Beruniy, Olmazor, Gulzor mahallalaridagi shoxkoʻchalarga 9 km uzunlikdagi piyodalar yoʻlakchasi va salomatlik yoʻlkachalari qurilmoqda

Kundan-kunga tobora chiroy ochib borayotgan mustaqil yurtimizda bunyodkorlik ishlari jadal surʼatlarda davom etmoqda. Keng va ravon yoʻllar, obod koʻchalarni kezgan har qanday inson tinchlik, mustaqillik kabi bebaho tuygʻularning naqadar aziz ekanligini dildan chuqur his qiladi

Yurtboshimiz Shavkat Mirziyov olib borayotgan odilona siyosat tufayli bugun xalqimiz oʻtayotgan har bir kunidan rozi va ertangi kunga ishonch bilan yashamoqda. Bugun qaysi bir manzilga bormang, u yerda yangilanish va bunyodkorlikning guvohi boʻlasiz.

 Jumladan, Respublikamizning barcha hududlaridagi singari, Amudaryo tumanida ham keng koʻlamli qurilish va obodonlashtirish ishlari olib borilmoqda.

Tumanning markaziy hududlaridan Beruniy, Olmazor, Gulzor mahallalaridagi shoxkoʻchalarga 9 km uzunlikdagi piyodalar yoʻlakchasi va salomatlik yoʻlkachalari qurilmoqda.

Erta tongdan ishga, oʻqishga yoki turli oilaviy tashvishlari bilan turli manzillarga yoʻl olayotgan amudaryolik borki, bunyodkorlik ishlarini koʻrib quvonadi, yurtimizda hukm surayotgan osoyishtalik va tinchlikka shukrona keltiradi.

 2 mlrd 348 mln. soʻm mablagʻ evaziga Barkamol avlod, Jumurtov, Tadbirkorlar, Shifokorlar va Xalqlar doʻstligi koʻchalarida tashkil etilayotgan salomatlik yoʻlakchalarining qurilishi pudratchi tashkilot − “Amudaryo maxsus qurilish” masʼuliyati cheklangan jamiyati tomonidan amalga oshirilib, bugungi kunga qadar, 337,9 mln. soʻmlik qurilish-taʼmirlash ishlari yakuniga yetkazildi.

Qolaversa, Barkamol avlod, Humoyun koʻchalariga ham tungi yoritgich chiroqlari, velosiped yoʻlaklarining qoʻrilayotgani aholi uchun koʻplab qulaylik va imkoniyatlar yaratmoqda.

7 mlrd. 113,3 mln. soʻmlik qiymatga ega mazkur qurilish loyihalari bugungi kunda pudratchi tashkilotlar tomonidan sifatli hamda tezkor ravishda amalga oshirilmoqda.

Tungi yoritgich chiroqlarining oʻrnatilgani koʻchalarni kunduz kabi yoritib turishi bilan birga, oʻzgacha chiroy baxsh etmoqda. Qolaversa, keksalarimizning keng va ravon yoʻllardan, yorugʻ koʻchalardan yurib, qiynalmay manzillariga yetib borishlarida amalga oshirilayotgan qurilish ishlarinig oʻrni katta ahamiyatga ega.

Shuningdek, velosiped yoʻlaklari, tungi yoritgich chiroqlarinig oʻrnatilgani yoʻl-transport hodisalarining oldini olishda, bolalar havfsizligini taʼminlashda muhim ahamiyat kasb etadi.

Yurtimizda, xususan tumanimizda amalga oshirilayotgan islohotlar zamirida avvalo, tinchlik, yurtoshlarimizning oʻtayotgan har bir kuniga shukronalik tuygʻulari mujassam.

 Qurilayotgan yangi maktab binolari, taʼmirlanayotgan yoʻllar, yangidan barpo etilayotgan uy-joylarning mustaqillik bayrami arafasida qurib bitkazilishi ishonamizki, xalqimiz uchun bayramona sovgʻa boʻladi.

Tuman hokimligining Axborot xizmati.