«ДОЛЗАРБ 30 КУНЛИК» ДОИРАСИДА ТАРҒИБОТ ТАДБИРЛАРИ ДАВОМ ЭТМОҚДА
Ўзбекистон Республикаси Вазирлар Маҳкамасининг фармойишига асосан 2023 йилнинг 10 июль кунидан 10 август кунигача мамлакатимизда “Ёнғин хавфсизлигини таъминлаш бўйича долзарб 30 кунлик” тадбирлари амалга оширилиши белгиланган эди. Хусусан, Амударё туманида фармойиш ижросини таъминлаш мақсадида Фавқулодда вазиятлар вазирлиги туман бўлими ишчи гуруҳи томонидан профилактик тадбирлар ўтказиб келинмоқда.
Тадбир доирасида барча ҳудудларда Фавқулодда вазиятлар бўлими томонидан ёнғин хавфсизлигини таъминлаш ва ёнғин билан боғлиқ турли бахтсиз ҳодисаларнинг олдини олиш юзасидан ташкилот ва идораларда, ижтимоий объектларда, савдо мажмуалари ва бозорларда, аҳоли орасида тарғибот тадбирлари олиб борилмоқда.
Айтиш керакки, ёнғин билан боғлиқ содир бўлиши мумкин бўлган бахтсиз ҳодисаларнинг олдини олишга қаратилган комплекс чора-тадбирларни амалга ошириш ёнғин хавфсизлиги ойлигининг асосий вазифаси этиб белгиланган.
Жумладан, ишчи гуруҳи масъуллари тоифаланган объектлар жойлашган иншоотларда ишчи-ходимлар учун тушунтириш ишларини олиб боришмоқда. Ёниш ва портлаш хавфи ҳамда фавқулодда вазият юз бериш даражаси юқори бўлган объектлар, шунингдек, одамлар гавжум бўладиган жойларда ёнғин хавфсизлиги талабларига қатъий риоя қилиниши зарурлиги эслатиб ўтилмоқда.
Шу билан бирга, оловли ва бошқа ёнғин хавфи мавжуд ишларни хавфсиз бажариш тартиби ва объектнинг ходимлари ўртасида ёнғин содир бўлган вақтда ҳаракатланиш, тегишли ёнғинга қарши йўл-йўриқ бериш орқали уларни ёнғин хавфсизлиги чора-тадбирларига ўргатиш асосий мақсад қилиб олинган.
Ойлик доирасида туман фавқулодда вазиятлар бўлими билан ҳамкорликда бозорлар ва савдо мажмуаларида таом тайёрлаш мақсадида маиший газ баллонларидан нотўғри фойдаланишга йўл қўймаслик чоралари кўрилмоқда ва бу борада жойларда кунлик ўрганишлар олиб борилмоқда.
Шунингдек, кўп қаватли савдо мажмуалари ва умумий овқатланиш шахобчалари, шу жумладан якка тартибдаги аҳоли турар жойларида печь ва дудбуронларнинг хавфсизлик қоидалари ва ёнғин хавфсизлиги талабларига мувофиқлиги ўрганиб чиқилмоқда. Шу билан бирга тарғибот давомида фуқароларга зарур тавсиялар берилмоқда.
Шу ўринда айтиш лозимки, йирик савдо мажмуалари, бозорларда, овқаланиш объектларида, аҳоли хонадонларида олиб борилаётган ёнғинга қарши ўрганишлар жараёнида аниқланган ностандарт, қўлбола газ ва совутиш ускуналари ҳамда бошқа турдаги инсон умрига хафв солувчи яроқсиз мосламалардан фойдаланишга йўл қўйилмайди. Тадбиркорлик объектларда ускуна ва жиҳозлар синов муддатлари доимий назоратга олинган бўлиб, ёнғин хавфсизлиги талабларига жавоб бермайдиган объектларда иш фаолияти дарҳол тўхтатилади.
Туман Фавқулодда вазиятлар бўлими ходимлари томонидан ижтимоий объектларда олиб борилаётган тарғибот ишларида ёнғин келтириб чиқарувчи мосламалардан хавфсиз фойдаланиш қоидаларига риоя этиш шартлиги, хусусан, ускуналар ва ўтказгичларни қуёш нури тушадиган жойларда сақламаслик кераклиги алоҳида уқтирилмоқда.
Ёнғин қаерда бўлмасин, ўзининг мудҳиш изларини қолдиради. Ушбу офат натижасида қанчадан-қанча одамлар бошпанасиз қолиши, саломатликларини йўқотиши ва айрим ҳолларда эса инсонлар бевақт ҳалок бўлишлари ҳаётий мисоллар билан тушунтирилмоқда.
Тадбир давомида камчилик ва носозликлар аниқланган тақдирда аҳоли ва тадбиркорларга огоҳлантиришлар берилиб, зарур ҳолларда жарималар солинмоқда. Бино ва объектлар эгаларига электр ускуналарини доимо назорат қилиш, эскирган электр симларини ўз вақтида алмаштириш, хоналарда ёш болаларни ҳамда қарияларни қаровсиз қолдирмаслик, кўрикдан ўтмаган маиший ускуналардан фойдаланмаслик лозимлиги таъкидланмоқда. Шунингдек, ёнғин хавфсизлигига оид эслатмалар тарқатилмоқда.
Севара Исмоилова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
