ПРЕЗИДЕНТЛИККА НОМЗОДНИНГ ИШОНЧЛИ ВАКИЛИ АМУДАРЁЛИК САЙЛОВЧИЛАР БИЛАН УЧРАШДИ

Бутун мамлакатимизда бўлгани каби Амударё туманида ҳам 9 июль куни бўлиб ўтадиган Ўзбекистон Республикаси Президенти сайловига тайёргарлик қизғин тус олмоқда. Жойларда Президентликка номзодларнинг, уларнинг ишончли вакилларининг сайловчилар билан учрашувлари ўтказилмоқда. 19 июнь куни Амударё тумани Маданият марказида Тадбиркорлар ва ишбилармонлар ҳаракати – O’zLiDeP партиясидан Ўзбекистон Республикаси Президентлигига номзод Шавкат Мирзиёевнинг Қорақалпоғистон Республикасидаги ишончли вакили Байрамбай Отемуратовнинг сайловчилар билан учрашуви бўлиб ўтди. Унда ҳудуд фаоллари, туман Кенгаши депутатлари, фаол хотин-қизлар ва электорат вакиллари, кенг жамоатчилик вакиллари ҳамда ОАВ ходимлари иштирок этди.

Учрашувда ишончли вакил сайловчиларга номзоднинг сайловолди дастури, ундан ўрин олган бешта устувор мақсадни қамраб олган асосий йўналишлар ҳақида батафсил маълумот бериб ўтди.

Таъкидланишича, дастурдаги биринчи мақсад ҳар бир инсонга ўз салоҳиятини рўёбга чиқариш учун муносиб шароит яратишга қаратилган чора-тадбирларни ўз ичига олади.

Маълумки, Янги Ўзбекистон ижтимоий давлат, деб эълон қилинди. Хусусан, янгиланган Конституциямизда давлатнинг ижтимоий мажбуриятлари 3 баробар кўпайтирилди. Конституциявий қоида ва талаблардан келиб чиқиб, адолатли ижтимоий сиёсатни юритиш – Янги Ўзбекистонни барпо этишнинг асосий омилларидан бири этиб белгиланган. Бинобарин, биринчи мақсаддаги вазифалар таълим, тиббиёт ва аҳоли фаровонлигини таъминлаш бўйича давлат ўз мажбуриятларини бажариши йўналишидаги ислоҳотларнинг янги босқичга олиб чиқилишига хизмат қилади.

Одамларни ҳаётдан рози қилиш учун барқарор иқтисодий ўсишни таъминлаш дастурда иккинчи мақсад сифатида белгиланган. 2030 йилга бориб аҳоли жон бошига тўғри келадиган ялпи ички маҳсулот ҳажмини ҳозирги 2 минг 200 доллардан 4 минг долларга ошириш, Ўзбекистоннинг “даромади ўртачадан юқори бўлган давлатлар” қаторига киришига имкон берувчи барча ишлар атрофлича баён қилинган.

Сайловолди учрашувида Янги Ўзбекистонни барпо этишда ана шу беш мақсад – беш устунга зарурат борлиги, улар ўз-ўзидан ёки шунчаки танланмагани, уларни таъминлаш билан кўзланган мақсадга эришиш мумкинлиги ҳамда бу нафақат келгуси етти йилда бош вазифа бўлиши, яқин келажакда ҳам ҳал қилувчи ўрин тутиши таъкидланди. Айниқса, бизнесни қўллаб-қувватлаш, тадбиркорларга эркин фаолият юритиши учун энг қулай шароитлар яратиш ишлари янада давом эттирилиши, ҳар бир соҳа эгаларига қатор қулайлик ва имкониятлар яратиш вазифаси белгиланаётгани аҳамиятли. Солиқ тизимини соддалаштириш ва барча тадбиркорлар учун тенг имкониятлар яратиш, келгуси йилларда бизнес учун қўшилган қиймат, фойда, айланмадан олинадиган ва мол-мулк солиғи бўйича ставкалар оширилмаслиги қатъий кафолатланиши шулар жумласидандир.

“Ишонч билан айтиш мумкинки, Шавкат Мирзиёевнинг сайловолди дастурида белгиланган эркин ва фаровон, қудратли давлатни қуришда бешта стратегик йўналиш яқин келажакдаги фаолиятимизда ҳал қилувчи ўрин тутади ва кўпмиллатли халқимизнинг орзу-ниятларини рўёбга чиқаришга хизмат қилади”, деди номзоднинг ишончли вакили.

Учрашувда партия фаоллари, жамоатчилик вакиллари сўзга чиқиб, амалга оширилиши белгиланаётган бу йўналишлардаги улуғвор вазифаларга юқори баҳо бердилар ва ишончли вакил Байрамбай Отамуродовнинг таклифини қўллаб-қувватлаб, 9 июль куни барчани халқимиз фаровонлиги йўлида тинмай изланаётган, Янги Ўзбекистонни барпо этишга ўз ҳаётини бағишлаган фидойи инсон, юртимизда учинчи Уйғониш даврини бошлаб берган давлат арбоби Шавкат Мирзиёев учун овоз беришга чақирдилар.

Ойгул РАЖАБОВА.