КИТОБХОН ЁШЛАР ИШТИРОКИДА ДАВРА СУҲБАТИ БЎЛИБ ЎТДИ

Ёшларнинг комил инсонлар бўлиб вояга етишларида китоб ва китобхонликнинг аҳамияти ниҳоятда каттадир. Китобхонлик ёшларнинг маънавий дунёсини бойитади, уларни ҳалол яшаш ва тўғри йўлга бошлайди. Китоб ҳаётни чуқур англаб етишга, инсоннинг ўз танлаган орзуларига эришишга ёрдам беради.

Амударё телевидениесида Олий мажлис ҳузуридаги Нодавлат нотижорат ташкилотларни ва фуқаролик жамиятининг бошқа институтларини қўллаб-қувватлаш Жамоат фонди томонидан молиялаштирилган “Юксак маънавиятли ва ахлоқли ёшлар – келажак пойдевори” номли грант лойиҳаси доирасида ёшлар ўртасида китобхонликни кенг тарғиб қилиш мақсадида тумандаги 30-сонли умумтаълим мактабда мактаб кутубхонасига саёҳат ва 9-синф ўқувчилари билан давра суҳбати ташкил этилди.

Дастлаб ўқувчилар билан мактаб кутубхонасидаги бадиий адабиётларнинг маъно-мазмуни юзасидан фикр алмашилди. Ўқиб тугатган бадиий асарлари юзасидан шахсий хулосалари сўралди.

Шунингдек, ўқувчиларга ўқиш тавсия қилинадиган бадиий асарлар рўйҳати тақдим этилди.

9-синф ўқувчилари билан ташкил этилган давра суҳбатида туман ҳокимлигининг Ахборот хизмати раҳбари Фотима Эшимбетова, шу мактабнинг она тили ва адабиёт фани ўқитувчиси Умида Раҳимбоевалар иштирок этишди.

Тадбирда Фотима Эшимбетова шу куннинг долзарб масалаларидан бири− “Китобхонлик маданияти” мавзусида маъруза қилди.

У ўз маърузасида бадиий адабиётларни танлашда нималарга эътибор берилиши, мутолаа қилинган бадиий асарлардан қай тарзда хулоса чиқариш лозимлиги ҳақида кенг тарзда тушунтириш берди.

Шундан сўнг, мактабнинг она тили ва адабиёт фани ўқитувчиси Умида Раҳимбаева китоб расталарида китоблар кўплигини, шу баробарида китобхонлар ҳам оз эмаслигини, лекин китобларни танлаб, саралаб ўқиш лозим эканлигини айтиб ўтди.

Шунингдек, ёшларга тўғри келган китобни эмас, айнан бизнинг миллатимиз руҳига мос, қалбларга маънавий озиқ, бойлик берадиган асарлар ўқишларини тарғиб этишдан иборат эканлигини айтиб ўтди.

Дарҳақиқат, ҳозирги глобаллашув жараёнида халқнинг маънавий илдизларига болта уриш, “оммавий маданият”, диний экстремизм, диний ақидапарастлик ғояларини тарғиб қилишга хизмат қилувчи китоблар ҳам ҳар хил йўллар билан четдан мамлакатимизга олиб келинаётир.

Бундан ташқари, маънавий-тарбиявий аҳамияти саёз асарлар ҳам чоп этилаётир. Демак, ўқиладиган асарни танлай билиш ҳам санъат. Ўсиб келаётган ёшлар онгида ана шундай санъатни, тўғрироғи, маънавий иммунитетни шакллантиришимиз ва мустаҳкамлаш зарурдир.

Давра суҳбати давомида ўқувчи ёшлар ўзлари севиб мутолаа қилган “Дунёнинг ишлари”, “Икки эшик ораси”, “Тушда кечган умрлар”, “Ўткан кунлар”, “Жимжитлик” каби асарлар ҳақида ўз фикр-мулоҳазаларини билдирдилар.

Қолаверса ўқувчилар асар қаҳрамонлари ўрнида бўлиб қолсалар уларнинг йўл қўйган хатоларини такрорламасликларини айтиб ўзининг мустақил фикрларини билдириб ўтишди. Давра суҳбати бахс-мунозарага бой тарзда қизиқарли бўлиб ўтди.

Ф.Эшимбетова