиладик.

Ойгул РАЖАБОВА