Президент қарори ижроси: Амударёда қишлоқ хўжалиги соҳаси вакиллари иштирокида семинар бўлиб ўтди

Мамлакатимизда аҳолини сифатли ва арзон озиқ-овқат маҳсулотлари билан таъминлаш, қишлоқ хўжалиги тармоқларини, хусусан, чорвачиликни янада ривожлантириш ҳамда бу борада фаолият юритаётган тадбиркорларни давлат томонидан қўллаб-қувватлаш бугунги куннинг муҳим вазифаларидан бирига айланган. Айнан шу мақсадларни ҳаётга татбиқ этиш, жойлардаги бу борадаги ишларни ўрганиш ва соҳа вакилларига янги имкониятларни тушунтириш мақсадида Қорақалпоғистон Республикаси Вазирлар Кенгашининг Раиси Фарҳод Эрманов раҳбарлигида Амударё туманидаги «Турсунбоева Умида» фермер хўжалигида ўқув-амалий семинар ташкил этилди.

Тадбир Ўзбекистон Республикаси Президентининг 2025 йил 31 октябрда қабул қилинган «Аҳолини озиқ-овқат маҳсулотлари билан барқарор таъминлашга доир қўшимча чора-тадбирлар тўғрисида»ги қарорининг мазмун-моҳиятини кенг жамоатчиликка етказишга бағишланди. Семинар давомида иштирокчиларга мазкур ҳужжат билан чорвачилик ва озиқ-овқат маҳсулотлари ишлаб чиқариш тизимини модернизация қилиш, фермерларга янги молиявий ҳамда ташкилий енгилликлар яратиш борасида берилган имкониятлар ҳақида батафсил маълумот берилди.

Хусусан, давлатимиз раҳбарининг қарорига мувофиқ, озиқ-овқат маҳсулотлари етиштириш учун ер участкаларининг 49 йил муддатга ижарага берилиши соҳада узоқ муддатли режалар тузиш имконини беради. Бундан ташқари, пахта-ғаллачилик ва чорвачиликка ихтисослашган, умумий ер майдони 10 гектардан кам бўлмаган хўжаликларга ўз ҳудудининг 1 фоизи, бироқ 20 сотихдан ошмаган қисмида енгил конструкцияли чорвачилик бинолари, сув ҳавзалари ва озуқа омборларини қуришга рухсат берилди. Албатта, бундай енгилликдан фойдаланишнинг ўз масъулияти ҳам бор. Яъни, ташкил этиладиган янги лойиҳаларда камида 60 бош йирик шохли ва 100 бош майда шохли қорамол боқилиши шартлиги асосий талаб сифатида белгилаб қўйилгани алоҳида таъкидланди. Бу эса ўз навбатида, гўшт ва сут маҳсулотлари етиштириш ҳажмининг кескин ошишига хизмат қилади.

Шунингдек, фермер ва деҳқонларни молиявий жиҳатдан рағбатлантириш мақсадида 2026 йил 1 январдан бошлаб янги тизимлар ишга тушди. Жумладан, чорвачилик маҳсулотлари ишлаб чиқарувчиларига озуқа экинлари етиштириш учун электрон онлайн аукцион орқали олинган ер участкалари бўйича тўловларни 5 йил давомида тенг улушларда бўлиб-бўлиб тўлаш имконияти яратилди. Бундан ташқари, озуқа ва мойли экинларни етиштирувчи хўжаликларнинг суғориш учун фойдаланиладиган насос агрегатларига сарфланадиган электр энергияси харажатларининг 50 фоизи давлат бюджети ҳисобидан қоплаб берилиши соҳа ривожида катта қадам бўлди. Озиқ-овқат ва мойли экинларни етиштириш харажатларини молиялаштириш мақсадида маҳсулот қийматининг 50 фоизигача бўлган миқдорда имтиёзли кредитлар ажратилиши ҳам соҳа ривожига йўл очади.

Тадбирда чорвачиликни насл жиҳатидан яхшилаш масалалари ҳам четда қолмади. Юқоридаги қарор билан 2030 йил 31 декабргача хориждан импорт қилинадиган наслдор чорва моллари учун субсидиялар тизими сақлаб қолиниши белгиланган. Унга кўра, ҳар бир бош наслдор қорамол учун 2 миллион сўм, ҳар бир бош қўй ва эчки учун 400 минг сўм, шунингдек, маҳаллий ишлаб чиқарувчилардан харид қилинган гўшт йўналишидаги наслли жўжа учун 15 минг сўм миқдорида давлат субсидияси ажратилади.

Семинар сўнгида иштирокчилар «Турсинбаева Умида» фермер хўжалиги мисолида қарор ижроси доирасида амалга оширилаётган реал ишлар билан яқиндан танишдилар. Хўжаликда чорвачиликни ривожлантириш бўйича яратилган замонавий шароитлар, озуқа базасини мустаҳкамлаш ва ишлаб чиқариш қувватларини кенгайтириш борасидаги амалий ҳаракатлар барчага намуна сифатида кўрсатилди.

Президентимизнинг юқоридаги қарори чорвачиликни тизимли ривожлантириш, аҳоли дастурхони тўкинлигини таъминлаш ҳамда фермер хўжаликларини ҳар томонлама қўллаб-қувватлаш йўлидаги мустаҳкам ҳуқуқий пойдевор бўлиб хизмат қилмоқда.