МАНҒИТ ШАҲРИДА ТОМОРҚАСИДА ГИЁҲВАНД МОДДА ЕТИШТИРАЁТГАН ФУҚАРО ҚЎЛГА ОЛИНДИ

Республика ҳудудида наркотик моддаларни контрабанда йўли билан олиб кириш, транзит равишда ўтказиш ҳолатларини фош қилиш ҳамда таркибида наркотик моддалар бўлган ўсимликларни аниқлаш мақсадида ҳар йили “Қорадори” кенг қамровли тадбири ўтказилиши белгиланган.

Бу борадаги Қорақалпоғистон Республикаси Ички ишлар вазирлигининг 2021 йил 20 декабрдаги “Асосий ташкилий тадбирлар режаси”да белгиланган вазифалар ижросини таъминлаш мақсадида Қорақалпоғистон Республикаси Ички ишлар вазирининг 2022 йил 13 апрель куни фармойиши ишлаб чиқилди. Фармойишда мазкур йилда “Қорадори – 2022” кенг қамровли тадбирини Республика миқёсида икки босқичда ўтказиш кўрсатилган бўлиб, айни кунларда ҳудудларда биринчи босқич тадбирлари ўтказилмоқда.

 Амударё тумани ҳудудида ҳам Ички ишлар бўлимининг шахсий таркиби иштирокида шу йилнинг 1 май кунидан 30 июнгача бўлган давр оралиғида «Қорадори – 2022» кенг қамровли профилактик-тезкор тадбирининг биринчи босқичини ўтказиш бўйича ишлаб чиқилган иш режага асосан бир қатор тадбирлар амалга оширилди.

Жумладан, туман ҳудудида хизмат олиб бораётган профилактика инспекторлари ва бошқа ходимлар томонидан овул ва маҳаллалар ҳудудларида истиқомат қилувчи аҳолининг томорқалари, фермер хўжаликлари раислари иштирокида уларнинг дала майдонлари кўздан кечирилди. Кенг аҳоли қатлами ўртасида таркибида гиёҳванд моддалари бўлган ўсимликларни етиштириш ҳолатларига йўл қўймаслик бўйича тарғибот-тушунтириш ишлари олиб борилди.

Тадбир давомида таркибида гиёҳванд моддаси бўлган ўсимликларни ноқонуний равишда етиштириш ҳолатларини аниқлаш ва йўқ қилиш мақсадида Қорақалпоғистон Республикаси Ички ишлар вазирлиги ихтиёридаги учувчисиз учиш аппаратлари (дронлар) ёрдамида назоратли учишлар амалга оширилди.

Шунингдек, гиёҳвандлик воситалари, психотроп моддалар ва прекурсорларнинг муомалада бўлиши билан боғлиқ фаолиятга оид тартиб бузилганлигидан далолат берувчи маълумотлар мавжуд бўлган тақдирда таркибида гиёҳвандик моддаси бўлган ўсимликлар етиштирилиши эҳтимоли бор ер участкалари, гиёҳвандлик воситалари, психотроп моддалар ва прекурсорлар сақланиши, ишлаб чиқарилиши, тайёрланиши, реализация қилиниши, тақсимланиши, фойдаланилиши ва йўқ қилиниши мумкин бўлган объектлар кўздан кечирилди.

«Қорадори – 2022» тадбирининг биринчи босқичи давомида туман ҳудудига гиёҳванд воситалар кириб келишининг олдини олиш мақсадида бошқа соҳавий хизмат ходимлари билан ҳамкорлик кучайтирилди.

Тадбир давомида туман Ички ишлар бўлимининг жиноят-қидирув бўлинмаси ҳамда Давлат хавфсизлик хизмати туман бўлими тезкор ходимлари билан ҳамкорликда Манғит шаҳри ҳудудидаги маҳаллалардан бирида яшовчи фуқаро хонадонидаги томорқа ер кўздан кечирилганида, тўрт туп марихуанна гиёхвандлик моддасига ўхшаш ўткир ҳидли яшил рангли ўсимлик экиб қўйилганлиги аниқланди.

Шунингдек, ушбу фуқаронинг хонадонида мавжуд бўлган қўшимча хўжалик хоналари кўздан кечирилганида, уйининг молхонасида 3 дона 1 литрлик банкаларда ва 1 дона оқ рангли қоғозга ўраб қўйилган ўткир ҳидли, яшил рангли марихуанна гиёҳвандлик моддасига ўхшаш қуритилган ўсимликлар сақлаб қўйганлиги ҳам маълум бўлди. Томорқада ўсаётган ўсимлик ва молхонадан топилган моддалар ҳам ашёвий далил сифатида олиб кетилди.

Ушбу холат юзасидан ўтказилган экспертиза текширувларида мазкур моддалар 160,15 граммлик марихуанна гиёҳвандлик моддалари эканлиги ўз тасдиғини топди. Шунга кўра туман Ички ишлар бўлими ҳузуридаги Тергов гуруҳи томонидан Ўзбекистон Республикаси Жиноят кодексининг тегишли моддалари асосида жиноят иши қўзғатилди. Ҳозирги кунда ҳолат бўйича тергов ҳаракатлари олиб борилмоқда.

Мамлакатимизда қонун устуворлиги таъминланган. Қонунларимизни бузган ва унга амал қилмаган ҳар қандай шахс қонун олдида жавоб беришга мажбур. Ушбу фуқаро ҳам энди қилмишига яраша қонун олдида жавоб беради ва қилмишига яраша жазога тортилади.