YoShLAR YeTAKChISI MAHALLA YoShLARI FAOLLIGINI OShIRMOQDA

Amudaryo tumanining Arnaboʻyi mahallasida 774 xonadonda jami 4148 nafar fuqaro istiqomat qiladi. Shulardan 30 yoshgacha boʻlganlar soni 2248 nafar va 16-30 yosh toifasidagi yoshlar soni 958 nafarni tashkil etadi. Mahalla fuqarolar yigʻini raisi, hokim yordamchisi, ayollar faoli, yoshlar yetakchisi hamda profilaktika inspektori mahalladagi har bir oilada boʻlib, hamjihatlikda ish faoliyatlarini olib bormoqda. Yoshlardan kelgan har qanday murojaat, muammo va takliflarning ijobiy yechimlarini topib, mahallada tinchlik va totuvlikni saqlab kelishmoqda.

Yoshlarning boʻsh vaqtlarini mazmunli oʻtkazishga astoydil harakat qilayotgan yoshlar yetakchisi bilan nafaqat mahalla sardorlari, balki boshqa uyushmagan yoshlar ham hamjihatlikda harakat qilishmoqda. Xususan, mahalla hududidan oʻtuvchi kanal ustiga nuroniy Haytimbat ota Tajiyev boshchiligida Xoʻjakent va Oʻzbegim koʻchalarini birlashtiruvchi, “Mangʻit Arna” kanali ustidan oʻtuvchi koʻprik qurilishi ishlari olib borilmoqda. Yoshlar yetakchisi Shahzod Nuratdinov tashabbusi bilan mahalla sardorlari, faol yoshlar koʻprik qurilishiga qoʻl mehnatlari bilan koʻmak berishayapti.

Yoshlarning tadbirkorlik gʻoyalarini qoʻllab-quvvatlash maqsadida yaqinda hunarmandchilikka qiziqadigan yoshlar usta-hunarmand Maxsud usta Abdurahmonovning uyiga borib, ish faoliyati bilan yaqindan tanishtirildi. Hunarmandchilik orqasidan oila boqib kelayotgan Maxsud aka ularga ish faoliyatini qanday boshlagani, bugungi ishlari haqida soʻzlab, hunarli kishi xor boʻlmas, deb oʻz maslahatlarini berdi.

Yoshlarga berilayotgan imtiyozlardan samarali foydalanish maqsadida Behzod Nurullayev, Zulxumor Saparova, Ozoda Jumaboyeva, Mavluda Haytboyeva va Farhod Sidabullayevlarning bandligini taʼminlash maqsadida 3-yilga imtiyozli kreditlar ajratilishiga koʻmaklashildi.

Shu kunga qadar mahallada har bir yoshning uyiga borib, muammo va takliflarini, bandlik holatini, taʼlim maʼlumotini hamda salomatlik holatlarini aniqlab chiqib, yoshlar balansi tuzib olindi. Yoshlar balansi orqali “Yoshlar daftari” va “Yoshlar dasturi” shakllantirildi hamda “Yoshlar daftari”ga kiritilgan har bir yoshga ijtimoiy yordamlar koʻrsatilmoqda.

Hozirgi kunga qadar 93 nafar ishsiz yoshlar “Yoshlar daftari”ga kiritilgan boʻlib, ularning 86 nafariga uzoq muddatli ijaraga yer berildi va bandliklari taʼminlandi.

Jumladan, 76 nafar yoshga 10-yilga ijara asosida dehqonchilik qilishlari uchun yerlar ajratildi, 5 nafariga tadbirkorlik faoliyatini amalga oshirish uchun imtiyozli kreditlar berildi. 2 nafarining jamoatchilik asosida bandligi taʼminlandi, yana 2 nafarining harbiy safarbarlik chaqiruvi rezervi badali qoplab berildi hamda 1 nafar yoshga haydovchilik kursi xarajatlarining 75 foiz qismi qoplab berildi.

Amalga oshirilayotgan buningdek saʼy-harakatlar natijasida mahalla yoshlarining jamiyat hayotiga daxldorligi mustahkamlanib, ertagi kun uchun masʼuliyati ortmoqda.

Sevara ISMOILOVA, QDU talabasi.