DOʻRMAN OVULIDA JINOYaT MUHOKAMASIGA BAGʻIShLANGAN YIGʻILISh OʻTKAZILDI

Soʻnggi yillarda mamlakatimizda jinoyat va huquqbuzarliklarning oldini olish borasida tegishli tadbirlar belgilab olinib, bu borada tashkiliy ishlar uzluksiz ravishda amalga oshirilmoqda. Shunga qaramasdan, hududlarda arzimagan sabablarga koʻra huquqbuzarlik va jinoyatlar sodir etilishi uchramoqda.

Shu yil 1-fevral kuni Amudaryo tumanining Doʻrman ovulida bir necha kun ilgari hududda sodir etilgan, inson oʻlimiga olib kelgan jinoyat muhokamasiga bagʻishlangan yigʻilish oʻtkazildi. Yigʻilishda Qoraqalpogʻiston Respublikasi Ichki ishlar vaziri Baxtiyor Torebekov, Amudaryo tumani prokurori Aziz Roʻzmetov, Ichki ishlar boʻlimi boshligʻi, podpolkovnik Jamoladdin Yusupov hamda profilaktika inspektorlari, tegishli tashkilotlar rahbarlari qatnashishdi. Shuningdek, fuqarolar yigʻini raisi va masʼullari, hudud faollari ham ishtirok etishdi.

Yigʻilishni Amudaryo tumani prokurori, 2-sektor rahbari Aziz Roʻzmetov ochib berdi va kun tartibidagi masala bilan tanishtirdi.

Yigʻilish davomida berilgan maʼlumotlarga koʻra, shu hududda yashovchi ayol qoʻshnisi bilan bilan uyi yonidagi tomorqa yeri boʻyicha oʻzaro janjallashgan. Janjal paytida ayolni qoʻshni erkak urib, doʻpposlayotganiga ayolning 20 yoshdan oʻtgan qizi guvoh boʻlgan. Qiz oshxona pichogʻi bilan erkakning qorin qismi va koʻkrak qismiga 2 marotaba pichoq bilan qasddan urib, ogʻir tan jarohatini yetkazgan. Tan jarohat bilan shifoxonaga keltirilgan qoʻshni erkakka tibbiy yordam koʻrsatilgan. Shunga qaramasdan, jarohat ogʻir boʻlgani sababli erkak vafot etgan. Ushbu holat boʻyicha Amudaryo tumani prokuraturasi tomonidan Oʻzbekiston Respublikasi Jinoyat Kodeksining 97-moddasi 1-qismiga koʻra jinoyat ishi qoʻzgʻatilgan.

Yigʻilishda soʻzga chiqqan Qoraqalpogʻiston Respublikasi Ichki ishlar vaziri Baxtiyor Torebekov ushbu qotillik jinoyati juda mudhish hodisa ekanligi, bir parcha yer ustida ikki yon qoʻshni oʻrtasida chiqqan janjal birining bu dunyoni tark etishiga, birining ozodlikdan mahrum etilishiga sabab boʻlishini aytib, bunga mahalla faollari va profilaktika inspektorlarining hamkorlikdagi ishlari toʻgʻri yoʻlga qoʻyilmagani ham sabab boʻlganini taʼkidladi.

Masʼullarning aholi tinchligiga befarq boʻlgani, sababi bu oila koʻp yillardan buyon bir parcha yer ustida talashib, nizolari hal etilmasdan kelgani, bu ikki oila mojarosi qotillik jinoyati bilan tugaganini gapirib, kelgusida bu kabi jinoyatlarning oldini olish boʻyicha yanada keng qamrovli chora-tadbir belgilab olish zarurligini uqtirib oʻtdi.

Tuman Ichki ishlar boʻlimi boshligʻi Jamoladdin Yusupov ham hodisaning kelib chiqishi oʻrganilganida bu ikki oila oʻrtasida 2005-yildan buyon yer-joy, xonadonlar chegara hududi yuzasidan bir necha marotaba oʻzaro janjallar chiqqani, soʻnggi janjalga ayolning xonadoni oldidagi daraxt tagiga tandir kuli toʻkib ketilgani sabab boʻlgani, kutilmaganda bu mojaro bir tomonning oʻlimi bilan tugagani, ammo bu holat yuzasidan biror bir joyga murojaat yoki xabar kelib tushmaganini maʼlum qildi.

Agarda qoʻni-qoʻshnilar yoki boshqa shaxslar tomonidan bu haqda xabar kelib tushganida, balki qotillik jinoyatining oldi olinishi mumkinligini eʼtirof etdi. Yigʻilishda profilaktika inspektorlari hudud faollariga agarda noxush hodisa yoki boshqa shubhali holatlar guvohi boʻlishsa, darhol Ichki ishlar boʻlimining navbatchilik qismiga yoki “102” qisqa raqamiga xabar berilishi lozimligini, bu bilan jinoyat yoki mudhish hodisaning oldini olish mumkinligini aholiga tushuntirish kerakligini aytib oʻtdi.

Yigʻilishda masʼullar jinoyatlarning oldini olish boʻyicha ishtirokchilarning fikr va mulohazalarini, takliflarini tinglab, atrofdagi voqea-hodisalarga befarq boʻlmaslikka, doim ogoh va hushyor boʻlishga chaqirishdi.

Shuningdek, fuqarlar yigʻini masʼullari va profilaktika inspektorlariga targʻibot va tashviqot ishlarini yanada kuchaytirilgan tartibda olib borish, tuman hududidagi barcha nizoli oilalar roʻyxatlarini shakllantirilish, ular bilan muntazam ravishda profilaktik suxbatlar oʻtkazish topshirildi.

O.Xudoyberganova.