“Коррупцияга қарши курашишнинг самарали усуллари” мавзусида йиғилиш бўлиб ўтди

Коррупция – бу жамиятнининг ривожига салбий таъсир кўрсатувчи хавфли жиноят ҳисобланади. Мазкур иллат демократия ва ҳуқуқ устуворлиги асосларига путур етказибгина қолмасдан, инсон ҳуқуқлари бузилишига олиб келади, бозорлар фаолиятига тўсқинлик қилади, ҳаёт сифатини ёмонлаштиради ва одамлар хавфсизлигига таҳдид соладиган уюшган жиноятчилик ва бошқа ҳодисаларнинг илдиз отишига шароит яратиб беради.

Таъкидлаб ўтиш ўринлики, ушбу иллат дунёнинг барча мамлакатларида учрайди. Уни бартараф этиш бўйича жаҳон ҳамжамияти томонидан бир қатор самарали ишлар амалга оширилмоқда. Шу жумладан, мамалакатимизда ҳам мазкур жиноятнинг олдини олиш мақсадида бир қатор қонун ва қонуности ҳужжатлари қабул қилинган бўлиб, кейинги йилларда коррупцияга қарши курашишнинг самарали меҳанизмлари ишлаб чиқилди ва кескин камайишига эришилди.

25 ноябрь куни Амударё тумани Давлат хизматлари марказида “Коррупцияга қарши курашиш усуллари” мавзусида йиғилиш бўлиб ўтди. Йиғилишда туман ҳокимининг ўринбосари – Оила ва хотин-қизлар бўлими бошлиғи Гўзал Сабурова, фуқаролик ҳолати далолатномаларини ёзиш бўлими мудираси Санобар Холбоева, Юридик хизмат кўрсатиш маркази бошлиғи Нилуфар Жуманиёзова, туман прокурори ёрдамчиси Аббаз Ниязимбетов, Ички ишлар бўлимининг хотин-қизлар масалалари бўйича катта инспектори Инобат Ўразматова ҳамда маҳаллаларда фаолият юритаётган хотин-қизлар фаоллари, кенг жамоатчилик вакиллари иштирок этишди.

Йиғилишда туман фуқаролик ҳолати далолатномаларини ёзиш бўлими мудираси Санобар Холбоева коррупцияни юзага келтирувчи омиллар сифатида аҳолининг ҳуқуқий саводхонлиги пастлиги, мамлакатда диний ва ахлоқ қоидаларининг бузулиши, инфляциянинг юқори даражаси, давлат секторидаги хизмат қилаётган хизматчилар даромадларининг хусусий секторда топиш мумкин бўлган даромадлардан камлиги ва шу каби бошқа сабаблар эканлигини айтиб ўтди.

Туман Юридик хизмат кўрсатиш маркази бошлиғи Нилуфар Жуманиёзова эса коррупцияга қарши курашишнинг самарали усуллари ҳақида гапирди. Келтирилишича, ички ва ташқи назоратни кучайтириш ва сайлов тизими орқали курашиш жаҳон мамлакатларида тан олинган усул сифатида қаралади.

Бошқарув аппаратининг ўзида ички назорат тузилмалари ташкил этилиб, ушбу тузилма аъзолари ходимларнинг этикет қоидаларига риоя қилишларини назорат қилиб борса, мазкур иллатнинг сезиларли даражада камайишига эришилади.

Шундан сўнг, Ички ишлар бўлимининг хотин-қизлар масалалари бўйича катта инспектори Инобат Ўразматова тумандаги ҳар бир корхона, ташкилот, муассаса раҳбарлари, ходимларининг ўз хизмат вазифаларини бажаришда ҳар қандай моддий қийматга эга “ҳадя”ларнинг берилишига, олишига ёки уларнинг хизмат вазифаларини бажариши муносабати билан бошқа имтиёзлар таклиф қилинишга қарши самарали тарза курашилаётганлиги, шунингдек, ушбу иллатга қарши курашишда ходимлар орасида қатъий фуқаролик позициясини шакллантириш мақсадида турли ижтимоий тадбирлар, спорт мусобақалари ва танловлар ўтказилиб келинаётганлигини таъкидлади.

Туман прокурори ёрдамчиси Аббаз Ниязимбетов фақатгина пора олган киши коррупционер эмаслигини, балки пора таклиф қилган ва берган шахс ҳам жиноятчи бўлишини айтиб, жиноятга жазо муқаррар эканлигини таъкидлаб ўтди.

Туман ҳокими ўринбосари Гўзал Сабурова хотин-қизлар фаолларига ўз хизмат вазифаларини сидқидилдан ва виждонан бажаришларини, иш жараёнини ҳолислик ва шаффофлик тамойиллари асосида самарали усулда ташкил этишлари лозимлигини айтиб мурожаат қилди.

Шунингдек, коррупцивий ҳолатларнинг олдини олишда барча бирдек ҳаракат қилиши лозимлигини бу эса жамият ривожида ниҳоятда муҳим аҳамият касб этишини таъкидлади.

Дарҳақиқат, баъзи фуқароларнинг қонунларга эътиборсизлиги, бефарқлиги, ҳар бир ишни пул орқали ҳал қилиш мумкин деган фикри унинг фарзандлари ва оиласи олдида, яшаб турган жойидаги ҳамқишлоқлари орасида юзини ерга қаратади. Шундай экан ушбу иллатдан барчамиз йироқда бўлайлик!

Туман ҳокимлигининг Ахборот хизмати.