Qilichboy ovulida sodir etilgan ayanchli jinoyat barchani sergaklikka chorlashi kerak

Mamlakatimizda tinchlik va osoyishtalikni saqlash, jinoyatchilik va huquqbuzarliklarning oldini olish borasida tizimli ishlar qilinmoqda. Huquqni muhofaza qiluvchi organlar faoliyati isloh qilinib, jinoyatdan xoli qishloq va mahallalar soni ortib bormoqda.

Ammo, endilikda Amudaryo tumanining Qilichboy ovuli bunday mahallalar roʻyxatiga kirmaydi. Shu yilning 25-sentyabr kuni ovul hududida yuz bergan ogʻir jinoyat barchani chuqur qaygʻuga soldi va ogohlikka chorladi.

Bu mudhish voqeaning ertasigayoq jinoyatning sabablarini oʻrganish hamda kelajakda bunday holatlar sodir boʻlishining oldini olish maqsadida yigʻilish boʻlib oʻtdi. Unda tuman hokimi Sultonboy Yoʻldashev, Qoraqalpogʻiston Respublikasi Ichki ishlar vaziri podpolkovnik Baxtiyar Toʻrebekov, huquq-tartibot organlari masʼullari hamda ovul aholisi vakillari ishtirok etishdi.

Qoraqalpogʻiston Respublikasi Ichki ishlar Vazirligi Axborot xizmatining maʼlumotlariga koʻra, 25-sentyabr kuni Qilichboy ovuli hududda yashovchi er-xotin (fuqarolar Ye.M hamda T.D) oʻrtasida kelishmovchilik kelib chiqishi oqibatida janjal yuzaga kelgan. Natijada ayol oshxona pichogʻi bilan erining koʻkrak qafasiga urib, ogʻir tan jarohati yetkazgan. Shundan soʻng jabrlanuvchi tuman tez tibbiy yordam boʻlimiga olib kelingan va shu yerda vafot etgan. Yuz bergan voqea boʻyicha jinoyat ishi qoʻzgʻatilgan va hozirda tergov harakatlari olib borilmoqda.

Yigʻilishda bunday ayanchli holatning sodir etilish sabablariga batafsil toʻxtab oʻtildi. Taʼkidlanganidek, aksariyat hollarda oilaviy tushunmovchiliklar sababli yuzaga kelgan kelishmovchiliklar oqibatida oʻzaro nizolar kelib chiqmoqda. Yosh qizlar va ayollar oʻrtasida jinoyatchilik darajasi ortib borayotgani esa yanada achinarli holdir. Oilaviy nizolar asosan rashk va xiyonat, ichkilikbozlik illati oqibatida kelib chiqmoqda.

Yigʻilishda ayollarning jinoyat koʻchasiga kirishida turmushda uchrovchi baʼzi qiyinchiliklar, ertangi kunga ishonchsizlik, hayotning yangi sinovlariga chiday olmaslik, yaʼni ularning irodasizligi shuningdek, oilaviy munosabatlarning susayishi, er-xotin va bolalar oʻrtasidagi ruhiy munosabatning buzilishi hamda ayolning oila aʼzolari va turmush oʻrtogʻi oldidagi majburiyatlarini unutib qoʻyayotganligi asosiy sabablardan biri sifatida koʻrsatib oʻtildi.

Yigʻilishda jinoyatchilikning oldini olish boʻyicha amalga oshirilishi lozim boʻlgan muhim chora-tadbirlar belgilab olindi.

Jumladan, ayol-qizlar bilan tizimli ravishda ishlashish, ular bilan doimiy ravishda muloqotni yoʻlga qoʻyish, jinoyatga jazo muqarrar ekanligini tushuntirish uchun targʻibot tadbirlarini kuchaytirish lozimligi aytib oʻtildi.

Shuningdek, jinoyatlar ruhiy tushkunlikka tushib qolgan ayol-qizlar oʻrtasida sodir etilish holatlari koʻproq kuzatilgani hisobga olinib, ayollarning psixolog bilan suhbatlarini doimiy ravishda tashkillashtirish lozimligi taʼkidlandi. Undan tashqari, ayollar bandligi taʼminlash muhim masalalardan biri ekanligiga alohida urgʻu berib oʻtildi.

Haqiqatdan ham, er-xotin kun davomida ish bilan band boʻlib, biror faoliyat bilan shugʻullansa, oilada kelib chiqadigan kelishmovchiliklarga ham vaqt qolmaydi.

Yigʻilishda tuman Ichki ishlar boʻlimi masʼullariga, mahalla raislariga, xotin-qizlar faollariga bu borada muhim topshiriqlar berildi.

Ayol – jamiyatning ustuni, Vatanimiz kelajagi boʻlmish yosh avlodning asosiy tarbiyachisidir. Hech bir ayol oʻzi xohlab jinoyatga qoʻl urmaydi. Aksariyat hollarda yillar davomida yigʻilgan muammolar, ruhiy zarbalar uni shunga majbur qiladi.

Qilichboy ovulida sodir etilgan mudhish jinoyat ham barchani sergaklikka, ogohlikka chorladi.

Tuman hokimligining Axborot xizmati.