ДЎРМАН ОВУЛИДА ЖИНОЯТ МУҲОКАМАСИГА БАҒИШЛАНГАН ЙИҒИЛИШ ЎТКАЗИЛДИ

Сўнгги йилларда мамлакатимизда жиноят ва ҳуқуқбузарликларнинг олдини олиш борасида тегишли тадбирлар белгилаб олиниб, бу борада ташкилий ишлар узлуксиз равишда амалга оширилмоқда. Шунга қарамасдан, ҳудудларда арзимаган сабабларга кўра ҳуқуқбузарлик ва жиноятлар содир этилиши учрамоқда.

Шу йил 1 февраль куни Амударё туманининг Дўрман овулида бир неча кун илгари ҳудудда содир этилган, инсон ўлимига олиб келган жиноят муҳокамасига бағишланган йиғилиш ўтказилди. Йиғилишда Қорақалпоғистон Республикаси Ички ишлар вазири Бахтиёр Торебеков, Амударё тумани прокурори Азиз Рўзметов, Ички ишлар бўлими бошлиғи, подполковник Жамоладдин Юсупов ҳамда профилактика инспекторлари, тегишли ташкилотлар раҳбарлари қатнашишди. Шунингдек, фуқаролар йиғини раиси ва масъуллари, ҳудуд фаоллари ҳам иштирок этишди.

Йиғилишни Амударё тумани прокурори, 2-сектор раҳбари Азиз Рўзметов очиб берди ва кун тартибидаги масала билан таништирди.

Йиғилиш давомида берилган маълумотларга кўра, шу ҳудудда яшовчи аёл қўшниси билан билан уйи ёнидаги томорқа ери бўйича ўзаро жанжаллашган. Жанжал пайтида аёлни қўшни эркак уриб, дўппослаётганига аёлнинг 20 ёшдан ўтган қизи гувоҳ бўлган. Қиз ошхона пичоғи билан эркакнинг қорин қисми ва кўкрак қисмига 2 маротаба пичоқ билан қасддан уриб, оғир тан жароҳатини етказган. Тан жароҳат билан шифохонага келтирилган қўшни эркакка тиббий ёрдам кўрсатилган. Шунга қарамасдан, жароҳат оғир бўлгани сабабли эркак вафот этган. Ушбу ҳолат бўйича Амударё тумани прокуратураси томонидан Ўзбекистон Республикаси Жиноят Кодексининг 97-моддаси 1-қисмига кўра жиноят иши қўзғатилган.

Йиғилишда сўзга чиққан Қорақалпоғистон Республикаси Ички ишлар вазири Бахтиёр Торебеков ушбу қотиллик жинояти жуда мудҳиш ҳодиса эканлиги, бир парча ер устида икки ён қўшни ўртасида чиққан жанжал бирининг бу дунёни тарк этишига, бирининг озодликдан маҳрум этилишига сабаб бўлишини айтиб, бунга маҳалла фаоллари ва профилактика инспекторларининг ҳамкорликдаги ишлари тўғри йўлга қўйилмагани ҳам сабаб бўлганини таъкидлади.

Масъулларнинг аҳоли тинчлигига бефарқ бўлгани, сабаби бу оила кўп йиллардан буён бир парча ер устида талашиб, низолари ҳал этилмасдан келгани, бу икки оила можароси қотиллик жинояти билан тугаганини гапириб, келгусида бу каби жиноятларнинг олдини олиш бўйича янада кенг қамровли чора-тадбир белгилаб олиш зарурлигини уқтириб ўтди.

Туман Ички ишлар бўлими бошлиғи Жамоладдин Юсупов ҳам ҳодисанинг келиб чиқиши ўрганилганида бу икки оила ўртасида 2005 йилдан буён ер-жой, хонадонлар чегара ҳудуди юзасидан бир неча маротаба ўзаро жанжаллар чиққани, сўнгги жанжалга аёлнинг хонадони олдидаги дарахт тагига тандир кули тўкиб кетилгани сабаб бўлгани, кутилмаганда бу можаро бир томоннинг ўлими билан тугагани, аммо бу ҳолат юзасидан бирор бир жойга мурожаат ёки хабар келиб тушмаганини маълум қилди.

Агарда қўни-қўшнилар ёки бошқа шахслар томонидан бу ҳақда хабар келиб тушганида, балки қотиллик жиноятининг олди олиниши мумкинлигини эътироф этди. Йиғилишда профилактика инспекторлари ҳудуд фаолларига агарда нохуш ҳодиса ёки бошқа шубҳали ҳолатлар гувоҳи бўлишса, дарҳол Ички ишлар бўлимининг навбатчилик қисмига ёки “102” қисқа рақамига хабар берилиши лозимлигини, бу билан жиноят ёки мудҳиш ҳодисанинг олдини олиш мумкинлигини аҳолига тушунтириш кераклигини айтиб ўтди.

Йиғилишда масъуллар жиноятларнинг олдини олиш бўйича иштирокчиларнинг фикр ва мулоҳазаларини, таклифларини тинглаб, атрофдаги воқеа-ҳодисаларга бефарқ бўлмасликка, доим огоҳ ва ҳушёр бўлишга чақиришди.

Шунингдек, фуқарлар йиғини масъуллари ва профилактика инспекторларига тарғибот ва ташвиқот ишларини янада кучайтирилган тартибда олиб бориш, туман ҳудудидаги барча низоли оилалар рўйхатларини шакллантирилиш, улар билан мунтазам равишда профилактик сухбатлар ўтказиш топширилди.

О.Худойберганова.