ЮРИДИК ХИЗМАТ КЎРСАТИШ МАРКАЗИ ФАОЛИЯТИ КЕНГАЙМОҚДА

Мамлакатимизда давлат органлари ва ташкилотлари фаолиятини ҳуқуқий жиҳатдан таъминлаш ҳамда уларга сифатли ва профессионал юридик хизмат кўрсатишга қаратилган ислоҳотлар босқичма-босқич амалга оширилмоқда.

Ўзбекистон Республикаси Президентининг 2022 йил 18 март кунги “Юридик хизмат кўрсатиш марказлари фаолиятини янада кенгайтириш бўйича қўшимча чора-тадбирлар тўғрисида”ги Қарори ижросини таъминлаш мақсадида Амударё туманида ўқув-амалий семинарлар ўтказилмоқда.

Давлат органлари ва ташкилотлари ҳамда Юридик хизмат кўрсатиш маркази ходимлари иштирокида ўтказилаётган семинарларда “e-huquqshunos” электрон тизимида ишлаш, юридик тусдаги ҳужжатларни расмийлаштириш тартиби тўлиқ тушунтирилмоқда. Шунингдек, тизим орқали ҳужжат алмашиш тартиби ва тизимнинг афзалликлари ҳамда яратилган қулайликлар тўғрисида тизимдан фойдаланувчиларга кенг турда маълумотлар берилмоқда.

Туман Адлия бўлими Юридик хизмат кўрсатиш маркази ходимлари томонидан ташкил қилинган навбатдаги семинарда Халқ таълими бўлимига қарашли умумий ўрта таълим мактаблари директорлари ва мактаб иш юритувчи менеджерлари ҳамда туман Мактабгача таълим бўлимига қарашли мактабгача таълим ташкилотлари мудиралари, маъсул ходимлари иштирок этишди.

Фаолият кўлами кенгаяётган туман Адлия бўлимининг Юридик хизмат кўрсатиш маркази ходимларига бу ўзгаришлар янада улкан масъулият юклайди. Марказ ходимлари янгидан қамровга олинаётган корхона, ташкилотлар, муассасаларда бу борада тушунтиришлар олиб бориш мақсадида турли тадбирлар ўтказмоқдалар.

Яқинда туман Мактабгача таълим бўлимида ҳам шундай тадбирлардан бири бўлиб ўтди. Республикамиз Президентининг юқорида қайд этилган қарори ва ундан келиб чиқадиган вазифалар ҳақида марказ ходими Мансур Матюсупов маъруза қилди. Бўлим ходимлари, давлат мактабгача таълим ташкилотлари раҳбарлари ва масъул ходимлари иштирок этган ушбу тадбирда янги тартиб-қоидалар тушунтирилди ва қатнашчиларни қизиқтирган саволларга батафсил жавоблар берилди.

Ўқув-амалий семинар жараёнида иштирокчиларга “e-huquqshunos” электрон тизимида ишлаш жараёни амалиётда кўрсатиб берилди.

Тумандаги Давлат хизматлари марказида ҳам худди шундай тарғибот тадбири бўлиб ўтди. Унда туман Юридик хизмат кўрсатиш маркази бошлиғи Нилуфар Жуманиёзова марказга юридик хизмат кўрсатиш учун Президент қарорига кўра қамровга олинаётган корхона, ташкилотлар раҳбарларига ушбу қарор мазмун-моҳиятини батафсил тушунтирди, эндиликда амал қилинадиган тартиб-қоидалар ҳақида гапирди.

Шунингдек тадбирда тумандаги юридик хизмат кўрсатиладиган барча ташкилотларда мавжуд мураккаб ҳуқуқий муаммоларни юридик хизмат кўрсатиш марказлари билан ҳамкорликда коллегиял тарзда ҳал этиш имкони яратилганлиги, ташкилотларнинг мулкий ҳамда бошқа ҳуқуқлари, қонуний манфаатларини ўз вақтида самарали ҳимоя қилиниши, қабул қилинаётган ҳужжатларнинг қонуний, ҳар томонлама пухта ва сифатли бўлишини таъминлаш ҳамда юридик тусдаги ҳужжатларнинг бир хиллигини таъминланиши тўғрисида ҳам тушунтиришлар олиб борилди.

Мамлакатимизда қонун хужжатларининг мазмун-моҳиятини аҳолига етказишнинг янги бўғини ишга тушди. Умуман олганда, юридик хизмати мавжуд бўлмаган ташкилотларнинг фаолиятида қонунийлик ва қонун устуворлигини янада мустаҳкамлаш ҳамда қоғозбозлик ва коррупцияни келтириб чиқарувчи омилларни бартараф этиш соҳасида салмоқли ўзгаришларга эришилмоқда.

Юридик хизмат кўрсатиш маркази ўз фаолиятини давлат органлари ва ташкилотлари билан ўзаро ҳужжат алмашинувнинг ягона электрон тизими орқали амалга ошираётгани амалиётда ўзининг ижобий самарасини бермоқда. Юридик хизматнинг янги рақамлашган платформаси марказлар ҳамда давлат органлари ва ташкилотлари ўртасида ҳужжат алмашинувининг ягона электрон тизимининг изчил ва шаффоф ишлашига олиб келади.

Н.Жуманиязова, Амударё тумани адлия бўлими юридик хизмат кўрсатиш маркази бошлиғи.