САНЪАТГА ОШУФТА СЕВИНЧОЙ

Ёшлик – инсон ҳаётининг жўшқин орзулар фасли. Шу боис, инсон умрининг ана шу фаслида бири-биридан гўзал орзулар оғушида яшайди, ўзининг  ҳаёт йўлини ҳам қалбини жунбушга келтирган бетакрор орзу-умидлари рўёби учун интилишлар, изланишлар аро боғлайди. Бу йўлда сабр-матонат, билим ва салоҳият соҳиблари чинакам муваффақиятга эришадилар.

69-сонли мактабнинг 11-синф ўқувчиси Севинчой Бектурсунова, агар таъбир жоиз бўлса, ана шундай кучли билим ва салоҳиятли, ўз орзулари йўлида матонат билан олға интилишдан тўхтамайдиган қиз. У мактабда умумтаълим фанларини пухта ўзлаштириш билан  бирга, болалигидан санъатга қизиқиши туфайли анъанавий ва эстрада йўналишларида қўшиқлар куйлайди. Нафис санъат тури – ранг-тасвир йўналишида суратлар чизади, спорт билан мунтазам шуғулланади.

У илк марта мактаб саҳнасида ашула айтганида 10 яшар қизалоқ эди. Янги йил тадбирида жарангдор овози билан байрам кечасига файз киритган Севинчойни  ўшанда бутун мактабдошлари, устозлари меҳр билан олқишлашганди.

Шу кундан бошлаб, у дарсдан бўш вақтларида мактабда ташкил этилган мусиқа  ва ашула тўгарагининг фаол аъзосига айланди.

Севинчой улғайган сари унинг санъатга бўлган иштиёқи чинакам орзуга айланди. У ўзининг ширали, жарангдор овози билан 69-сонли мактаб саҳнасидан туман ва Республика миқёсидаги санъат давраларига кириб бориб, санъатсевар халқимизни она Ватан, тинчлик ва дўстлик мавзуларидаги ашулалари билан баҳраманд этди. Турли хил кўрик-танловлар ғолиби, давлат тадбирларининг  фаол иштирокчисига айланди. Ўзининг тиришқоқлиги ва интилувчанлиги билан умумтаълим мактабининг 9-синфини имтиёзли тугатди. Қиличбой Маданият маркази ҳузуридаги “Жайҳун” хор жамоасининг етакчи солисти сифатида тенгдошларига ҳамиша ибрат. 2021 йилда мазкур хор жамоаси Қорақалпоғистон Республикаси миқёсида ўтказилган Маданият марказлари хор жамоалари ўртасидаги кўрик-танловда фахрли 1-ўринни эгаллади. Жамоанинг бу ютуғида етакчи солист сифатида, албатта, Севинчой Бектурсунованинг ҳиссаси катта.

Серқирра иқтидор соҳибаси С.Бектурсунова эстрада хонандалиги ва анъанавий ижрочилик йўналиши бўйича "5 та муҳим ташаббус" доирасида ўтказилган “Ёшлар овози” Республика кўрик-танловининг анъанавий ижрочилик йўналишида маҳалла ва секторлар бўйича босқичларида фахрли 1-ўринни, мазкур кўрик-танловнинг туман босқичида эса 2-ўринни эгаллади.

Севинчой келажакда ким бўлишидан қатъий назар, бир умр санъатга ошно яшаш, ўз ашулалари, гўзал рақслари билан халқимиз қалбига қувонч ва жўшқин кайфият бағишлаш орзусида. Орзу эса инсоннинг абадий ҳамроҳи, уни эзгуликлар сари руҳлантириб турувчи куч. Биз Севинчойга ўз орзуларига эришиш йўлида толмас куч, билим ва салоҳият тилаймиз.

Робия ЙЎЛДОШЕВА.