Собиқ Афғон уруши жангчилари ҳолидан хабар олинди

Ўтган асрнинг охирларида Афғонистонда 20 йилдан ортиқ вақт давом этган ўзаро ички уруш-низоларда собиқ иттифоқ таркибида бўлган Ўзбекистонимиздан ҳам минлаб ёш йигитлар оғир шароитларда урушга киришган.

Жумладан, Қорақалпоғистон Республикасида 2366 нафар Афғон уруши қатнашчиси бўлиб, шундан 89 нафари уруш даврида ҳалок бўлган. Афғон урушида иштирок этиб, уруш асоратлари азобларини тортиб яшаётган амударёлик йигитлар ҳам кўпчиликни ташкил қилади.

Улар ўзаро тез-тез учрашиб, бир-биридан хабар олиб туришади, яхши кунларда бир-бирини йўқлаб, дориломон кунларда яшаётганидан бирга қувонишади.

Яқинда туманнинг Оқ олтин овулида истиқомат қилувчи Мухтор Юсуповнинг хонадонига Ўзбекистон “Ветеран” жангчи фахрий ва ногиронлар бирлашмасининг Қорақалпоғистон бўлими Амударё туманидаги вакили Баҳодир Жуманиёзов ҳамда уюшма аъзолари ташриф буюришиб, Афғон уруши қатнашчисининг ҳолидан хабар олдилар.

Қадрдонлар тўкин дастурхон атрофида ишлари, оиласи ҳақида, машъум афғон уруши хотиралари ҳақида суҳбатлашдилар. Урушда бирга иштирок этган қуролдошлари, юртимизга қайтгач, уруш асоратлари туфайли бемаврид ҳаётдан кўз юмган дўстларини эсга олдилар. Собиқ аскарлар бугунгидай осуда, тинч ҳаётда яшаётганига шукроналар айтдилар.

Меҳр-оқибат, дўст-биродарлик ришталари мустаҳкам боғланган қадрдонлар дийдори ҳар бирига олам-олам қувонч бахш этди. Бу бежиз эмас. Уларнинг афғон тупроғида инсон ақли бовар қилиши қийин бўлган қонли жангларда иштирок этиши ва эсон-омон ўз оиласи бағрига қайтиши ҳар бирини бугунгидай тинч-осойишта кунларни қадрлашга чорлайди.

Мухтор Юсупов Афғон уруши вақтида ўзи сингари қанчадан қанча ўзбек йигитларининг аянчли тақдирини кечагидек эслайди. У 1981 йил 1 апрель куни ҳарбий хизматга жунайди. У ҳамда унинг сафдошлари тўғри Нукус аэропортидан Туркамистоннинг Қизилработ деб номланган ҳудудида, ундан кейин Қозонжиқ ҳудудида жангавор тайёргарликдан ўтказилади.

Шундан сўнг, улар 1981 йилнинг 14 апрель куни Афғонистонга − рутубатли жанг майдонига жўнаб кетишади. Афғонистонда хизмат қилди ва инсон зоти чидаши қийин бўлган оғир шароитларда урушда қатнашди.

Келганидан сўнг, дастлаб калхозда ишчи сифатида ундан кейин Қоратов заводида пайвандлаш устаси бўлиб ишлайди. Муҳтор Юсупов яқиндагина нафақага чиқди. Бугунги кунда унинг 3 қиз, 1 ўғли бор. Фарзандларининг барчасини касбли-корли, уйли-жойли қилган.

Шу куни Ўзбекистон “Ветеран” жангчи фахрий ва ногиронлар бирлашмасининг Қорақалпоғистон бўлими Амударё туманидаги вакили Баҳодир Жуманиёзов ҳамда уюшма аъзолари Жумуртов шаҳарчасида яшовчи, яна бир Афғон уруши қатнашчиси Анвар Балтабаевнинг хонадонида бўлдилар.

 У ҳам бошқа сафдошлари сингари ҳарбий хизматни уруш майдонларида ўтади. Анвар Балтабаев гоҳ ердан, гоҳ осмондан самолётлар орқали ёғилаётган ўқлар, бомбалардан неча-неча сафдошлари парчаланиб кетиб ҳалок бўлганига гувоҳ бўлади. Унинг толеи кулгани шуки, ҳарбий хизмат муддатини эсон-омон ўтаб, юртимизга қайтди.

Ҳозирги кунда ўз меҳнатлари билан ўз оила қўрғонини обод этиб, умр йўлдоши, фарзандлари, келинлари, неваралари ардоғида яшаётган собиқ афғончи жангчи. У уруш асоратлари соғлиғига жиддий шикаст етказган бўлса-да, ҳеч нолимайди. Қанча дўстларининг мурдаси темир тобутларда қайтган, қанча дўстларининг ҳатто жонсиз танаси ҳам қайтмаган ўша бемақсад урушдан соғ-омон ота-онаси олдига келганидан, насибаси юртимизга қўшилганидан қувонади, тинмай шукроналар айтади.

Қуролдош дўстлар даврасида ҳам бундай ҳаётий хулосалар тез-тез тилга олинади. Бир-бирига далда беришади, соғлиқ тилашади, соғ-омонликда дийдорлашганидан хурсанд бўлишади. Юртимизда афғон уруши иштирокчиларига берилаётган эътибор, ғамхўрликлардан мамнун бўлишади.

Туман ҳокимлигининг Ахборот хизмати.