СУД МАСЪУЛЛАРИ ТОМОНИДАН ҲУҚУҚИЙ ЁРДАМГА МУҲТОЖ АЁЛ-ҚИЗЛАР УЧУН САЙЁР ҚАБУЛ ТАШКИЛ ЭТИЛДИ

Мамлакатимизда “Аёллар дафтари”га киритилган хотин-қизларга ҳуқуқий ёрдам кўрсатиш ва маслаҳатлар бериш, ҳуқуқий маданиятини ошириш борасида суд-ҳуқуқ соҳаси масъулларига қатор вазифалар юклатилган. Шунга кўра Қорақалпоғистон Республикасида ҳам “Аёллар дафтарига” киритилган ҳуқуқий ёрдамга муҳтож хотин-қизларга кўмак бериш юзасидан мўлжалланган чора-тадбирлар режаси белгиланган бўлиб, ундаги вазифалар ижроси бўйича Республика суди раиси томонидан ҳудудларда маҳаллабай сайёр қабуллар ташкил этилмоқда.

Шу йил 27 сентябрь куни Амударё туманидаги Маҳалла ва нуронийларни қўллаб қувватлаш бўлими маъмурий биносида “Аёллар дафтари”га киритилган ёрдамга муҳтож хотин-қизларга ҳуқуқий ёрдам кўрсатиш мақсадида суд масъуллари томонидан сайёр қабул ўтказилди. Унда Жиноят ишлари бўйича Амударё туман суди раиси Жасурбек Ўразбоев, Фуқаролик ишлари бўйича Амударё туман суди раиси Қайрулла Атамурадов, Беруний туманлараро Иқтисодий ишлари бўйича суди судьялари Байрам Бекмурадов ва Қуваниш Хожамурадов ҳамда хотин-қизлар масалалари бўйича ҳоким ўринбосари Гўзал Собирова, шаҳар атрофи маҳалла фуқаролар йиғини раислари иштирок этдилар. Шунингдек, шаҳар ва шаҳар атрофидан “Аёллар дафтари”га киритилган фуқаролар ва шу худудларнинг фаол аёллари ҳам қатнашишди.

Суд масъуллар дастлаб юртимизда аҳолига олиб борилаётган ислоҳотлар мазмунини тушунтириш, амалдаги қонунчиликни кенг жамоатчилик ўртасида тарғиб қилиш, фуқароларнинг ҳуқуқий онги ва маданиятини янада юксалтириш, ҳуқуқий маслаҳатлар бериш орқали мавжуд муаммоларни ҳал этиш юзасидан судьялар томонидан ҳам кенг кўламли ишлар амалга оширилаётгани тўғрисида сўз юритдилар. Шунингдек, бу каби учрашув ва мулоқотлар жараёнида кўплаб чигал масалалар ўз ечимини топаётгани, фуқароларга қулайлик яратиш мақсадида бундай учрашувлар сайёр тартибда, овул ва маҳаллаларда ташкил этилаётгани, “Аёллар дафтари”га киритилган хотин-қизларга самарали ва ҳуқуқий ёрдам кўрсатилишини таъминлаш мақсадида судьялар томонидан доимий равишда шахсий қабуллар ўтказиб келинаётганини таъкидлаб ўтдилар.

Таъкидлаш жоизки, Амударё туманидаги 49 та маҳалла ва овул фуқаролар йиғинида 204 минг нафардан зиёд аҳоли яшайди. Шундан “Аёллар дафтари”га киритилган хотин-қизлар 3810 нафарни ташкил қилади. Шу кунги суд масъуллари томонидан ўтказилган сайёр қабулда 20 нафар хотин-қизларнинг мурожаатлари қабул қилиниб, ҳуқуқий ёрдам кўрсатилди. Ушбу мурожаатлардан 1 таси ишга жойлашиш, 9 таси оилавий муносабатлар, яъни алимент, никоҳни бекор қилиш кабилар бўйича, 4 таси моддий ёрдам ва субсидия, 4 таси уй-жой бўйича ва бошқа масалалар юзасидан бўлди.

Қабул давомида “Аёллар дафтари”га киритилган аёл-қизлар ўзларини қийнаб келаётган, ечимини топа олмаётган масалалар юзасидан ҳуқуқий маслаҳат сўраб, мурожаат қилдилар. Хотин-қизларнинг уй-жой, оила, никоҳ, мерос, тадбиркорлик фаолиятини бошлаш, мулк ҳуқуқини белгилаш билан боғлиқ саволларига судьялар томонидан малакали ҳуқуқий тушунтиришлар берилди.

Жасурбек Ўразбоев, Жиноят ишлари бўйича Амударё туман суди раиси.