Amudaryolik hoji otaxon va onaxonlar ishtirokida uchrashuv oʻtkazildi

8-avgust kuni Amudaryo tumani Mahalla va nuroniylarni qoʻllab-quvvatlash boʻlimi binosida hoji ota va hoji onalar, masjid imom-xatiblari ishtirokida uchrashuv boʻlib oʻtdi.

Uchrashuvda Din ishlari boʻyicha qoʻmitaning Qoraqalpogʻiston Respublikasi hududiy boshqarmasi bosh mutaxassisi Nurulla Jamalov, tuman boʻlimi mutaxassisi Muzaffar Sherimbetov, Mahalla va nuroniylarni qoʻllab-qoʻvvatlash boʻlimi boshligʻi Gʻulomjon Duysenbayev, tuman bosh imom-xatibi Abdurahmon Matsapayevlar hamda haj ziyoratini ado qilib kelgan hoji otaxon va onaxonlar ishtirok etishdi.

Haj − musulmonning irodasini, ixlosini, taqvosini, iymonini imtihon qiluvchi masʼuliyatli va mashaqqatli ibodatdir. Haj − Allohning roziligini topish, Undan gunohlar magʻfiratini soʻrashning eng qulay imkoniyatidir. U tavba-tazarruning, poklanishning, Allohga qurbat hosil qilish va Uning jannatiga erishishning vositasidir.

Yaqinda 25 nafar amudaryolik hoji ota va hoji onalar dunyodagi millionlab dindoshlarimiz qatori tabarruk yurtga borib, zimmalaridagi Allohning farzini bajarib qaytishdi.

Uchrashuvda tuman Mahalla va nuroniylarni qoʻllab-qoʻvvatlash boʻlimi boshligʻi Gʻulomjon Duysenbayev hojilarni oʻz zimmaridagi muborak farzni ado etib, arkonlarni toʻliq bajarib qaytganliklari bilan samimiy tabrikladi.

Din ishlari boʻyicha qoʻmitaning Qoraqalpogʻiston Respublikasi hududiy boshqarmasi bosh mutaxassisi Nurulla Jamalov barcha hojilarga ziyoratlari qabul boʻlishini, bundan 6 ming yil avval Alloh taoloning amriga koʻra “paygʻambarlar otasi” Ibrohim alayhissalom va uning oʻgʻli Ismoil alayhissalom bino qilgan Kaʼbani 7 bora aylanib tavof qilish baxtiga muyassar boʻlib qaytganliklari bilan muborakbod etdi.

Uchrashuv davomida soʻzga chiqqanlar, muqaddas safar davomida gunohlarining magʻfirat qilinishini, yurtimizga, xalqimizga ravnaq va omonlik tilab duoi xayrlar qilishganini aytib oʻtishdi.

Shuningdek, uchrashuv davomida hojilarga mahallalardagi tarbiyasi ogʻir yoshlar bilan ishlashish, oilalarda ijtimoiy-maʼnaviy muhitni sogʻlomlashtirish, hamda har bir hojini bir mahallaga biriktirish boʻyicha fikr-mulohazalar almashildi.

Darhaqiqat, oilaviy ajrimlarning oldini olishda, yoshlarning buzgʻunchi gʻoyalar taʼsiriga tushib, har xil yot mafkuralarga aldanib qolmasliklarida hoji ota va hoji onalar tomonidan mahallalarda olib boriladigan tushuntirish-targʻibot ishlari katta ahamiyatga ega.

Ular oʻzlarining boy hayotiy tajribalari, oʻgit-nasihatlari, hamda muqaddas hadislardan misollar keltirib, yoshlarga maʼnaviyat va maʼrifat ulashadilar.

Qolaversa, shiddat bilan rivojlanib borayotgan axborot asrida yoshlarning din mazmun-mohiyatini yaxshi tushunmay, turli aqidaparastlarga aldanib qolmasliklarida ham hoji ota va onalar tomonidan beriladigan diniy bilimlar muhim ahamiyat kasb etadi.

Uchrashuv yakunida hojilar, imom-xatiblar, mahallalardagi nuroniylarning hamkorlikda ish olib borib, yoshlar tarbiyasi bilan shugʻullanishlari hamda oilalardagi muhitni sogʻlomlashtirish boʻyicha muhim vazifalar belgilab olindi.

Tuman hokimligining Axborot xizmati.