ЮРТИМИЗДАГИ ТИНЧЛИК-ОСОЙИШТАЛИК БАРДАВОМ БЎЛСИН!

Бугун мамлакатимизда ҳукм сураётган тинчлик, осойишталик, дастурхонимиздаги тўкинлик Яратганнинг биз бандаларига кўрсатаётган чексиз раҳмати, юртдошларимизнинг эзгу ишлари самараси, десак асло муболаға бўлмайди.

Инсонларни доимо яхши ишга далолат қилмоқ катта-ю кичик барчанинг бурчидир. Айниқса, ёши улуғ кишиларимиз панд-у насиҳатларини тинглаб, амалда қўллаб борсак, асло адашмаймиз, ҳаётимиз янада гўзал ҳамда фаровон бўлади. Пайғамбаримиз (с.а.в.) шуни алоҳида таъкидлайдиларки, Ислом дини инсонга, унинг дунё ва охиратдаги ҳаётига доир барча ишларни ислоҳ этиш ва тартибга солиш учун келган бўлиб, дин ва дунё, ижтимоий ва руҳий ҳаёт ўртасини асло ажратмайди.

Дунёда савобга, яхшиликка олиб борадиган ишлар жуда кўп. Жумладан, ота-онасига яхшилик қилиш, қўни-қўшнисига, ака-укасига, қавму-қариндошларига, маҳалла-кўйдаги ёрдамга муҳтожларга, қаровсизларга кўмак бериш сингари хайрли ишларни ўз бурчи, деб қабул қилиш юксак инсоний фазилатлардир.

Улуғ саҳоба Жобир (р.а.) Пайғамбаримиз (с.а.в.)дан ривоят қилади, Ул зот: "Яхшилик қилишнинг барчаси – садақадир" деб марҳамат қилганлар. Абу Ҳурайра (р.а.) Пайғамбаримиз (с.а.в.)дан нақл қиладилар. Ул зоти шариф айтдилар: "Табассум билан айтилган чиройли сўз – садақадир".. Мусулмон кишининг барча саъй-ҳаракатлари инсон манфаатига хизмат қилиши зарур.

Эзгуликни фақат моддий кўмак бериш ёхуд бирор жисмоний ёрдам кўрсатиш деб тушунмаслик керак. Зеро, яхшиликнинг чеки-чегараси йўқ. Меҳрга, мурувватга муштоқ кўнгилларни зиёрат этиш ҳам – яхшилик қилиш, ҳақиқий мўъминнинг сифатларидандир.

Юртимизда баҳор, Наврўзи олам тантаналари давом этаётган ушбу кунларда туманимиз халқи кенг қамровли ободонлаштириш, кўкаламзорлаштириш ишларини амалга ошираётгани, деҳқонларимиз эзгу ниятлар билан ерга экинлар уруғини сочаётгани киши кўнглига қувонч бағишлайди. Бундай саодатли кунлар бардавом бўлишини тилаймиз.

Р.Ҳабибуллаев,

туман "Ҳожи эшон бобо" жомъе масжиди имоми.