ЭЛИМ, ДЕГАН ЭЛ ФИДОЙИСИ

Ўз касбий фаолиятим давомида турфа хулқ-атворли инсонлар билан учрашиб, мулоқотда бўлганман. Улар орасида, албатта, эл-юртга, касбига, оиласига фидойилар жуда кўп. Кимдир халқ манфаати учун, кимдир оиласи, яна кимдир Ватанига жонфидо, халқ хизмати учун камарбаста. Бироқ яна бир тоифа инсонлар ҳам борки, ҳатто ўзини, ҳузур-ҳаловатини унутар даражада халқим, деб интилиб яшайди. Баъзан оч-наҳор, баъзан қиш  изғиринларида  қўл-оёқлари музлаб, саратон жазирамаларида жисм-у жони қоврилиб, халқ орасига кириб бораверади. Ўз касб фаолиятини амалга ошириш йўлидаги машаққатлардан асло чўчимайди. Агар таъбир жоиз бўлса, амударёлик бадиий сўз устаси, халқ орасида  “Қобил радио” номи билан танилган Қобил оға Шомуродов ана шундай фидойилардан.
Амударё туманининг собиқ Куйбишев номидаги, ҳозирги Тўлқин овулида туғилган Қобил Шомуродов матбуот соҳасига илк қадам қўйганида ҳали мактаб ўқувчиси эди. Ўтган асрнинг 59-60 йилларида Қипчоқ қишлоғидаги ҳудудий таянч мактаб, ҳозирги 11-сонли умумтаълим масканида  ўрта маълумот олган Қобил Шомуродов бўш вақтларини мутолаа билан ўтказар, марказий газета ва журналлар, “Ўзбекистон адабиёти ва санъати” газетаси “Шарқ юлдузи”, “Фан ва турмуш”, “Гулистон”, “Саодат” каби матбуот нашрлари қатори “Амударё ҳақиқати” газетасининг ҳар бир сонини мароқ билан ўқир, ўзи ҳам баъзан туман газетасига мақолалар ёзиб, почта орқали жўнатиб турарди.
Газета саҳифаларида Қобил Шомуродов имзоси билан чоп этилаётган мақолаларга алоҳида эътибор берган газетанинг етакчи журналистларидан бири Саъдулла Хўжаниёзов бўлди. Ҳеч эсидан чиқмайди, 1967 йилда қишлоқдаги ҳаммом ишламаётгани ҳақида ёзган ҳажвий шеъри газетада ёритилгач, орадан ҳеч қанча вақт ўтмай, ҳаммом тўла қувват билан халққа хизмат кўрсатишни бошлади. Қишлоқ аҳли эса “ҳаммомни ишлатган” Қобил Шомуродов-ни шу кундан эътиборан “мухбир бола” деб чақирадиган бўлди. Ушбу воқеа сабаб “мухбир бола” тез-тез таҳририятга келадиган, устози Саъдулла Хўжаниёзовдан журналистика сирларини ўрганиш мақсадида  унинг раҳбарлигида таҳририят қошида ташкил этилган “Гулшан” ва “Тўлқин” ижодкор ёшлар тўгараги машғулотларида иштирок этадиган бўлди. Орадан бир неча йиллар ўтиб, ўз ижодий  услубига эга, қолаверса, долзарб мавзулардаги мақолалари билан халққа анча танилиб қолган Қобил Шомуродов устози С.Хўжаниёзовнинг қўллаб-қувватлаши ва ғамхўрлиги туфайли  1978 йилдан Қорақалпоғистон радиосининг Амударё тумани бўйича махсус мухбири сифатида илк журналистлик фаолиятини бошлади.
Қобил Шомуродов радио-журналист сифатида фаолият юритган 1978-2020 йиллар унинг учун ҳақиқий касбга фидойилик йиллари бўлибгина қолмай, ижодда ўз шахсий фикри ва услубига эга журналист сифатида шаклланишида муҳим аҳамият касб этди.
Ўз малакасини ошириш, замон билан ҳамнафас қадам ташлаш мақсадида ишдан ажралмаган ҳолда НДПИнинг тарих факультетини муваффақиятли тамомлаган Қобил Шомуродов ҳаётининг мазмунига айланиб қолган матбуот соҳасига, ижодга бир умр боғланиб қолди. Умрининг 40 йилдан зиёд даврини ўзи севган халққа маънавият ва маърифат улашиш, уларни янги-янги марралар сари руҳлантириш, қалбларига жўшқин кайфият улашишдек эзгу ишга бағишлаган “мухбир бола” улғайган сари эл аро ҳурмат-эътибор қозонди. Ҳар тонг нафақат амударёликлар, балки қорақалпоқ овулларидаги ҳар бир хонадонга жарангдор овози, долзарб мавзулардаги  хабарлари, радиоочерклари билан кириб борадиган Қобил Шомуродовни халқ азбаройи ҳурмат қилганидан “Қобил радио” деб чақирадиган бўлишди.
Амударё туманининг ҳар бир қишлоғи, ҳар бир қарич ерига қадами теккан “Қобил радио”нинг ўз касбига ўта масъулиятлилиги, фидойилиги жамики журналистлар учун ибрат бўлгулик. Ҳозиргидай компьютер технологиялари ривожланмаган, овоз ёзиш ускуналари лентали кассеталардан иборат, камида 2-3 килограмм оғирликдаги магнитофонни катта сумкага жойлаб, дала-дашт кезган, эрталаб Жумуртоғдаги тоғ-кон заводидан эшиттириш тайёрласа, пешиндан сўнг ё Назархонга, ё азим Қиличбойнинг Холимбег-у Дўрман овулларига йўл олгувчи Қобил Шомуродовнинг қаҳратон қиш, ёз жазирамаси-ю, қор-ёмғир демай, зиммасидаги касбий бурчини ҳеч инжилмай бажарганларига неча бора гувоҳ бўлганмиз.
Бутун онгли ҳаётини ўз касбига садоқат ила халққа маънавият ва маърифат улашишдек эзгу ишга бағишлаган матбуот фидойиси  Қобил оға Шомуродов айни пайтда 75 ёшга тўлдилар. Қутлуғ ёшида ҳам қўлидан қаламини қўймаган отахон мухбир, меҳр-оқибатли, эл-юртга қайишган фарзандларининг ардоқли отаси, оилапарвар умр йўлдоши Ҳанифахон момонинг севимли елкадоши Қобил оға Шомуродовга:
– Асло чарчаманг, ижод қилишдан тўхтаманг, сиз севган Аму элида Сизнинг овозингиз, ўткир сўзингизни кутиб яшагувчи мухлисларингиз борлигини асло унутманг, қутлуғ 75 ёшингиз муборак бўлсин! – деймиз.

Робия ЙЎЛДОШЕВА.