БЮДЖЕТ МАБЛАҒЛАРИ МАҚСАДЛИ ВА ХАЛҚ ФАРОВОНЛИГИ ЙЎЛИДА САРФЛАНАДИ

2023 йил учун Амударё тумани Маҳаллий бюджетининг даромадлари 77.5 млрд. сўм, юқори бюджетдан ажратиладиган трансферт миқдори 165.4 млрд.  сўмни ташкил этмоқда ва жами харажатлари 242.9 млрд. сўм миқдорида прогноз қилинмоқда.

Маҳаллий бюджетнинг даромадлари 44 млрд, сўм бўлиб, юқори бюджетдан қуйи бюджетга тақсимланувчи даромадлар 33,5 млрд. сўм, жами даромадлар 77,5 млрд. сўмни ташкил қилмоқда.

Шунингдек, Амударё туманига республика бюджетлари ўртасида тақсимланадиган даромадлар 13.2 млрд. сўм, юқори бюджетдан қуйи бюджетга тақсимланувчи даромадлар эса 33,5 млрд. сўмни ташкил қилмоқда.

2023 йилги туман бюджети лойиҳасида маданият ва спорт соҳаси харажатлари 6.4 млрд. сўмни, ижтимоий нафақалар, кам таъминланган оилаларга моддий ёрдам ва компенсация тўловлари харажатлари 100.7 млрд. сўмни ташкил этмоқда.

Иқтисодиёт харажатларига 2023 йилда туман бюджетидан 26.6 млрд. сўм ажратиш таклиф этилмоқда.

2023 йилда Сув хўжалиги вазирлиги тизимидаги сув хўжалиги ташкилотларини сақлаш учун 4.6 млрд. сўм, ободонлаштириш ишларига 14.7 млрд. сўм маблағ йўналтириш назарда тутилган. Бундан ташқари, ветеринария қўмитаси ташкилотларини сақлаш харажатлари учун 1.6 млрд. сўм, фермер, деҳқон хўжаликлари ва томорқа ер эгалари Кенгаши харажатларига 1.04 млрд. сўм, хоким ёрдамчилари инфраструктурасини яхшилаш учун 1.6 млрд. сўм, давлат бошқарув органлари харажатларига 20.1 млрд. сўм, ижтимоий кўникма марказлари учун 0.09 млрд. сўм маблағ ажратилиши кўзда тутилган.

Фуқароларнинг ўзини ўзи бошқариш органлари харажатлари 2023 йилда 8.4 млрд. сўмни ташкил этмоқда.

Президентимизнинг 2021 йил 13 апрелдаги «Бюджет жараёнида фуқароларнинг фаол иштирокини таъминлаш бўйича қўшимча чора-тадбирлар тўғрисида»ги тегишли Қарорига мувофиқ бюджет харажатларининг 5 фоизини жамоатчилик фикри асосида белгиланган тадбирларни молиялаштиришга йўналтириш тартиби босқичма-босқич жорий этилиши белгиланганлиги муносабати билан “Фуқаролар учун бюджет” ва “Фуқаролар ташаббуси” жамғармалари босқичма-босқич молиялаштирилади ва заҳира жамғармаси маблағлари 2.3 млрд. сўмдан ортиқни ташкил қилади.

Қонун лойиҳасининг алоҳида боби бюджет жараёнининг шаффофлигини оширишга йўналтирилган. Қонунда бюджет жараёнининг барча иштирокчиларига бюджет маблағларидан фойдаланишда шаффофликни ва очиқликни  таъминлаш талаби қўйилмоқда.

2023 йилда солиқ-бюджет сиёсатини такомиллаштириш бўйича таклифлар ва туман бюджети лойиҳаси маъқулланган тақдирда, “2023 йил учун Қорақалпоғистон Республикаси Амударё тумани маҳаллий бюджети тўғрисида”ги қарор лойиҳасида маҳаллий даромадлари 77.5 млрд. сўм, трансферт 165.4 млрд. сўм, харажатлари эса 242.9 млрд. сўм прогноз қилинмоқда.

Шуни алоҳида таъкидлашни истардимки, бюджет  маблағлари мақсадли ва халқ фаровонлигини ошириш, турмуш шароитини замон талаблари даражасига етказиш, туманимизни ижтимоий-иқтисодий ривожлантириш учун сарфланади.

У.Бекниязов, туман Молия бўлими мудири.