БАЛИҚЧИЛИК – ДАРОМАДЛИ СОҲА

Балиқ гўшти инсон учун фойдали ва ўзгача таъмга эга бўлгани учун ундан тайёрланган таомлар хушхўр, севимли бўлади. Айниқса, жуда ширали ва мазали бўлган Амударёнинг балиқлари бошқа элларда ҳам машҳур.

Сўнгги йилларда мамлакатимизда даромадли соҳа сифатида балиқчиликни ривожлантириш, балиқ маҳсулотлари турларини кўпайтириш, экспорт салоҳиятини оширишга алоҳида эътибор қаратилмоқда. Амударё дарёси бўйида жойлашган туманимизда ҳам бу борадаги мавжуд имкониятлардан самарали фойдаланган ҳолда соҳани ривожлантириш, интенсив технологиялар асосида балиқ етиштириш ҳажмларини кўпайтириш ҳамда аҳолининг сифатли балиқ маҳсулотларига бўлган талабини қондириш бўйича қатор ишлар амалга оширилмоқда.

Уйшин маҳалласидаги Ҳамза Жумамуродов шу соҳага қизиқиши катта бўлгани сабабли 2015 йилда ўз маблағи ҳисобидан “Абдурасул Жайҳун” номли балиқчиликка ихтисослашган оилавий корхонасини ташкил қилди. Овулда 4 гектар ер майдонида кўл ташкил қилди ва қўшни Хоразм вилоятидан 8 минг дона сазань, оқ амур, дўнг пешона балиқларининг чавоғини келтириб, парвариш қила бошлади. Кейинги йилдан тижорат банкидан 100 млн. сўм миқдорида кредит олиб, корхона фаолиятини кенгайтирди ва 2 нафар ишчи олди. Тадбиркор ўз фаолиятини янада кенгайтириш мақсадида 2020 йилда банкдан 300 млн. сўм миқдорида кредит олди. Ушбу маблағлар ёрдамида яна 6 гектарга яқин ҳудудда кўл ташкил қилиб, ишчилар сонини 4 нафарга етказди. Ҳозирги кунда балиқлар сони 50 минг донага етказилди.

Таъкидлаш жоизки, туманда жорий йилда балиқчиликни ривожлантириш, аҳоли хонадонларида балиқ боқишни ташкил қилиш ва балиқ маҳсулотларини қайта ишлашни йўлга қўйиш мақсадида қатор ишлар йўлга қўйилди. Президентимизнинг 2018 йилдаги “Балиқчилик соҳасини янада ривожлантиришга доир қўшимча чора-тадбирлар тўғрисида”ги Қарори ва бошқа ҳужжатлар мазкур ишларни янги босқичда давом эттиришда муҳим омил бўлмоқда. Туманда 84 та табиий ва сунъий кўллар мавжуд бўлиб, улар 701,4 гектар ер майдонларида жойлашган. Жорий йилда 235 гектардаги сувли кўлларда 470 минг дона балиқ чавоқлантириш режалаштирилган.

Бугунги кунда 205 гектар сувли майдонда 410 минг дона чавоқлантирилди ва қолган 30 гектар сувли майдонда 60 минг дона балиқ чавоқлантириш кўзда тутилган. Айни пайтда йил якунига қадар берилган режани бажариш ишлари олиб борилмоқда. Ҳозирда балиқ етиштириш нафақат сердаромад соҳа, балки унинг ижтимоий аҳамияти катта эканлиги инобатга олиниб, бу билан шуғулланаётган қатор тадбиркорлик субъектларига давлат томонидан субсидия ва имтиёзлар жорий этилмоқда. Шу сабабли туманимизда балиқчиликни ривожлантириш мақсадида тижорат банклари томонидан шу йўналишида қиймати 250 млн. сўмлик лойиҳаларни амалга ошириш ҳамда янгидан 55 та иш ўрнини ташкил қилиш режалаштирилган.

“Абдурасул Жайҳун” балиқчилик корхонасида етиштирилган балиқлар ички ва ташқи бозорга етказиб берилади. Тадбиркор қўшни туманлар ва вилоятларга ташриф буюриб, Тошкент, Сирдарё вилоятларидан тажриба ўрганмоқда ва ўз фаолиятини янада ривожлантиришга ҳаракат қилмоқда. Балиқлар учун зарур бўлган омухта емлар эса Германия, Эрон давлатларидан келтирилмоқда. Ушбу саъй-ҳаракатлар натижасида ўтган йили 30-40 тонна атрофида балиқ етиштирилиб, айланма маблағ 600 млн. сўмга етказилди.

Балиқчилик хўжаликларининг давлатимиз томонидан қўллаб-қувватланаётгани соҳа ривожида муҳим омил бўлмоқда. Ҳамза Жумамуродов каби ғайратли, ишбилармон инсонларнинг саъй-ҳаракатлари билан эса бу соҳада давлатимиз томонидан белгилаб берилган чора-тадбирлар режаси муваффақиятли амалга оширилиб, балиқчилик ривожланиб бормоқда. Ана шундай тадбиркорлар сафи ортса, келгусида соҳа янада ривожланиб, Амударё балиқларини чет элга экспорт қилиш ҳам йўлга қўйилади.

Озода Худойберганова.