YuRIDIK XIZMAT KOʻRSATISh MARKAZI FAOLIYaTI KENGAYMOQDA

Mamlakatimizda davlat organlari va tashkilotlari faoliyatini huquqiy jihatdan taʼminlash hamda ularga sifatli va professional yuridik xizmat koʻrsatishga qaratilgan islohotlar bosqichma-bosqich amalga oshirilmoqda.

Oʻzbekiston Respublikasi Prezidentining 2022-yil 18-mart kungi “Yuridik xizmat koʻrsatish markazlari faoliyatini yanada kengaytirish boʻyicha qoʻshimcha chora-tadbirlar toʻgʻrisida”gi Qarori ijrosini taʼminlash maqsadida Amudaryo tumanida oʻquv-amaliy seminarlar oʻtkazilmoqda.

Davlat organlari va tashkilotlari hamda Yuridik xizmat koʻrsatish markazi xodimlari ishtirokida oʻtkazilayotgan seminarlarda “e-huquqshunos” elektron tizimida ishlash, yuridik tusdagi hujjatlarni rasmiylashtirish tartibi toʻliq tushuntirilmoqda. Shuningdek, tizim orqali hujjat almashish tartibi va tizimning afzalliklari hamda yaratilgan qulayliklar toʻgʻrisida tizimdan foydalanuvchilarga keng turda maʼlumotlar berilmoqda.

Tuman Adliya boʻlimi Yuridik xizmat koʻrsatish markazi xodimlari tomonidan tashkil qilingan navbatdagi seminarda Xalq taʼlimi boʻlimiga qarashli umumiy oʻrta taʼlim maktablari direktorlari va maktab ish yurituvchi menedjerlari hamda tuman Maktabgacha taʼlim boʻlimiga qarashli maktabgacha taʼlim tashkilotlari mudiralari, maʼsul xodimlari ishtirok etishdi.

Faoliyat koʻlami kengayayotgan tuman Adliya boʻlimining Yuridik xizmat koʻrsatish markazi xodimlariga bu oʻzgarishlar yanada ulkan masʼuliyat yuklaydi. Markaz xodimlari yangidan qamrovga olinayotgan korxona, tashkilotlar, muassasalarda bu borada tushuntirishlar olib borish maqsadida turli tadbirlar oʻtkazmoqdalar.

Yaqinda tuman Maktabgacha taʼlim boʻlimida ham shunday tadbirlardan biri boʻlib oʻtdi. Respublikamiz Prezidentining yuqorida qayd etilgan qarori va undan kelib chiqadigan vazifalar haqida markaz xodimi Mansur Matyusupov maʼruza qildi. Boʻlim xodimlari, davlat maktabgacha taʼlim tashkilotlari rahbarlari va masʼul xodimlari ishtirok etgan ushbu tadbirda yangi tartib-qoidalar tushuntirildi va qatnashchilarni qiziqtirgan savollarga batafsil javoblar berildi.

Oʻquv-amaliy seminar jarayonida ishtirokchilarga “e-huquqshunos” elektron tizimida ishlash jarayoni amaliyotda koʻrsatib berildi.

Tumandagi Davlat xizmatlari markazida ham xuddi shunday targʻibot tadbiri boʻlib oʻtdi. Unda tuman Yuridik xizmat koʻrsatish markazi boshligʻi Nilufar Jumaniyozova markazga yuridik xizmat koʻrsatish uchun Prezident qaroriga koʻra qamrovga olinayotgan korxona, tashkilotlar rahbarlariga ushbu qaror mazmun-mohiyatini batafsil tushuntirdi, endilikda amal qilinadigan tartib-qoidalar haqida gapirdi.

Shuningdek tadbirda tumandagi yuridik xizmat koʻrsatiladigan barcha tashkilotlarda mavjud murakkab huquqiy muammolarni yuridik xizmat koʻrsatish markazlari bilan hamkorlikda kollegiyal tarzda hal etish imkoni yaratilganligi, tashkilotlarning mulkiy hamda boshqa huquqlari, qonuniy manfaatlarini oʻz vaqtida samarali himoya qilinishi, qabul qilinayotgan hujjatlarning qonuniy, har tomonlama puxta va sifatli boʻlishini taʼminlash hamda yuridik tusdagi hujjatlarning bir xilligini taʼminlanishi toʻgʻrisida ham tushuntirishlar olib borildi.

Mamlakatimizda qonun xujjatlarining mazmun-mohiyatini aholiga yetkazishning yangi boʻgʻini ishga tushdi. Umuman olganda, yuridik xizmati mavjud boʻlmagan tashkilotlarning faoliyatida qonuniylik va qonun ustuvorligini yanada mustahkamlash hamda qogʻozbozlik va korruptsiyani keltirib chiqaruvchi omillarni bartaraf etish sohasida salmoqli oʻzgarishlarga erishilmoqda.

Yuridik xizmat koʻrsatish markazi oʻz faoliyatini davlat organlari va tashkilotlari bilan oʻzaro hujjat almashinuvning yagona elektron tizimi orqali amalga oshirayotgani amaliyotda oʻzining ijobiy samarasini bermoqda. Yuridik xizmatning yangi raqamlashgan platformasi markazlar hamda davlat organlari va tashkilotlari oʻrtasida hujjat almashinuvining yagona elektron tizimining izchil va shaffof ishlashiga olib keladi.

N.Jumaniyazova, Amudaryo tumani adliya boʻlimi yuridik xizmat koʻrsatish markazi boshligʻi.