Қиличбой овулида содир этилган аянчли жиноят барчани сергакликка чорлаши керак

Мамлакатимизда тинчлик ва осойишталикни сақлаш, жиноятчилик ва ҳуқуқбузарликларнинг олдини олиш борасида тизимли ишлар қилинмоқда. Ҳуқуқни муҳофаза қилувчи органлар фаолияти ислоҳ қилиниб, жиноятдан холи қишлоқ ва маҳаллалар сони ортиб бормоқда.

Аммо, эндиликда Амударё туманининг Қиличбой овули бундай маҳаллалар рўйхатига кирмайди. Шу йилнинг 25 сентябрь куни овул ҳудудида юз берган оғир жиноят барчани чуқур қайғуга солди ва огоҳликка чорлади.

Бу мудҳиш воқеанинг эртасигаёқ жиноятнинг сабабларини ўрганиш ҳамда келажакда бундай ҳолатлар содир бўлишининг олдини олиш мақсадида йиғилиш бўлиб ўтди. Унда туман ҳокими Султонбой Йўлдашев, Қорақалпоғистон Республикаси Ички ишлар вазири подполковник Бахтияр Тўребеков, ҳуқуқ-тартибот органлари масъуллари ҳамда овул аҳолиси вакиллари иштирок этишди.

Қорақалпоғистон Республикаси Ички ишлар Вазирлиги Ахборот хизматининг маълумотларига кўра, 25 сентябрь куни Қиличбой овули ҳудудда яшовчи эр-хотин (фуқаролар Е.М ҳамда Т.Д) ўртасида келишмовчилик келиб чиқиши оқибатида жанжал юзага келган. Натижада аёл ошхона пичоғи билан эрининг кўкрак қафасига уриб, оғир тан жароҳати етказган. Шундан сўнг жабрланувчи туман тез тиббий ёрдам бўлимига олиб келинган ва шу ерда вафот этган. Юз берган воқеа бўйича жиноят иши қўзғатилган ва ҳозирда тергов ҳаракатлари олиб борилмоқда.

Йиғилишда бундай аянчли ҳолатнинг содир этилиш сабабларига батафсил тўхтаб ўтилди. Таъкидланганидек, аксарият ҳолларда оилавий тушунмовчиликлар сабабли юзага келган келишмовчиликлар оқибатида ўзаро низолар келиб чиқмоқда. Ёш қизлар ва аёллар ўртасида жиноятчилик даражаси ортиб бораётгани эса янада ачинарли ҳолдир. Оилавий низолар асосан рашк ва хиёнат, ичкиликбозлик иллати оқибатида келиб чиқмоқда.

Йиғилишда аёлларнинг жиноят кўчасига киришида турмушда учровчи баъзи қийинчиликлар, эртанги кунга ишончсизлик, ҳаётнинг янги синовларига чидай олмаслик, яъни уларнинг иродасизлиги шунингдек, оилавий муносабатларнинг сусайиши, эр-хотин ва болалар ўртасидаги руҳий муносабатнинг бузилиши ҳамда аёлнинг оила аъзолари ва турмуш ўртоғи олдидаги мажбуриятларини унутиб қўяётганлиги асосий сабаблардан бири сифатида кўрсатиб ўтилди.

Йиғилишда жиноятчиликнинг олдини олиш бўйича амалга оширилиши лозим бўлган муҳим чора-тадбирлар белгилаб олинди.

Жумладан, аёл-қизлар билан тизимли равишда ишлашиш, улар билан доимий равишда мулоқотни йўлга қўйиш, жиноятга жазо муқаррар эканлигини тушунтириш учун тарғибот тадбирларини кучайтириш лозимлиги айтиб ўтилди.

Шунингдек, жиноятлар руҳий тушкунликка тушиб қолган аёл-қизлар ўртасида содир этилиш ҳолатлари кўпроқ кузатилгани ҳисобга олиниб, аёлларнинг психолог билан суҳбатларини доимий равишда ташкиллаштириш лозимлиги таъкидланди. Ундан ташқари, аёллар бандлиги таъминлаш муҳим масалалардан бири эканлигига алоҳида урғу бериб ўтилди.

Ҳақиқатдан ҳам, эр-хотин кун давомида иш билан банд бўлиб, бирор фаолият билан шуғулланса, оилада келиб чиқадиган келишмовчиликларга ҳам вақт қолмайди.

Йиғилишда туман Ички ишлар бўлими масъулларига, маҳалла раисларига, хотин-қизлар фаолларига бу борада муҳим топшириқлар берилди.

Аёл – жамиятнинг устуни, Ватанимиз келажаги бўлмиш ёш авлоднинг асосий тарбиячисидир. Ҳеч бир аёл ўзи хоҳлаб жиноятга қўл урмайди. Аксарият ҳолларда йиллар давомида йиғилган муаммолар, руҳий зарбалар уни шунга мажбур қилади.

Қиличбой овулида содир этилган мудҳиш жиноят ҳам барчани сергакликка, огоҳликка чорлади.

Туман ҳокимлигининг Ахборот хизмати.