Амударёлик ҳожи отахон ва онахонлар иштирокида учрашув ўтказилди

8 август куни Амударё тумани Маҳалла ва нуронийларни қўллаб-қувватлаш бўлими биносида ҳожи ота ва ҳожи оналар, масжид имом-хатиблари иштирокида учрашув бўлиб ўтди.

Учрашувда Дин ишлари бўйича қўмитанинг Қорақалпоғистон Республикаси ҳудудий бошқармаси бош мутахассиси Нурулла Жамалов, туман бўлими мутахассиси Музаффар Шеримбетов, Маҳалла ва нуронийларни қўллаб-қўвватлаш бўлими бошлиғи Ғуломжон Дуйсенбаев, туман бош имом-хатиби Абдураҳмон Матсапаевлар ҳамда ҳаж зиёратини адо қилиб келган ҳожи отахон ва онахонлар иштирок этишди.

Ҳаж − мусулмоннинг иродасини, ихлосини, тақвосини, иймонини имтиҳон қилувчи масъулиятли ва машаққатли ибодатдир. Ҳаж − Аллоҳнинг розилигини топиш, Ундан гуноҳлар мағфиратини сўрашнинг энг қулай имкониятидир. У тавба-тазаррунинг, покланишнинг, Аллоҳга қурбат ҳосил қилиш ва Унинг жаннатига эришишнинг воситасидир.

Яқинда 25 нафар амударёлик ҳожи ота ва ҳожи оналар дунёдаги миллионлаб диндошларимиз қатори табаррук юртга бориб, зиммаларидаги Аллоҳнинг фарзини бажариб қайтишди.

Учрашувда туман Маҳалла ва нуронийларни қўллаб-қўвватлаш бўлими бошлиғи Ғуломжон Дуйсенбаев ҳожиларни ўз зиммаридаги муборак фарзни адо этиб, арконларни тўлиқ бажариб қайтганликлари билан самимий табриклади.

Дин ишлари бўйича қўмитанинг Қорақалпоғистон Республикаси ҳудудий бошқармаси бош мутахассиси Нурулла Жамалов барча ҳожиларга зиёратлари қабул бўлишини, бундан 6 минг йил аввал Аллоҳ таолонинг амрига кўра “пайғамбарлар отаси” Иброҳим алайҳиссалом ва унинг ўғли Исмоил алайҳиссалом бино қилган Каъбани 7 бора айланиб тавоф қилиш бахтига муяссар бўлиб қайтганликлари билан муборакбод этди.

Учрашув давомида сўзга чиққанлар, муқаддас сафар давомида гуноҳларининг мағфират қилинишини, юртимизга, халқимизга равнақ ва омонлик тилаб дуои хайрлар қилишганини айтиб ўтишди.

Шунингдек, учрашув давомида ҳожиларга маҳаллалардаги тарбияси оғир ёшлар билан ишлашиш, оилаларда ижтимоий-маънавий муҳитни соғломлаштириш, ҳамда ҳар бир ҳожини бир маҳаллага бириктириш бўйича фикр-мулоҳазалар алмашилди.

Дарҳақиқат, оилавий ажримларнинг олдини олишда, ёшларнинг бузғунчи ғоялар таъсирига тушиб, ҳар хил ёт мафкураларга алданиб қолмасликларида ҳожи ота ва ҳожи оналар томонидан маҳаллаларда олиб бориладиган тушунтириш-тарғибот ишлари катта аҳамиятга эга.

Улар ўзларининг бой ҳаётий тажрибалари, ўгит-насиҳатлари, ҳамда муқаддас ҳадислардан мисоллар келтириб, ёшларга маънавият ва маърифат улашадилар.

Қолаверса, шиддат билан ривожланиб бораётган ахборот асрида ёшларнинг дин мазмун-моҳиятини яхши тушунмай, турли ақидапарастларга алданиб қолмасликларида ҳам ҳожи ота ва оналар томонидан бериладиган диний билимлар муҳим аҳамият касб этади.

Учрашув якунида ҳожилар, имом-хатиблар, маҳаллалардаги нуронийларнинг ҳамкорликда иш олиб бориб, ёшлар тарбияси билан шуғулланишлари ҳамда оилалардаги муҳитни соғломлаштириш бўйича муҳим вазифалар белгилаб олинди.

Туман ҳокимлигининг Ахборот хизмати.