“Ёшлар дафтари”га киритилган ёшларга зарур иш қуроллари берилди

Маълумки, юртимизда аҳолини ижтимоий қўллаб-қувватлаш, муаммоларини ҳал этиш, бандлигини таъминлаш, касбга ўқитиш мақсадида моддий ёрдам ва кўмакка муҳтож оилалар рўйхати, яъни “Темир дафтар”, ёшлар ҳаётига оид муаммоларни тизимли ўрганиш ва уларни ижобий ҳал этишга қаратилган “Ёшлар дафтари” ва аёл-қизлар ҳаётини яхшилашга кўмаклашиш мақсадида “Аёллар дафтари” шакллантирилган.

Бутун мамлакатимизда бўлгани каби Амударё туманида ҳам аҳолининг ижтимоий ҳимояга муҳтож қатламини қўллаб-қувватлаш, уларни камбағалликдан чиқариш, касб-ҳунарга ўқитиш, имтиёзли банк кредитларини олиб, ўз тадбиркорлик фаолиятларини йўлга қўйишларида яқиндан ёрдам бериш мақсадида манзилли ишлар амалга оширилмоқда.

Бу борада туманда фаолият олиб бораётган 4 та сектор раҳбарлари томонидан амалга оширилаётган саъй-ҳаракатлар туфайли кўплаб оилалар амалий ёрдамлар кўрсатилган ҳолда “Темир дафтар”, “Аёллар дафтари” ва “Ёшлар дафтари” рўйхатларидан чиқарилиб, фаровонлиги таъминланмоқда.

Айниқса, эртанги кун эгалари бўлган ёшларни ҳар томонлама қўллаб- қўвватлаш, муаммоларини ҳал қилиш мақсадида жорий этилган “Ёшлар дафтари” да турувчи ёшларга алоҳида эътибор каратиб келинмоқда.

24 август куни Олмазор маҳалласи ҳудудидаги 82-сонли умумтаълим мактаби биноси олдида 4 та сектор раҳбари томонидан ижтимоий ҳимояга муҳтож, кам таъминланган оилалар фарзандларининг бандлигини таъминлаш мақсадида субсидия асосида 20 та тикув машинаси, 10 та пайвандлаш ускунаси, ҳамда пайванлаш ишларида зарур бўладиган 20 та асбоб-ускуналар берилди.

Тадбирда туман ҳокими, 1-сектор раҳбари Султонбой Йўлдашев, мамлакатимизда аҳолининг ижтимоий ҳимояга муҳтож қатламини қўллаб-қувватлаш, уларнинг иш билан бандлигини таъминлаш, янги иш ўринларини яратиш, айниқса, уюшмаган ёшларнинг муаммоларини ҳал этиш борасида белгиланган чора-тадбир, устувор вазифаларга батафсил тўхталиб ўтди.

2-сектор раҳбари, туман прокурори Азиз Рўзметов “Ёшлар дафтари” рўйхатига киритилган ёшлар билан манзилли ишлаш бўйича эришилаётган ютуқлар, кўплаб ёшларнинг ўзини-ўзи банд қилиш тамойили асосида иш юритиб, оиласи фаровонлигига ҳисса қўшаётганлигини эътироф этди.

3-сектор раҳбари, туман Ички ишлар бўлими бошлиғи Мухамметали Хожамуратов ёшларга яратилаётган имкониятлар, шарт-шароитлар ҳақида айтиб, ёшларни ўқиб, билим олишга, шижоат билан олға интилишга ундади.

4-сектор раҳбари Айдос Сейитов эса ёшларнинг бўш вақтини мазмунли ўтказишларида ёшлар етакчилари томонидан ўтказилаётган турли тадбирлар, спорт беллашувлари ўзининг ижобий натижасини бериб келаётганини, айниқса, ушбу тадбирларда фаол қатнашган ёш оилалардан бири Ўринбоевлар оиласи “Энг ёш китобхон оила” танловининг мутлоқ ғолиби бўлганини айтиб, ёшларни жамиятнинг ижтимоий-сиёсий ҳаётида фаол бўлишга чақирди.

Шунингдек, тадбир давомида туман ҳокими ўринбосари Маҳмуд Шерметов туманда “Ёшлар дафтари”га киритилган ёшларни қўллаб-қувватлаш борасида амалга оширилаётган манзилли ишлар ҳақида тўхталиб, ёшларни тикув машиналари, пайвандлаш ускуналаридан самарали фойдаланган ҳолда даромад топиб, оиласи фаровонлигига ҳисса қўшишга чақирди.

Тадбирда “Ёшлар дафтари” рўйхатига киритилган ёшлар туман ҳокимлиги ва Ёшлар ишлари агентлиги туман бўлимига ўзларига кўрсатилаётган беғараз ёрдамлар учун миннатдорлик билдиришиб, бундан кейин самарали фаолият юритажакларини ва албатта, Ватанимиз тараққиёти ҳамда халқимиз турмушининг янада фаровон бўлишига ҳисса қўшишларини айтиб ўтдилар.

Туман ҳокимлигининг Ахборот хизмати.