Prezident qarori ijrosi: Amudaryoda qishloq xoʻjaligi sohasi vakillari ishtirokida seminar boʻlib oʻtdi

Mamlakatimizda aholini sifatli va arzon oziq-ovqat mahsulotlari bilan taʼminlash, qishloq xoʻjaligi tarmoqlarini, xususan, chorvachilikni yanada rivojlantirish hamda bu borada faoliyat yuritayotgan tadbirkorlarni davlat tomonidan qoʻllab-quvvatlash bugungi kunning muhim vazifalaridan biriga aylangan. Aynan shu maqsadlarni hayotga tatbiq etish, joylardagi bu boradagi ishlarni oʻrganish va soha vakillariga yangi imkoniyatlarni tushuntirish maqsadida Qoraqalpogʻiston Respublikasi Vazirlar Kengashining Raisi Farhod Ermanov rahbarligida Amudaryo tumanidagi «Tursunboyeva Umida» fermer xoʻjaligida oʻquv-amaliy seminar tashkil etildi.

Tadbir Oʻzbekiston Respublikasi Prezidentining 2025-yil 31-oktyabrda qabul qilingan «Aholini oziq-ovqat mahsulotlari bilan barqaror taʼminlashga doir qoʻshimcha chora-tadbirlar toʻgʻrisida»gi qarorining mazmun-mohiyatini keng jamoatchilikka yetkazishga bagʻishlandi. Seminar davomida ishtirokchilarga mazkur hujjat bilan chorvachilik va oziq-ovqat mahsulotlari ishlab chiqarish tizimini modernizatsiya qilish, fermerlarga yangi moliyaviy hamda tashkiliy yengilliklar yaratish borasida berilgan imkoniyatlar haqida batafsil maʼlumot berildi.

Xususan, davlatimiz rahbarining qaroriga muvofiq, oziq-ovqat mahsulotlari yetishtirish uchun yer uchastkalarining 49-yil muddatga ijaraga berilishi sohada uzoq muddatli rejalar tuzish imkonini beradi. Bundan tashqari, paxta-gʻallachilik va chorvachilikka ixtisoslashgan, umumiy yer maydoni 10 gektardan kam boʻlmagan xoʻjaliklarga oʻz hududining 1 foizi, biroq 20 sotixdan oshmagan qismida yengil konstruktsiyali chorvachilik binolari, suv havzalari va ozuqa omborlarini qurishga ruxsat berildi. Albatta, bunday yengillikdan foydalanishning oʻz masʼuliyati ham bor. Yaʼni, tashkil etiladigan yangi loyihalarda kamida 60 bosh yirik shoxli va 100 bosh mayda shoxli qoramol boqilishi shartligi asosiy talab sifatida belgilab qoʻyilgani alohida taʼkidlandi. Bu esa oʻz navbatida, goʻsht va sut mahsulotlari yetishtirish hajmining keskin oshishiga xizmat qiladi.

Shuningdek, fermer va dehqonlarni moliyaviy jihatdan ragʻbatlantirish maqsadida 2026-yil 1-yanvardan boshlab yangi tizimlar ishga tushdi. Jumladan, chorvachilik mahsulotlari ishlab chiqaruvchilariga ozuqa ekinlari yetishtirish uchun elektron onlayn auktsion orqali olingan yer uchastkalari boʻyicha toʻlovlarni 5-yil davomida teng ulushlarda boʻlib-boʻlib toʻlash imkoniyati yaratildi. Bundan tashqari, ozuqa va moyli ekinlarni yetishtiruvchi xoʻjaliklarning sugʻorish uchun foydalaniladigan nasos agregatlariga sarflanadigan elektr energiyasi xarajatlarining 50 foizi davlat byudjeti hisobidan qoplab berilishi soha rivojida katta qadam boʻldi. Oziq-ovqat va moyli ekinlarni yetishtirish xarajatlarini moliyalashtirish maqsadida mahsulot qiymatining 50 foizigacha boʻlgan miqdorda imtiyozli kreditlar ajratilishi ham soha rivojiga yoʻl ochadi.

Tadbirda chorvachilikni nasl jihatidan yaxshilash masalalari ham chetda qolmadi. Yuqoridagi qaror bilan 2030-yil 31-dekabrgacha xorijdan import qilinadigan nasldor chorva mollari uchun subsidiyalar tizimi saqlab qolinishi belgilangan. Unga koʻra, har bir bosh nasldor qoramol uchun 2 million soʻm, har bir bosh qoʻy va echki uchun 400 ming soʻm, shuningdek, mahalliy ishlab chiqaruvchilardan xarid qilingan goʻsht yoʻnalishidagi naslli joʻja uchun 15 ming soʻm miqdorida davlat subsidiyasi ajratiladi.

Seminar soʻngida ishtirokchilar «Tursinbayeva Umida» fermer xoʻjaligi misolida qaror ijrosi doirasida amalga oshirilayotgan real ishlar bilan yaqindan tanishdilar. Xoʻjalikda chorvachilikni rivojlantirish boʻyicha yaratilgan zamonaviy sharoitlar, ozuqa bazasini mustahkamlash va ishlab chiqarish quvvatlarini kengaytirish borasidagi amaliy harakatlar barchaga namuna sifatida koʻrsatildi.

Prezidentimizning yuqoridagi qarori chorvachilikni tizimli rivojlantirish, aholi dasturxoni toʻkinligini taʼminlash hamda fermer xoʻjaliklarini har tomonlama qoʻllab-quvvatlash yoʻlidagi mustahkam huquqiy poydevor boʻlib xizmat qilmoqda.