Temir yoʻl sohasi faxriylari kasb bayrami munosabati bilan diydorlashdilar

Yurtimizda 2017-yildan buyon avgust oyining birinchi yakshanbasi Temir yoʻl transporti xodimlari kuni sifatida keng nishonlanib kelinmoqda. Bugungi kunda respublikamizda zamonaviy infratuzilmaga ega boʻlgan, aholi va iqtisodiyot tarmoqlari ehtiyojlarini toʻlaqonli taʼminlay oladigan yaxlit temir yoʻl tarmoqlari kirib bormagan bironta ham hudud yoʻq hisobi. Ushbu keng koʻlamli tarmoqning tarixiga nazar tashlasak, Amudaryo tumanida ham 1968-1969-yillarda Jumurtov togʻ-kon hududida dastlabki temir yoʻl tarmogʻi qurilib, Jumurtov stantsiyasi tashkil etilgan edi. Mazkur stantsiya uzoq yillar davomida mintaqa sanoatiga xizmat qildi. U 1985-yildan boshlab Urganch lokomotiv deposi tarkibida, 2000-yildan esa Qoʻngʻirot lokomotiv deposi tarkibida faoliyat olib bordi. 2008-yilga kelib Jumurtov stantsiyasi faoliyati tugatildi, bu yerda mehnat qilgan fidoyi xodimlar esa “Oʻzbekiston temir yoʻllari” aktsiyadorlik jamiyati tasarrufidagi Qoraoʻzak stantsiyasida oʻz faoliyatlarini davom ettirdilar va ularning aksariyati aynan shu maskandan pensiyaga chiqdilar.

Joriy yilning 2-avgust kuni Temir yoʻl transporti xodimlari kuni munosabati bilan oʻzlarining ilk kasbiy faoliyatlarini Jumurtov stantsiyasida boshlagan, 1970-yillardan eʼtiboran ushbu sharafli sohaga kirib kelib, to nafaqaga chiqqunlariga qadar mashinist vazifasida mehnat qilgan sobiq hamkasblarning diydorlashuv kechasi boʻlib oʻtdi. Oʻz hayotining eng goʻzal yillarini va butun kuch-gʻayratini temir yoʻl transporti sohasiga bagʻishlagan faxriylar bugungi kundagi ulkan yangilanishlar, yuksak taraqqiyot va oʻzlari ishlagan davr oʻrtasidagi keskin ijobiy farq haqida mamnuniyat bilan soʻz yuritdilar. Albatta, bunday samimiy uchrashuvlar shirin xotiralarni yodga solish bilan birga, bugungi kunning qadriga yetishga ham undaydi.

Suhbat davomida soʻnggi yillardagi eng yirik va tarixiy loyihalardan biri — Amudaryo ustidan oʻtuvchi temir yoʻl va avtomobil yoʻli qoʻshma koʻprigining foydalanishga topshirilishi alohida eʼtirof etildi. Ushbu inshoot nafaqat xalqimiz uchun asr yangiligi boʻldi, balki Qoraqalpogʻiston Respublikasi hamda Xorazm viloyatining har tomonlama ravnaq topishida oʻta muhim strategik ahamiyat kasb etdi. Uzunligi 423 metrni tashkil qiluvchi ushbu muhtasham koʻprik bilan bir qatorda, Xorazm viloyatining Shovot hamda Qoraqalpogʻistonning Qoraoʻzak bekatlarini oʻzaro bogʻlovchi 85 kilometrlik temir yoʻl tarmogʻi va 3 ta eng zamonaviy qulayliklarga ega vokzal binolari barpo etildi. Buning natijasida ushbu yoʻnalish boʻyicha temir yoʻl masofasi 180 kilometrga, yuk tashish tezligi esa 6 soatga qisqargani soha faxriylari tomonidan yuqori baholandi.

Shuningdek, faxriy temiryoʻlchilar Jumurtov stantsiyasining 2025-yildan boshlab oʻz faoliyatini qayta tiklaganini alohida olqishladilar. Bu loyiha Qoraoʻzak konlari va Jumurtov togʻ-kon mahsulotlarini poyezdlarda tashish imkoniyatini kengaytirishi bilan nihoyatda ahamiyatlidir.

Xalqimizda “yoʻl mashaqqatini yoʻlchi biladi” degan teran maʼnoli ibora bor. Umrini poʻlat izlar ustida, mashaqqatli va sharafli yoʻllarda oʻtkazgan sobiq hamkasblar temir yoʻl transporti sohasining bugungi yosh mutaxassislariga kelgusi ishlarida ulkan muvaffaqiyatlar tiladilar. Ushbu fayzli va bayramona uchrashuv davomida faxriylar tadbirni yuqori saviyada tashkil etgan hamkasblariga chin dildan minnatdorchiligini bildirdilar.

Bayram bahona diydor koʻrishgan, sohadagi eng soʻnggi yangiliklardan xabardor boʻlib, toʻkin dasturxon atrofida yoshlik xotiralarini esga olgan doʻstlar davrasi uzoq vaqt davom etdi va barchaning qalbiga cheksiz joʻshqinlik hamda koʻtarinki kayfiyat bagʻishladi.