ISTEʼMOLChILAR SUYuLTIRILGAN GAZ BILAN UZLUKSIZ TAʼMINLANIShI UChUN BARChA QULAYLIKLAR YaRATILGAN

Aholining turmush farovonligini oshirish, ularga kundalik hayotlarida zarur shart-sharoitlar yaratishga qaratilgan chora-tadbirlar mamlakatimiz ijtimoiy siyosatida hamisha ustuvor vazifa hisoblanadi. Ayniqsa, maishiy xizmatlar koʻrsatish saviyasini yanada yaxshilashga qaratilgan saʼy-harakatlar tufayli tumanlar markazlaridan olisda yashaydigan yurtdoshlarimiz turmush sharoitini yaxshilashga qaratilgan ishlar aholiga manzur boʻlmoqda. Bu borada aholi xonadonlarini oʻz vaqtida va uzluksiz suyultirilgan gaz bilan taʼminlash boʻyicha amalga oshirilayotgan ishlar eʼtiborga munosib.

Amudaryo tumanining barcha hududlari boʻyicha jami 24476 ta aholi xonadoni suyultirilgan gaz bilan bir maromda, uzluksiz taʼminlanishi uchun tumanning olis, eng chekka qishloqlarida “Amudaryotumangaz” gaz taʼminoti boʻlimining xizmat koʻrsatish servis markazlari va boʻlim filiallari faoliyat olib bormoqda.

Xizmat koʻrsatish saviyasini zamon talablari darajasiga koʻtarish, aholi uchun qulayliklar yaratish maqsadida jami 24476 ta xonadonlarning barchasiga ID kartalari tarqatildi. Shuningdek, “Amudaryotumangaz” filiali gaz taʼminoti boʻlimi tasarrufidagi 28402 dona gaz ballonlari aholi foydalanishi uchun ijaraga berildi. Aholi hisobidagi 2540 ta gaz ballonlari toʻliq texnik nazoratdan oʻtkazilib, yorliqlar yopishtirildi va 2021-yilning 1-iyun sanasidan boshlab aholiga suyultirilgan gaz ballonlarini tarqatish toʻliq ID kartalari orqali amalga oshirilmoqda.

Ayni paytda “Amudaryotumangaz” filiali gaz taʼminoti boʻlimining 8 ta shoxobchasi mavjud boʻlib, shundan Xolimbeg servis Markazi tomonidan 5123 ta xonadonga, Kuyuk koʻpir OFY shoxobchasi 5366, Qipchoq OFY shoxobchasi 2279, filial markaziy omborxonasi tomonidan 4823, Oq oltin OFY shoxobchasi 2356 ta xonadonga, Qangli OFY shoxobchasi 1387, Boʻzyop OFY shoxobchasi 1489 ta, Doʻrman OFY shoxobchasi tomonidan 1653 ta xonadonga namunali servis xizmati koʻrsatib kelinmoqda.

Aholini suyultirilgan gaz bilan taʼminlash sifatini yaxshilash maqsadida tumanda 2014-yilda Amudaryo GTPsi qurilib, ishga tushirildi. Bu esa aholining suyultirilgan gazga boʻlgan talabini toʻliq qondirish imkonini bermoqda.

Tumanda hududlardagi shoxobchalarga uzoq boʻlgan xonadonlar ham koʻpchilikni tashkil etadi va aynan ana shunday xonadonlar soni 8169 ta boʻlib, ularning koʻpchiligi Qilichboy mavzesiga toʻgʻri keladi. Xususan, Toshqalʼa mahallasi hududida 640 ta, Yuqori qishloq MFYda 491, Beshovul mahallasida 684, Xizr eli mahallasida 801 ta, Qoramon MFYda 874 ta xonadon hududiy servis xizmat koʻrsatish shoxobchalaridan ancha olisda joylashgani uchun isteʼmolchilarga gaz ballonlari maxsus avtomashinalarda yetkazib berilmoqda. Shuningdek, Choykoʻl, Toʻlqin, Bobur nomli OFY, Jumurtov ShFY, Nazarxon OFYlari va Toryop, Bosuv, Bogʻ, Arnaboʻyi mahallalaridagi isteʼmolchilarga ham maxsus avtomashinalar yordamida gaz ballonlari muntazam ravishda yetkazib berilmoqda.

Amudaryo tumani hududidagi 38 ta MTTlari ham suyultirilgan gaz bilan muntazam taʼminlanib kelinmoqda va xizmat koʻrsatishning bu yoʻnalishi boʻyicha aholidan va ulgurji-isteʼmolchilar tomonidan boʻlimga shikoyat va murojaatlar kelib tushmaganidan shuni anglash mumkinki, aholini va ulgurji isteʼmolchilarni suyultirilgan gaz ballonlari bilan taʼminlash sifati tobora yaxshilanib bormoqda.

Shuni alohida qayd etish kerakki, joriy yilning 1-iyul holatiga “Amudaryotumangaz” filiali gaz taʼminoti boʻlimi tomonidan isteʼmolchilarga 1940,7 tonna suyultirilgan gaz yetkazib berildi. Shu bilan birga filial tomonidan ijraga berilgan 28402 ta, aholining oʻz hisobidagi 2540 ta gaz ballonlari oʻz vaqtida texnik nazoratdan oʻtkazilib, yorliqlari yangilandi. Bu esa isteʼmolchilar uchun hech qanday toʻsiqlarsiz gaz ballonlarini suyultirilgan gaz bilan toʻldirishda qulaylik yaratib, gaz taʼminoti boʻlimi ishchilarining oʻz ishlarini sifatli, tezkor amalga oshirish imkoniyatini bermoqda.

Jasur YeRMETOV, “Amudaryotumangaz” gaz taʼminoti boʻlimi boshligʻi.