EZGULIKNING UMRI UZUN

Otam kolxozda oddiy suvchi boʻlgan.

Dalalarning past-balandini bilganligi sababli  uni brigadir suvchi qilib qoʻygan va otamdan boshqa hech kimga ishonmagan.

Tong-sahardan otamning dalaga ketganini hech kim bilmasdi. U dalada suv kechib yurganida tuman hokimi, rahmatlik Rajabboy Yoʻldoshev uning oldiga  borib,  hol-ahvol soʻrashib ketganligini otam bizga faxrlanib gapirib berganlar.

Hali odamlar shirin uyquda yotganida, tongda dalalarni kezib yuradigan tuman hokimi haqida hamon oddiy odamlar gapirib yurishadi. Uning  dehqonlar bilan gurunglashib, qora qumgʻonning choyini birga ichib, odamlarning muammolari bilan qiziqqan damlariga biz bolalar ham  necha bora guvoh boʻlganmiz.

– Qora qumgʻonning choyi shirin va qaynoq boʻladi, – deya ishchilar davrasida hoʻplab-hoʻplab choy ichardi hokim bobo.

– Nima  yordam kerak boʻlsa, bemalol aytavering, – deya birimizni aka, birimizni uka, singlim, deb dildan suhbatlashardi. Ovulimizga tez-tez kelib turardi, – eslaydi Amir Temur nomli ovulda yashovchi keksa otaxon Norboy ota Eshimbetov.

– Ovulimiz Turkmaniston davlati bilan chegaradosh, suv yoʻllaridan uzoqdaligi  uchunmi, tez-tez kelib, xalq bilan uchrashardi, – xotirlaydi Norgul momo. – Har kelganlarida bemor odamlarning uylariga  borib, hol-ahvol soʻrashar, bayramlarda sovgʻa-salomlar bilan ahvolidan xabar olib turardi. Uni Amir Temurliklar juda yaxshi koʻrishardi.

Norgul momo umr yoʻldoshi Amat ota Otajonovning  koʻp yillar toʻshak tortib yotib qolgani haqida gapirarkan:

– Amat otang juda fidoyi, mehnatkash inson edi. Shundanmi, Rajabboy Yoʻldoshev tez-tez uyimizga kelib, holidan xabar olib turardi, – deydi minnatdorchilik bilan. – Oʻzining ming tashvishi boʻlsayam, mehnat qilgan odamni juda qadrlardi.

Norgul momo bilan Amat boboning umri paxtachilikka egiz. Butun oila aʼzolari bilan paxta dalasida mehnat qilishgan. Dugonasi Maryam momoning oʻn farzandi bor edi. U paytlarda farzand bahona boʻlmagan. Bolalarini dala boshida qoʻyib, paxta terishgan momolar. Rajabboy Yoʻldoshev Amir Temur ovulidagi Qoʻshmon brigadir Bobojonov, Rajab brigadir Allaboyevlarni juda hurmat qilar, tez-tez ularning paxta dalalarida boʻlib, ishlari bilan yaqindan tanishardi. Shundanmi, ovul ahli Rajabboy Yoʻldoshevning yaxshi xislatlari haqida hurmat bilan soʻzlaydilar.

Chunki yaxshilikning, ezgulikning  umri uzun boʻladi va uni aslo xalq unutmaydi.

Zuhra Ahmedova.