«DOLZARB 30 KUNLIK» DOIRASIDA TARGʻIBOT TADBIRLARI DAVOM ETMOQDA

Oʻzbekiston Respublikasi Vazirlar Mahkamasining farmoyishiga asosan 2023-yilning 10-iyul kunidan 10-avgust kunigacha mamlakatimizda “Yongʻin xavfsizligini taʼminlash boʻyicha dolzarb 30 kunlik” tadbirlari amalga oshirilishi belgilangan edi. Xususan, Amudaryo tumanida farmoyish ijrosini taʼminlash maqsadida Favqulodda vaziyatlar vazirligi tuman boʻlimi ishchi guruhi tomonidan profilaktik tadbirlar oʻtkazib kelinmoqda.

Tadbir doirasida barcha hududlarda Favqulodda vaziyatlar boʻlimi tomonidan yongʻin xavfsizligini taʼminlash va yongʻin bilan bogʻliq turli baxtsiz hodisalarning oldini olish yuzasidan tashkilot va idoralarda, ijtimoiy obʼektlarda, savdo majmualari va bozorlarda, aholi orasida targʻibot tadbirlari olib borilmoqda.

Aytish kerakki, yongʻin bilan bogʻliq sodir boʻlishi mumkin boʻlgan baxtsiz hodisalarning oldini olishga qaratilgan kompleks chora-tadbirlarni amalga oshirish yongʻin xavfsizligi oyligining asosiy vazifasi etib belgilangan.

Jumladan, ishchi guruhi masʼullari toifalangan obʼektlar joylashgan inshootlarda ishchi-xodimlar uchun tushuntirish ishlarini olib borishmoqda. Yonish va portlash xavfi hamda favqulodda vaziyat yuz berish darajasi yuqori boʻlgan obʼektlar, shuningdek, odamlar gavjum boʻladigan joylarda yongʻin xavfsizligi talablariga qatʼiy rioya qilinishi zarurligi eslatib oʻtilmoqda.

Shu bilan birga, olovli va boshqa yongʻin xavfi mavjud ishlarni xavfsiz bajarish tartibi va obʼektning xodimlari oʻrtasida yongʻin sodir boʻlgan vaqtda harakatlanish, tegishli yongʻinga qarshi yoʻl-yoʻriq berish orqali ularni yongʻin xavfsizligi chora-tadbirlariga oʻrgatish asosiy maqsad qilib olingan.

Oylik doirasida tuman favqulodda vaziyatlar boʻlimi bilan hamkorlikda bozorlar va savdo majmualarida taom tayyorlash maqsadida maishiy gaz ballonlaridan notoʻgʻri foydalanishga yoʻl qoʻymaslik choralari koʻrilmoqda va bu borada joylarda kunlik oʻrganishlar olib borilmoqda.

Shuningdek, koʻp qavatli savdo majmualari va umumiy ovqatlanish shaxobchalari, shu jumladan yakka tartibdagi aholi turar joylarida pech va dudburonlarning xavfsizlik qoidalari va yongʻin xavfsizligi talablariga muvofiqligi oʻrganib chiqilmoqda. Shu bilan birga targʻibot davomida fuqarolarga zarur tavsiyalar berilmoqda.

Shu oʻrinda aytish lozimki, yirik savdo majmualari, bozorlarda, ovqalanish obʼektlarida, aholi xonadonlarida olib borilayotgan yongʻinga qarshi oʻrganishlar jarayonida aniqlangan nostandart, qoʻlbola gaz va sovutish uskunalari hamda boshqa turdagi inson umriga xafv soluvchi yaroqsiz moslamalardan foydalanishga yoʻl qoʻyilmaydi. Tadbirkorlik obʼektlarda uskuna va jihozlar sinov muddatlari doimiy nazoratga olingan boʻlib, yongʻin xavfsizligi talablariga javob bermaydigan obʼektlarda ish faoliyati darhol toʻxtatiladi.

Tuman Favqulodda vaziyatlar boʻlimi xodimlari tomonidan ijtimoiy obʼektlarda olib borilayotgan targʻibot ishlarida yongʻin keltirib chiqaruvchi moslamalardan xavfsiz foydalanish qoidalariga rioya etish shartligi, xususan, uskunalar va oʻtkazgichlarni quyosh nuri tushadigan joylarda saqlamaslik kerakligi alohida uqtirilmoqda.

Yongʻin qayerda boʻlmasin, oʻzining mudhish izlarini qoldiradi. Ushbu ofat natijasida qanchadan-qancha odamlar boshpanasiz qolishi, salomatliklarini yoʻqotishi va ayrim hollarda esa insonlar bevaqt halok boʻlishlari hayotiy misollar bilan tushuntirilmoqda.

Tadbir davomida kamchilik va nosozliklar aniqlangan taqdirda aholi va tadbirkorlarga ogohlantirishlar berilib, zarur hollarda jarimalar solinmoqda. Bino va obʼektlar egalariga elektr uskunalarini doimo nazorat qilish, eskirgan elektr simlarini oʻz vaqtida almashtirish, xonalarda yosh bolalarni hamda qariyalarni qarovsiz qoldirmaslik, koʻrikdan oʻtmagan maishiy uskunalardan foydalanmaslik lozimligi taʼkidlanmoqda. Shuningdek, yongʻin xavfsizligiga oid eslatmalar tarqatilmoqda.

Sevara Ismoilova