SUD MASʼULLARI TOMONIDAN HUQUQIY YoRDAMGA MUHTOJ AYoL-QIZLAR UChUN SAYYoR QABUL TAShKIL ETILDI
Mamlakatimizda “Ayollar daftari”ga kiritilgan xotin-qizlarga huquqiy yordam koʻrsatish va maslahatlar berish, huquqiy madaniyatini oshirish borasida sud-huquq sohasi masʼullariga qator vazifalar yuklatilgan. Shunga koʻra Qoraqalpogʻiston Respublikasida ham “Ayollar daftariga” kiritilgan huquqiy yordamga muhtoj xotin-qizlarga koʻmak berish yuzasidan moʻljallangan chora-tadbirlar rejasi belgilangan boʻlib, undagi vazifalar ijrosi boʻyicha Respublika sudi raisi tomonidan hududlarda mahallabay sayyor qabullar tashkil etilmoqda.
Shu yil 27-sentyabr kuni Amudaryo tumanidagi Mahalla va nuroniylarni qoʻllab quvvatlash boʻlimi maʼmuriy binosida “Ayollar daftari”ga kiritilgan yordamga muhtoj xotin-qizlarga huquqiy yordam koʻrsatish maqsadida sud masʼullari tomonidan sayyor qabul oʻtkazildi. Unda Jinoyat ishlari boʻyicha Amudaryo tuman sudi raisi Jasurbek Oʻrazboyev, Fuqarolik ishlari boʻyicha Amudaryo tuman sudi raisi Qayrulla Atamuradov, Beruniy tumanlararo Iqtisodiy ishlari boʻyicha sudi sudyalari Bayram Bekmuradov va Quvanish Xojamuradov hamda xotin-qizlar masalalari boʻyicha hokim oʻrinbosari Goʻzal Sobirova, shahar atrofi mahalla fuqarolar yigʻini raislari ishtirok etdilar. Shuningdek, shahar va shahar atrofidan “Ayollar daftari”ga kiritilgan fuqarolar va shu xududlarning faol ayollari ham qatnashishdi.
Sud masʼullar dastlab yurtimizda aholiga olib borilayotgan islohotlar mazmunini tushuntirish, amaldagi qonunchilikni keng jamoatchilik oʻrtasida targʻib qilish, fuqarolarning huquqiy ongi va madaniyatini yanada yuksaltirish, huquqiy maslahatlar berish orqali mavjud muammolarni hal etish yuzasidan sudyalar tomonidan ham keng koʻlamli ishlar amalga oshirilayotgani toʻgʻrisida soʻz yuritdilar. Shuningdek, bu kabi uchrashuv va muloqotlar jarayonida koʻplab chigal masalalar oʻz yechimini topayotgani, fuqarolarga qulaylik yaratish maqsadida bunday uchrashuvlar sayyor tartibda, ovul va mahallalarda tashkil etilayotgani, “Ayollar daftari”ga kiritilgan xotin-qizlarga samarali va huquqiy yordam koʻrsatilishini taʼminlash maqsadida sudyalar tomonidan doimiy ravishda shaxsiy qabullar oʻtkazib kelinayotganini taʼkidlab oʻtdilar.
Taʼkidlash joizki, Amudaryo tumanidagi 49 ta mahalla va ovul fuqarolar yigʻinida 204 ming nafardan ziyod aholi yashaydi. Shundan “Ayollar daftari”ga kiritilgan xotin-qizlar 3810 nafarni tashkil qiladi. Shu kungi sud masʼullari tomonidan oʻtkazilgan sayyor qabulda 20 nafar xotin-qizlarning murojaatlari qabul qilinib, huquqiy yordam koʻrsatildi. Ushbu murojaatlardan 1 tasi ishga joylashish, 9 tasi oilaviy munosabatlar, yaʼni aliment, nikohni bekor qilish kabilar boʻyicha, 4 tasi moddiy yordam va subsidiya, 4 tasi uy-joy boʻyicha va boshqa masalalar yuzasidan boʻldi.
Qabul davomida “Ayollar daftari”ga kiritilgan ayol-qizlar oʻzlarini qiynab kelayotgan, yechimini topa olmayotgan masalalar yuzasidan huquqiy maslahat soʻrab, murojaat qildilar. Xotin-qizlarning uy-joy, oila, nikoh, meros, tadbirkorlik faoliyatini boshlash, mulk huquqini belgilash bilan bogʻliq savollariga sudyalar tomonidan malakali huquqiy tushuntirishlar berildi.
Jasurbek Oʻrazboyev, Jinoyat ishlari boʻyicha Amudaryo tuman sudi raisi.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
