ПАРВОЗИНГ БАЛАНД БЎЛСИН, СЕВИНЧОЙ!

Иқтидорли, илмли ва интилувчан ёшлар нафақат оиласининг, балки, юртимизнинг ҳам фахридир. Чунки Ватанимиз келажаги, халқимиз тақдири ёшлар қўлида.

Шунинг учун ҳам мамлакатимиз умумий ўрта таълим мактабларида педагоглар жамоаси олдига қўйиладиган асосий талаб – ўқувчиларга билим асосларини чуқур ўргатиш, иқтидорли ўқувчиларни аниқлаш, иқтидорини қизиқиши юқори йўналишда ривожлантиришга кўмаклашиш, уни юзага чиқариши учун шарт-шароит яратишдир.

Шунингдек, таълим муассасаларида ёшларни мустақил фикрлашга ўргатиш, бўш вақтларини мазмунли ташкил этиш лозим. Уларнинг бирор касб-ҳунарни ё мутахассисликни эгаллаши учун пойдевор яратиш, иқтидорли ўқувчиларни рағбатлантириб, уларни яна ҳам ўз устида ишлашга, интилишга жалб этмоқ лозим.

Амударё туманидаги умумий ўрта таълим мактабларида ҳам ана шундай улуғвор мақсад масъулият билан адо этилаётгани боис, уларда кўпгина иқтидорли ўқувчилар камолга етмоқда.

Жорий ўқув йилида тумандаги умумий ўрта таълим мактабларини битирган 2704 нафар ёшларнинг 36 нафари олтин, 11 нафари кумуш медаллар билан таълим муассасасини тугатиб, қизил аттестат олишга эришдилар.

Манғит шаҳрида фаолият юритаётган 16-сонли мактабнинг битирувчиси Рустамбекова Севинч Нурбек қизи ҳам умумий ўрта таълимни олтин медаль билан тугатиб, нафақат оиласи, устозларининг ҳам фахрига айланди.

2005 йилда туғилган Севинч Рустамбекова биринчи синфга илк қадам қўйган давриданоқ дарс машғулотларини ҳеч қийналмай ўзлаштириши, намунали хулқи билан ажралиб турарди. Юқори синфларга кўтарилганида унинг айниқса хорижий – инглиз тилини билишга, ўрганишга қизиқиши юқори эканини сезган устози Марҳабо Шомуродова у билан жиддий шуғулланди, дарсдан бўш вақтларида мутолаа қилиб билимини ошириши учун қўшимча адабиётлар берди.

Мактабда устозлар саъй-ҳаракатига оиласидаги унинг таълим-тарбиясига берилган эътибор Севинчойнинг инглиз тилини мукаммал ўрганишига асос бўлди. Мазкур мактабда узоқ йиллар математика ўқитувчиси бўлиб ишлаган бувиси Ўғилжон Султонова, ота-онаси унинг дарсдан сўнг ўқув марказига қатнаб, инглиз тилини чуқур ўрганишига ғамхўрлик қилдилар ва натижада Севинчой IELTS сертификати учун инглиз тилидан имтиҳон топшириб, 7 балл, она тилидан билим даражасини аниқлашда эса 84 балл тўплашга эришиб, миллий сертификат олишга эришди.

Севинчой ўзи ўқувчи бўлатуриб, “ICEBERG” ўқув марказида ўзи каби инглиз тилини билишга қизиқувчи ёшларга инглиз тилидан дарс ҳам берди.

Мактабни муваффақиятли, олтин медаль билан тугатиб, инглиз тилини юқори даражада ўзлаштирган қиз ҳозирги кунда еттита хорижий олийгоҳларга грант асосида талабаликка қабул қилиниш ҳуқуқини қўлга киритди. Бироқ у ўз келажагини анча олдин режалаштириб қўйган эди. Яъни ота-онаси, бувиси тавсиясига кўра, Тошкентдаги Жаҳон тиллари университетида ўқиб, етук инглиз тили мутахассиси бўлиш ва туманимиз ёшларининг инглиз тили билимдони бўлишларига кўмаклашиш учун замонавий шароитларда фаолият юритадиган ўқув марказини ташкил этиш.

Орзулар қанотида келажаги сари парвозга дадил шайланаётган Севинч Рустамбековага келгусида муваффақиятлар ёр бўлишини тилаб қоламиз.

Ойгул РАЖАБОВА.