ИСТЕЪМОЛЧИЛАР СУЮЛТИРИЛГАН ГАЗ БИЛАН УЗЛУКСИЗ ТАЪМИНЛАНИШИ УЧУН БАРЧА ҚУЛАЙЛИКЛАР ЯРАТИЛГАН

Аҳолининг турмуш фаровонлигини ошириш, уларга кундалик ҳаётларида зарур шарт-шароитлар яратишга қаратилган чора-тадбирлар мамлакатимиз ижтимоий сиёсатида ҳамиша устувор вазифа ҳисобланади. Айниқса, маиший хизматлар кўрсатиш савиясини янада яхшилашга қаратилган саъй-ҳаракатлар туфайли туманлар марказларидан олисда яшайдиган юртдошларимиз турмуш шароитини яхшилашга қаратилган ишлар аҳолига манзур бўлмоқда. Бу борада аҳоли хонадонларини ўз вақтида ва узлуксиз суюлтирилган газ билан таъминлаш бўйича амалга оширилаётган ишлар эътиборга муносиб.

Амударё туманининг барча ҳудудлари бўйича жами 24476 та аҳоли хонадони суюлтирилган газ билан бир маромда, узлуксиз таъминланиши учун туманнинг олис, энг чекка қишлоқларида “Амударётумангаз” газ таъминоти бўлимининг хизмат кўрсатиш сервис марказлари ва бўлим филиаллари фаолият олиб бормоқда.

Хизмат кўрсатиш савиясини замон талаблари даражасига кўтариш, аҳоли учун қулайликлар яратиш мақсадида жами 24476 та хонадонларнинг барчасига ID карталари тарқатилди. Шунингдек, “Амударётумангаз” филиали газ таъминоти бўлими тасарруфидаги 28402 дона газ баллонлари аҳоли фойдаланиши учун ижарага берилди. Аҳоли ҳисобидаги 2540 та газ баллонлари тўлиқ техник назоратдан ўтказилиб, ёрлиқлар ёпиштирилди ва 2021 йилнинг 1 июнь санасидан бошлаб аҳолига суюлтирилган газ баллонларини тарқатиш тўлиқ ID карталари орқали амалга оширилмоқда.

Айни пайтда “Амударётумангаз” филиали газ таъминоти бўлимининг 8 та шохобчаси мавжуд бўлиб, шундан Холимбег сервис Маркази томонидан 5123 та хонадонга, Куюк кўпир ОФЙ шохобчаси 5366, Қипчоқ ОФЙ шохобчаси 2279, филиал марказий омборхонаси томонидан 4823, Оқ олтин ОФЙ шохобчаси 2356 та хонадонга, Қангли ОФЙ шохобчаси 1387, Бўзёп ОФЙ шохобчаси 1489 та, Дўрман ОФЙ шохобчаси томонидан 1653 та хонадонга намунали сервис хизмати кўрсатиб келинмоқда.

Аҳолини суюлтирилган газ билан таъминлаш сифатини яхшилаш мақсадида туманда 2014 йилда Амударё ГТПси қурилиб, ишга туширилди. Бу эса аҳолининг суюлтирилган газга бўлган талабини тўлиқ қондириш имконини бермоқда.

Туманда ҳудудлардаги шохобчаларга узоқ бўлган хонадонлар ҳам кўпчиликни ташкил этади ва айнан ана шундай хонадонлар сони 8169 та бўлиб, уларнинг кўпчилиги Қиличбой мавзесига тўғри келади. Хусусан, Тошқалъа маҳалласи ҳудудида 640 та, Юқори қишлоқ МФЙда 491, Бешовул маҳалласида 684, Хизр эли маҳалласида 801 та, Қорамон МФЙда 874 та хонадон ҳудудий сервис хизмат кўрсатиш шохобчаларидан анча олисда жойлашгани учун истеъмолчиларга газ баллонлари махсус автомашиналарда етказиб берилмоқда. Шунингдек, Чойкўл, Тўлқин, Бобур номли ОФЙ, Жумуртов ШФЙ, Назархон ОФЙлари ва Торёп, Босув, Боғ, Арнабўйи маҳаллаларидаги истеъмолчиларга ҳам махсус автомашиналар ёрдамида газ баллонлари мунтазам равишда етказиб берилмоқда.

Амударё тумани ҳудудидаги 38 та МТТлари ҳам суюлтирилган газ билан мунтазам таъминланиб келинмоқда ва хизмат кўрсатишнинг бу йўналиши бўйича аҳолидан ва улгуржи-истеъмолчилар томонидан бўлимга шикоят ва мурожаатлар келиб тушмаганидан шуни англаш мумкинки, аҳолини ва улгуржи истеъмолчиларни суюлтирилган газ баллонлари билан таъминлаш сифати тобора яхшиланиб бормоқда.

Шуни алоҳида қайд этиш керакки, жорий йилнинг 1 июль ҳолатига “Амударётумангаз” филиали газ таъминоти бўлими томонидан истеъмолчиларга 1940,7 тонна суюлтирилган газ етказиб берилди. Шу билан бирга филиал томонидан ижрага берилган 28402 та, аҳолининг ўз ҳисобидаги 2540 та газ баллонлари ўз вақтида техник назоратдан ўтказилиб, ёрлиқлари янгиланди. Бу эса истеъмолчилар учун ҳеч қандай тўсиқларсиз газ баллонларини суюлтирилган газ билан тўлдиришда қулайлик яратиб, газ таъминоти бўлими ишчиларининг ўз ишларини сифатли, тезкор амалга ошириш имкониятини бермоқда.

Жасур ЕРМЕТОВ, “Амударётумангаз” газ таъминоти бўлими бошлиғи.