Sobiq Afgʻon urushi jangchilari holidan xabar olindi

Oʻtgan asrning oxirlarida Afgʻonistonda 20-yildan ortiq vaqt davom etgan oʻzaro ichki urush-nizolarda sobiq ittifoq tarkibida boʻlgan Oʻzbekistonimizdan ham minlab yosh yigitlar ogʻir sharoitlarda urushga kirishgan.

Jumladan, Qoraqalpogʻiston Respublikasida 2366 nafar Afgʻon urushi qatnashchisi boʻlib, shundan 89 nafari urush davrida halok boʻlgan. Afgʻon urushida ishtirok etib, urush asoratlari azoblarini tortib yashayotgan amudaryolik yigitlar ham koʻpchilikni tashkil qiladi.

Ular oʻzaro tez-tez uchrashib, bir-biridan xabar olib turishadi, yaxshi kunlarda bir-birini yoʻqlab, dorilomon kunlarda yashayotganidan birga quvonishadi.

Yaqinda tumanning Oq oltin ovulida istiqomat qiluvchi Muxtor Yusupovning xonadoniga Oʻzbekiston “Veteran” jangchi faxriy va nogironlar birlashmasining Qoraqalpogʻiston boʻlimi Amudaryo tumanidagi vakili Bahodir Jumaniyozov hamda uyushma aʼzolari tashrif buyurishib, Afgʻon urushi qatnashchisining holidan xabar oldilar.

Qadrdonlar toʻkin dasturxon atrofida ishlari, oilasi haqida, mashʼum afgʻon urushi xotiralari haqida suhbatlashdilar. Urushda birga ishtirok etgan quroldoshlari, yurtimizga qaytgach, urush asoratlari tufayli bemavrid hayotdan koʻz yumgan doʻstlarini esga oldilar. Sobiq askarlar bugungiday osuda, tinch hayotda yashayotganiga shukronalar aytdilar.

Mehr-oqibat, doʻst-birodarlik rishtalari mustahkam bogʻlangan qadrdonlar diydori har biriga olam-olam quvonch baxsh etdi. Bu bejiz emas. Ularning afgʻon tuprogʻida inson aqli bovar qilishi qiyin boʻlgan qonli janglarda ishtirok etishi va eson-omon oʻz oilasi bagʻriga qaytishi har birini bugungiday tinch-osoyishta kunlarni qadrlashga chorlaydi.

Muxtor Yusupov Afgʻon urushi vaqtida oʻzi singari qanchadan qancha oʻzbek yigitlarining ayanchli taqdirini kechagidek eslaydi. U 1981-yil 1-aprel kuni harbiy xizmatga junaydi. U hamda uning safdoshlari toʻgʻri Nukus aeroportidan Turkamistonning Qizilrabot deb nomlangan hududida, undan keyin Qozonjiq hududida jangavor tayyorgarlikdan oʻtkaziladi.

Shundan soʻng, ular 1981-yilning 14-aprel kuni Afgʻonistonga − rutubatli jang maydoniga joʻnab ketishadi. Afgʻonistonda xizmat qildi va inson zoti chidashi qiyin boʻlgan ogʻir sharoitlarda urushda qatnashdi.

Kelganidan soʻng, dastlab kalxozda ishchi sifatida undan keyin Qoratov zavodida payvandlash ustasi boʻlib ishlaydi. Muhtor Yusupov yaqindagina nafaqaga chiqdi. Bugungi kunda uning 3 qiz, 1 oʻgʻli bor. Farzandlarining barchasini kasbli-korli, uyli-joyli qilgan.

Shu kuni Oʻzbekiston “Veteran” jangchi faxriy va nogironlar birlashmasining Qoraqalpogʻiston boʻlimi Amudaryo tumanidagi vakili Bahodir Jumaniyozov hamda uyushma aʼzolari Jumurtov shaharchasida yashovchi, yana bir Afgʻon urushi qatnashchisi Anvar Baltabayevning xonadonida boʻldilar.

 U ham boshqa safdoshlari singari harbiy xizmatni urush maydonlarida oʻtadi. Anvar Baltabayev goh yerdan, goh osmondan samolyotlar orqali yogʻilayotgan oʻqlar, bombalardan necha-necha safdoshlari parchalanib ketib halok boʻlganiga guvoh boʻladi. Uning tolei kulgani shuki, harbiy xizmat muddatini eson-omon oʻtab, yurtimizga qaytdi.

Hozirgi kunda oʻz mehnatlari bilan oʻz oila qoʻrgʻonini obod etib, umr yoʻldoshi, farzandlari, kelinlari, nevaralari ardogʻida yashayotgan sobiq afgʻonchi jangchi. U urush asoratlari sogʻligʻiga jiddiy shikast yetkazgan boʻlsa-da, hech nolimaydi. Qancha doʻstlarining murdasi temir tobutlarda qaytgan, qancha doʻstlarining hatto jonsiz tanasi ham qaytmagan oʻsha bemaqsad urushdan sogʻ-omon ota-onasi oldiga kelganidan, nasibasi yurtimizga qoʻshilganidan quvonadi, tinmay shukronalar aytadi.

Quroldosh doʻstlar davrasida ham bunday hayotiy xulosalar tez-tez tilga olinadi. Bir-biriga dalda berishadi, sogʻliq tilashadi, sogʻ-omonlikda diydorlashganidan xursand boʻlishadi. Yurtimizda afgʻon urushi ishtirokchilariga berilayotgan eʼtibor, gʻamxoʻrliklardan mamnun boʻlishadi.

Tuman hokimligining Axborot xizmati.