ФАВҚУЛОДДА ВАЗИЯТЛАРНИНГ ОЛДИНИ ОЛИШГА БАҒИШЛАНГАН ЙИҒИЛИШ ЎТКАЗИЛДИ

Жорий йилнинг 14 ноябрь санасида Амударё туман ҳокимлиги биносида Фавқулодда вазиятларнинг олдини олишга бағишланган йиғилиш бўлиб ўтди.

Йиғилишда Фавқулодда вазиятларнинг олдини олиш ва уларни бартараф этиш бўйича ҳудудий комиссияси аъзолари, кун тартибидаги масалаларга алоқадор идоралар, корхона ҳамда ташкилотларнинг раҳбарлари, туман ҳокимининг ўринбосари Нодирбек Камолов, туман Фавқулодда вазиятлар бўлими бошлиғи ўринбосари Саломат Бердекеев, бўлинма бошлиғи Беҳзод Тожибоевлар, шунингдек соҳага алоқадор ташкилотларнинг масъул мутахассислари иштирок этишди.

 Йиғилишда Фавқулодда вазиятларнинг олдини олиш ва уларни бартараф этиш бўйича Ҳукумат комиссиясининг 2022 йил 10 ноябрдаги 49-сонли баёни ва Қорақалпоғистон Республикаси Вазирлар Кенгашининг 11 ноябрдаги 596-сонли баёни ижросини таъминлаш, шунингдек, 2022 йил 15 ноябрдан 15 декабргача “Ёнғин хавфсизлиги ойлиги”ни ўтказиш ҳақидаги масала муҳокама этилди.

Соҳада амалга оширилган чора-тадбирлар натижасида туманда 2022 йилнинг ўтган даври мобайнида иқтисодиёт тармоқлари, ижтимоий соҳа объектлари ҳамда уй-жой фондида ёнғин хавфсизлигини таъминлаш борасида қатор тизимли ишлар амалга оширилди.

Жумладан, ёнғинларнинг олдини олиш йўналишида рўйҳатга олинган объектларда режали ва назорат тартибидаги текширишлар, тадбиркорлик субъектларига тегишли объектларда ёнғинга қарши профилактика кўриклари ўтказилди. Якка тартибдаги уй-жойлар, кўп хонадонли уйларнинг ёнғинга қарши ҳолати текширилди. Ёнғин хавфсизлигини тарғиб қилиш бўйича фуқаролар билан суҳбатлар ўтказилиб, йўл-йўриқлар берилди.

Амалга оширилган ижобий ишларга қарамасдан жорий йилнинг 10 ойи давомида туманнинг турли ҳудудларида 43 та ёнғин содир бўлиб, ёнғин оқибатида куйиш ва тан жароҳати олганлар, ўлим ҳолатлари бўлмаса-да, Бойовул, Торёп ва Ўзбекистон маҳаллаларида ҳамда Жумуртов шаҳарчаси, Куюк кўпир, Қиличбой, Қипчоқ овулларида ёнғин содир бўлиш ҳолатлари кўпайган.

Таҳлилларга кўра, ёнғинларнинг 81 фоизи аҳоли турар жойларида содир бўлган ҳамда аксарияти табиий газга мўлжалланган ҳамда электр иситиш жиҳозларидан нотўғри фойдаланиш оқибатида юз берган.

Йиғилишда масъуллар томонидан жойлардаги ёнғинлар бўйича мавжуд ҳолатни инобатга олиб, айрим фавқулодда вазиятларнинг олдини олиш ва уларни бартараф этиш бўйича ҳудудий комиссиялари томонидан иқтисодиёт тармоқлари ва ижтимоий соҳа объектлари ҳамда уй-жой фондида ёнғинларнинг олдини олиш масалаларига етарли эътибор қаратилмаётганлиги таъкидлаб ўтилди.

Шунингдек, йиғилишда ёнғинларнинг олдини олиш соҳасида амалга оширилаётган чора-тадбирлар юзасидан мутасадди идоралар раҳбарларининг ҳисоботлари ҳам тингланди, долзарб муаммолар ва йўл қўйилаётган камчиликлар батафсил таҳлил ва муҳокама қилинди.

Йиғилиш якунида белгиланган топшириқлар ижросини таъминлаш, иқтисодиёт тармоқлари ва ижтимоий соҳа объектлари ҳамда уй-жой фондида ёнғинларнинг олдини олиш, шунингдек, ушбу соҳада мавжуд муаммоларни бартараф этиш мақсадида, ҳудудий комиссия томонидан туман ҳудудида 2022 йил 15 ноябрдан 15 декабргача “Ёнғин хавфсизлиги ойлиги”ни ўтказиш тўғрисида қарор қабул қилиниб, мазкур ойликни ташкил этиш ва самарали ўтказиш бўйича ҳудудий комиссияси таркиби ва амалга ошириладиган чора-тадбирлар режаси тасдиқлаб олинди.

Робия ЙЎЛДОШЕВА.