ЭЗГУЛИКНИНГ УМРИ УЗУН

Отам колхозда оддий сувчи бўлган.

Далаларнинг паст-баландини билганлиги сабабли  уни бригадир сувчи қилиб қўйган ва отамдан бошқа ҳеч кимга ишонмаган.

Тонг-саҳардан отамнинг далага кетганини ҳеч ким билмасди. У далада сув кечиб юрганида туман ҳокими, раҳматлик Ражаббой Йўлдошев унинг олдига  бориб,  ҳол-аҳвол сўрашиб кетганлигини отам бизга фахрланиб гапириб берганлар.

Ҳали одамлар ширин уйқуда ётганида, тонгда далаларни кезиб юрадиган туман ҳокими ҳақида ҳамон оддий одамлар гапириб юришади. Унинг  деҳқонлар билан гурунглашиб, қора қумғоннинг чойини бирга ичиб, одамларнинг муаммолари билан қизиққан дамларига биз болалар ҳам  неча бора гувоҳ бўлганмиз.

– Қора қумғоннинг чойи ширин ва қайноқ бўлади, – дея ишчилар даврасида ҳўплаб-ҳўплаб чой ичарди ҳоким бобо.

– Нима  ёрдам керак бўлса, бемалол айтаверинг, – дея биримизни ака, биримизни ука, синглим, деб дилдан суҳбатлашарди. Овулимизга тез-тез келиб турарди, – эслайди Амир Темур номли овулда яшовчи кекса отахон Норбой ота Эшимбетов.

– Овулимиз Туркманистон давлати билан чегарадош, сув йўлларидан узоқдалиги  учунми, тез-тез келиб, халқ билан учрашарди, – хотирлайди Норгул момо. – Ҳар келганларида бемор одамларнинг уйларига  бориб, ҳол-аҳвол сўрашар, байрамларда совға-саломлар билан аҳволидан хабар олиб турарди. Уни Амир Темурликлар жуда яхши кўришарди.

Норгул момо умр йўлдоши Амат ота Отажоновнинг  кўп йиллар тўшак тортиб ётиб қолгани ҳақида гапираркан:

– Амат отанг жуда фидойи, меҳнаткаш инсон эди. Шунданми, Ражаббой Йўлдошев тез-тез уйимизга келиб, ҳолидан хабар олиб турарди, – дейди миннатдорчилик билан. – Ўзининг минг ташвиши бўлсаям, меҳнат қилган одамни жуда қадрларди.

Норгул момо билан Амат бобонинг умри пахтачиликка эгиз. Бутун оила аъзолари билан пахта даласида меҳнат қилишган. Дугонаси Марям момонинг ўн фарзанди бор эди. У пайтларда фарзанд баҳона бўлмаган. Болаларини дала бошида қўйиб, пахта теришган момолар. Ражаббой Йўлдошев Амир Темур овулидаги Қўшмон бригадир Бобожонов, Ражаб бригадир Аллабоевларни жуда ҳурмат қилар, тез-тез уларнинг пахта далаларида бўлиб, ишлари билан яқиндан танишарди. Шунданми, овул аҳли Ражаббой Йўлдошевнинг яхши хислатлари ҳақида ҳурмат билан сўзлайдилар.

Чунки яхшиликнинг, эзгуликнинг  умри узун бўлади ва уни асло халқ унутмайди.

Зуҳра Аҳмедова.