ЁШЛАР ЕТАКЧИСИ МАҲАЛЛА ЁШЛАРИ ФАОЛЛИГИНИ ОШИРМОҚДА

Амударё туманининг Арнабўйи маҳалласида 774 хонадонда жами 4148 нафар фуқаро истиқомат қилади. Шулардан 30 ёшгача бўлганлар сони 2248 нафар ва 16-30 ёш тоифасидаги ёшлар сони 958 нафарни ташкил этади. Маҳалла фуқаролар йиғини раиси, ҳоким ёрдамчиси, аёллар фаоли, ёшлар етакчиси ҳамда профилактика инспектори маҳалладаги ҳар бир оилада бўлиб, ҳамжиҳатликда иш фаолиятларини олиб бормоқда. Ёшлардан келган ҳар қандай мурожаат, муаммо ва таклифларнинг ижобий ечимларини топиб, маҳаллада тинчлик ва тотувликни сақлаб келишмоқда.

Ёшларнинг бўш вақтларини мазмунли ўтказишга астойдил ҳаракат қилаётган ёшлар етакчиси билан нафақат маҳалла сардорлари, балки бошқа уюшмаган ёшлар ҳам ҳамжиҳатликда ҳаракат қилишмоқда. Хусусан, маҳалла ҳудудидан ўтувчи канал устига нуроний Ҳайтимбат ота Тажиев бошчилигида Хўжакент ва Ўзбегим кўчаларини бирлаштирувчи, “Манғит Арна” канали устидан ўтувчи кўприк қурилиши ишлари олиб борилмоқда. Ёшлар етакчиси Шаҳзод Нуратдинов ташаббуси билан маҳалла сардорлари, фаол ёшлар кўприк қурилишига қўл меҳнатлари билан кўмак беришаяпти.

Ёшларнинг тадбиркорлик ғояларини қўллаб-қувватлаш мақсадида яқинда ҳунармандчиликка қизиқадиган ёшлар уста-ҳунарманд Махсуд уста Абдураҳмоновнинг уйига бориб, иш фаолияти билан яқиндан таништирилди. Ҳунармандчилик орқасидан оила боқиб келаётган Махсуд ака уларга иш фаолиятини қандай бошлагани, бугунги ишлари ҳақида сўзлаб, ҳунарли киши хор бўлмас, деб ўз маслаҳатларини берди.

Ёшларга берилаётган имтиёзлардан самарали фойдаланиш мақсадида Беҳзод Нуруллаев, Зулхумор Сапарова, Озода Жумабоева, Мавлуда Ҳайтбоева ва Фарҳод Сидабуллаевларнинг бандлигини таъминлаш мақсадида 3 йилга имтиёзли кредитлар ажратилишига кўмаклашилди.

Шу кунга қадар маҳаллада ҳар бир ёшнинг уйига бориб, муаммо ва таклифларини, бандлик ҳолатини, таълим маълумотини ҳамда саломатлик ҳолатларини аниқлаб чиқиб, ёшлар баланси тузиб олинди. Ёшлар баланси орқали “Ёшлар дафтари” ва “Ёшлар дастури” шакллантирилди ҳамда “Ёшлар дафтари”га киритилган ҳар бир ёшга ижтимоий ёрдамлар кўрсатилмоқда.

Ҳозирги кунга қадар 93 нафар ишсиз ёшлар “Ёшлар дафтари”га киритилган бўлиб, уларнинг 86 нафарига узоқ муддатли ижарага ер берилди ва бандликлари таъминланди.

Жумладан, 76 нафар ёшга 10 йилга ижара асосида деҳқончилик қилишлари учун ерлар ажратилди, 5 нафарига тадбиркорлик фаолиятини амалга ошириш учун имтиёзли кредитлар берилди. 2 нафарининг жамоатчилик асосида бандлиги таъминланди, яна 2 нафарининг ҳарбий сафарбарлик чақируви резерви бадали қоплаб берилди ҳамда 1 нафар ёшга ҳайдовчилик курси харажатларининг 75 фоиз қисми қоплаб берилди.

Амалга оширилаётган бунингдек саъй-ҳаракатлар натижасида маҳалла ёшларининг жамият ҳаётига дахлдорлиги мустаҳкамланиб, эртаги кун учун масъулияти ортмоқда.

Севара ИСМОИЛОВА, ҚДУ талабаси.