“ОБОД МАҲАЛЛАМ” НОМЛИ ГРАНТ ЛОЙИҲАСИ ДОИРАСИДА КЕНГ КЎЛАМЛИ ОБОДОНЛАШТИРИШ ИШЛАРИ ЎТКАЗИЛДИ

Ўзбекистон “Маҳалла” хайрия жамоат фонди Амударё туман бўлинмасининг Қорақалпоғистон Республикаси Жўқорғи Кенгеси ҳузуридаги нодавлат нотижорат ташкилотлари ва фуқаролик жамиятининг бошқа институтларини қўллаб-қувватлаш жамоат фонди томонидан молиялаштирилган “Обод маҳаллам” номли грант лойиҳаси доирасида кенг кўламли тадбирлар, ободонлаштириш, кўкаламзорлаштириш ишлари амалга оширилмоқда. Ушбу лойиҳага кўра овул ва маҳаллаларда ўтказилаётган учрашувлар, давра суҳбатлари давомида атроф-муҳитни муҳофаза қилиш ва табиий ресурслардан оқилона фойдаланиш соҳасидаги қонун ҳужжатлари, уларда кўрсатилган талабларнинг бузилишининг олдини олиш, уни аниқлаш ва унга чек қўйиш кабилар борасида кенг тушунчалар берилмоқда, аҳолининг экологияга оид билимлари кенгайтирилмоқда.

28 июль куни лойиҳа режасига кўра “Маҳалла” хайрия жамоат фонди Амударё туман бўлинмаси томонидан Манғит шаҳри ва шаҳар атрофидаги ҳудудларда жойлашган овул ва маҳаллаларда санитария ҳолати ва экологик вазиятни яхшилаш, атроф-муҳитни муҳофаза қилиш, ободонлаштириш ҳамда кўкаламзорлаштириш бўйича амалга оширилаётган ишларни кенг тарғиб қилиш мақсадида тадбир ўтказилди.

Бўлинма ходимлари дастлаб Олмазор маҳалласида кенг кўламли ободонлаштириш ишларини ташкил қилишди. Ушбу тадбирга жалб этилган жамоатчи ишчилар ва маҳалла аҳли ўз хонадонлари атрофини, кўчалар ва маҳалладаги ташкилотлар бинолари олдиларини тозалашди, ариқ ва зовурлардаги ўт-чимларни чопиб, дарахтларнинг қуриган шохларини кесишди. Ўз хонадонлари олдидаги гулзорни бегона ўтлардан тозалаб, йўлларга сув сепиб, саришта қилишди, атрофга янада файз бахш этишди.

Худди шундай эзгу ишлар Бойовул маҳалласининг “Баҳор” кўчасида ҳам давом эттирилиб, барча бирдек жам бўлган ҳолда ўз хонадонлари атрофини тозалаш, ободонлаштириш ишларини эрта тонгданоқ бошлаб юборишди. Ёшлар дарахтлардаги қуриган шохларни кесиб, бир жойга тўплашди, бегона ўтларни чопиб, буталарга шакл беришди, атрофини текислашди. Аёл-қизлар эса уй атрофлари ва кўча юзларига сувлар сепиб, атрофга чирой, кўркамлик бахш этишди.

Таъкидлаш жоизки, лойиҳа иш режасида фуқаролар йиғини ҳудудининг санитария ва экология ҳолатини назорат қилиш, уни ободонлаштириш ҳамда кўкаламзорлаштириш, аҳолининг экологик маданиятини юксалтириш, табиий ресурслардан оқилона фойдаланишга доир чора-тадбирларни амалга оширишга кўмаклашишдан ташқари, ҳудудий ижтимоий-иқтисодий ривожлантириш дастурларининг бажарилишини таъминлашда, аҳоли пунктларини ободонлаштириш ва уларнинг санитария ҳолатини яхшилашга доир тадбирларни амалга оширишда иштирок этиш ҳам кўрсатилган.

Шунга кўра фуқаролар йиғини ва бошқа ташкилотлар билан ҳамкорликда Ўртақалъа овулидаги ички кўчалардан бирида йўлни текислаш, кенгайтириш ишлари ҳам ташкил этилди.

Туман Ободонлаштириш бошқармаси, фуқаролар йиғини ва бошқа ташкилотлар билан ҳамкорликда олиб борилган ушбу хайрли ишларга шу ҳудудда яшовчи аҳоли ҳам бош қўшгани иш унумини янада оширди. Йўллар текисланиб, кенгайтирилганидан, катта кўчага чиқиш учун тўғри йўл чиқарилганидан, узоғи яқин бўлганидан маҳалла фуқаролари жуда мамнун бўлишди ва ташкилотчиларга ўз миннатдорчиликларини билдиришди.

Грант лойиҳаси доирасида аҳолининг экологик маданиятини юксалтириш, ёшлар ўртасида экологик таълим ва тарбия тизимини ривожлантириш, уларни атроф-табиий муҳитга эҳтиёткорона муносабатда бўлишга даъват қилиш каби тарғибот ишларини амалга ошириш ҳам кўзда тутилган. Шунинг билан бирга маҳаллалар, кўчалар ва ҳовлилар ҳудудларини кўкаламзорлаштириш, ободонлаштириш борасида фаоллик кўрсатаётган юртдошларимизни элга намуна қилиб кўрсатиш, шу орқали аҳолининг қалбида ва онгида атроф-муҳит тозалиги ва озодалигига масъулият билан ёндошиш бурчини шакллантириш назарда тутилган.

Лойиҳанинг яна бир амалий вазифаси – “Яшил макон” умумиллий дастури доирасида Тўлқин овулида 70 сотих, Бобур овулида 20 сотих, Қум ёп маҳалласида 20 сотих, Чойкўл овулида 20 сотих, Қиличбой овулида 10 сотих майдонда “Маҳалла боғи” яратилишига кўмаклашилгани бўлди. Ушбу боғларда экилган турли манзарали ва мевали дарахтлар кўчатлари бугунги кунда шу ҳудуддаги боғбон, деҳқонлар томонидан парвариш қилинмоқда. Гуркираб ўсаётган ниҳоллар кун сайин кўкка бўй чўзиб, овул ва маҳаллалар кўркига кўрк қўшиб, экологик муҳит яхшиланишида муҳим аҳамият касб этмоқда. Лойиҳа доирасида Фаровон маҳалласи ҳудудида ҳам “Маҳалла боғи” яратилиб, яшил ҳудудларни кўпайтириш ҳисса қўшилди.

Шу куни Бўстон маҳалласида ҳам ҳудуддаги кўчаларга тегишли ташкилотлар билан ҳамкорликда тош ётқизиш ишлари ўтказилди. Керакли техникалар ёрдамида келтирилган тош-шағал йўлларга ёйилиб, текислаб чиқилди. Эндиликда автомобиллар, пиёдалар юриши учун қулайлик яратилганидан, атроф-муҳит саришта бўлиб, файз кирганидан маҳалла фуқаролари ниҳоятда мамнун бўлдилар. Ўзлари ҳам қўлдан келгунча ёрдам кўрсатиб, иш унуми ошишига ҳисса қўшишди.

Грант лойиҳаси доирасида ҳудудларда ўтказилган атроф-муҳитни муҳофаза қилиш, ободонлаштириш ҳамда кўкаламзорлаштириш ишларида ҳамкор ташкилотлар билан бирга фуқаролар ҳам фаол қатнашишди.

Кўчаларни ораста тутиш, чор-атрофнинг саранжом-саришталигига эътибор бериш, она табиатни асраб-авайлаш, боғ-роғлар яратиш кабилар ҳам ўзбекона қадриятларга ҳамоҳангдир. Зеро, ободлик билан юртга файз, барака киради. Лойиҳа доирасида амалга оширилаётган ушбу хайрли ва эзгу ишлар бошқа ҳудудларда ҳам давом этади.

О.Худойберганова.