BALIQChILIK – DAROMADLI SOHA

Baliq goʻshti inson uchun foydali va oʻzgacha taʼmga ega boʻlgani uchun undan tayyorlangan taomlar xushxoʻr, sevimli boʻladi. Ayniqsa, juda shirali va mazali boʻlgan Amudaryoning baliqlari boshqa ellarda ham mashhur.

Soʻnggi yillarda mamlakatimizda daromadli soha sifatida baliqchilikni rivojlantirish, baliq mahsulotlari turlarini koʻpaytirish, eksport salohiyatini oshirishga alohida eʼtibor qaratilmoqda. Amudaryo daryosi boʻyida joylashgan tumanimizda ham bu boradagi mavjud imkoniyatlardan samarali foydalangan holda sohani rivojlantirish, intensiv texnologiyalar asosida baliq yetishtirish hajmlarini koʻpaytirish hamda aholining sifatli baliq mahsulotlariga boʻlgan talabini qondirish boʻyicha qator ishlar amalga oshirilmoqda.

Uyshin mahallasidagi Hamza Jumamurodov shu sohaga qiziqishi katta boʻlgani sababli 2015-yilda oʻz mablagʻi hisobidan “Abdurasul Jayhun” nomli baliqchilikka ixtisoslashgan oilaviy korxonasini tashkil qildi. Ovulda 4 gektar yer maydonida koʻl tashkil qildi va qoʻshni Xorazm viloyatidan 8 ming dona sazan, oq amur, doʻng peshona baliqlarining chavogʻini keltirib, parvarish qila boshladi. Keyingi yildan tijorat bankidan 100 mln. soʻm miqdorida kredit olib, korxona faoliyatini kengaytirdi va 2 nafar ishchi oldi. Tadbirkor oʻz faoliyatini yanada kengaytirish maqsadida 2020-yilda bankdan 300 mln. soʻm miqdorida kredit oldi. Ushbu mablagʻlar yordamida yana 6 gektarga yaqin hududda koʻl tashkil qilib, ishchilar sonini 4 nafarga yetkazdi. Hozirgi kunda baliqlar soni 50 ming donaga yetkazildi.

Taʼkidlash joizki, tumanda joriy yilda baliqchilikni rivojlantirish, aholi xonadonlarida baliq boqishni tashkil qilish va baliq mahsulotlarini qayta ishlashni yoʻlga qoʻyish maqsadida qator ishlar yoʻlga qoʻyildi. Prezidentimizning 2018-yildagi “Baliqchilik sohasini yanada rivojlantirishga doir qoʻshimcha chora-tadbirlar toʻgʻrisida”gi Qarori va boshqa hujjatlar mazkur ishlarni yangi bosqichda davom ettirishda muhim omil boʻlmoqda. Tumanda 84 ta tabiiy va sunʼiy koʻllar mavjud boʻlib, ular 701,4 gektar yer maydonlarida joylashgan. Joriy yilda 235 gektardagi suvli koʻllarda 470 ming dona baliq chavoqlantirish rejalashtirilgan.

Bugungi kunda 205 gektar suvli maydonda 410 ming dona chavoqlantirildi va qolgan 30 gektar suvli maydonda 60 ming dona baliq chavoqlantirish koʻzda tutilgan. Ayni paytda yil yakuniga qadar berilgan rejani bajarish ishlari olib borilmoqda. Hozirda baliq yetishtirish nafaqat serdaromad soha, balki uning ijtimoiy ahamiyati katta ekanligi inobatga olinib, bu bilan shugʻullanayotgan qator tadbirkorlik subʼektlariga davlat tomonidan subsidiya va imtiyozlar joriy etilmoqda. Shu sababli tumanimizda baliqchilikni rivojlantirish maqsadida tijorat banklari tomonidan shu yoʻnalishida qiymati 250 mln. soʻmlik loyihalarni amalga oshirish hamda yangidan 55 ta ish oʻrnini tashkil qilish rejalashtirilgan.

“Abdurasul Jayhun” baliqchilik korxonasida yetishtirilgan baliqlar ichki va tashqi bozorga yetkazib beriladi. Tadbirkor qoʻshni tumanlar va viloyatlarga tashrif buyurib, Toshkent, Sirdaryo viloyatlaridan tajriba oʻrganmoqda va oʻz faoliyatini yanada rivojlantirishga harakat qilmoqda. Baliqlar uchun zarur boʻlgan omuxta yemlar esa Germaniya, Eron davlatlaridan keltirilmoqda. Ushbu saʼy-harakatlar natijasida oʻtgan yili 30-40 tonna atrofida baliq yetishtirilib, aylanma mablagʻ 600 mln. soʻmga yetkazildi.

Baliqchilik xoʻjaliklarining davlatimiz tomonidan qoʻllab-quvvatlanayotgani soha rivojida muhim omil boʻlmoqda. Hamza Jumamurodov kabi gʻayratli, ishbilarmon insonlarning saʼy-harakatlari bilan esa bu sohada davlatimiz tomonidan belgilab berilgan chora-tadbirlar rejasi muvaffaqiyatli amalga oshirilib, baliqchilik rivojlanib bormoqda. Ana shunday tadbirkorlar safi ortsa, kelgusida soha yanada rivojlanib, Amudaryo baliqlarini chet elga eksport qilish ham yoʻlga qoʻyiladi.

Ozoda Xudoyberganova.