MANGʻIT ShAHRIDA TOMORQASIDA GIYoHVAND MODDA YeTIShTIRAYoTGAN FUQARO QOʻLGA OLINDI

Respublika hududida narkotik moddalarni kontrabanda yoʻli bilan olib kirish, tranzit ravishda oʻtkazish holatlarini fosh qilish hamda tarkibida narkotik moddalar boʻlgan oʻsimliklarni aniqlash maqsadida har yili “Qoradori” keng qamrovli tadbiri oʻtkazilishi belgilangan.

Bu boradagi Qoraqalpogʻiston Respublikasi Ichki ishlar vazirligining 2021-yil 20-dekabrdagi “Asosiy tashkiliy tadbirlar rejasi”da belgilangan vazifalar ijrosini taʼminlash maqsadida Qoraqalpogʻiston Respublikasi Ichki ishlar vazirining 2022-yil 13-aprel kuni farmoyishi ishlab chiqildi. Farmoyishda mazkur yilda “Qoradori – 2022” keng qamrovli tadbirini Respublika miqyosida ikki bosqichda oʻtkazish koʻrsatilgan boʻlib, ayni kunlarda hududlarda birinchi bosqich tadbirlari oʻtkazilmoqda.

 Amudaryo tumani hududida ham Ichki ishlar boʻlimining shaxsiy tarkibi ishtirokida shu yilning 1-may kunidan 30-iyungacha boʻlgan davr oraligʻida «Qoradori – 2022» keng qamrovli profilaktik-tezkor tadbirining birinchi bosqichini oʻtkazish boʻyicha ishlab chiqilgan ish rejaga asosan bir qator tadbirlar amalga oshirildi.

Jumladan, tuman hududida xizmat olib borayotgan profilaktika inspektorlari va boshqa xodimlar tomonidan ovul va mahallalar hududlarida istiqomat qiluvchi aholining tomorqalari, fermer xoʻjaliklari raislari ishtirokida ularning dala maydonlari koʻzdan kechirildi. Keng aholi qatlami oʻrtasida tarkibida giyohvand moddalari boʻlgan oʻsimliklarni yetishtirish holatlariga yoʻl qoʻymaslik boʻyicha targʻibot-tushuntirish ishlari olib borildi.

Tadbir davomida tarkibida giyohvand moddasi boʻlgan oʻsimliklarni noqonuniy ravishda yetishtirish holatlarini aniqlash va yoʻq qilish maqsadida Qoraqalpogʻiston Respublikasi Ichki ishlar vazirligi ixtiyoridagi uchuvchisiz uchish apparatlari (dronlar) yordamida nazoratli uchishlar amalga oshirildi.

Shuningdek, giyohvandlik vositalari, psixotrop moddalar va prekursorlarning muomalada boʻlishi bilan bogʻliq faoliyatga oid tartib buzilganligidan dalolat beruvchi maʼlumotlar mavjud boʻlgan taqdirda tarkibida giyohvandik moddasi boʻlgan oʻsimliklar yetishtirilishi ehtimoli bor yer uchastkalari, giyohvandlik vositalari, psixotrop moddalar va prekursorlar saqlanishi, ishlab chiqarilishi, tayyorlanishi, realizatsiya qilinishi, taqsimlanishi, foydalanilishi va yoʻq qilinishi mumkin boʻlgan obʼektlar koʻzdan kechirildi.

«Qoradori – 2022» tadbirining birinchi bosqichi davomida tuman hududiga giyohvand vositalar kirib kelishining oldini olish maqsadida boshqa sohaviy xizmat xodimlari bilan hamkorlik kuchaytirildi.

Tadbir davomida tuman Ichki ishlar boʻlimining jinoyat-qidiruv boʻlinmasi hamda Davlat xavfsizlik xizmati tuman boʻlimi tezkor xodimlari bilan hamkorlikda Mangʻit shahri hududidagi mahallalardan birida yashovchi fuqaro xonadonidagi tomorqa yer koʻzdan kechirilganida, toʻrt tup marixuanna giyoxvandlik moddasiga oʻxshash oʻtkir hidli yashil rangli oʻsimlik ekib qoʻyilganligi aniqlandi.

Shuningdek, ushbu fuqaroning xonadonida mavjud boʻlgan qoʻshimcha xoʻjalik xonalari koʻzdan kechirilganida, uyining molxonasida 3 dona 1 litrlik bankalarda va 1 dona oq rangli qogʻozga oʻrab qoʻyilgan oʻtkir hidli, yashil rangli marixuanna giyohvandlik moddasiga oʻxshash quritilgan oʻsimliklar saqlab qoʻyganligi ham maʼlum boʻldi. Tomorqada oʻsayotgan oʻsimlik va molxonadan topilgan moddalar ham ashyoviy dalil sifatida olib ketildi.

Ushbu xolat yuzasidan oʻtkazilgan ekspertiza tekshiruvlarida mazkur moddalar 160,15 grammlik marixuanna giyohvandlik moddalari ekanligi oʻz tasdigʻini topdi. Shunga koʻra tuman Ichki ishlar boʻlimi huzuridagi Tergov guruhi tomonidan Oʻzbekiston Respublikasi Jinoyat kodeksining tegishli moddalari asosida jinoyat ishi qoʻzgʻatildi. Hozirgi kunda holat boʻyicha tergov harakatlari olib borilmoqda.

Mamlakatimizda qonun ustuvorligi taʼminlangan. Qonunlarimizni buzgan va unga amal qilmagan har qanday shaxs qonun oldida javob berishga majbur. Ushbu fuqaro ham endi qilmishiga yarasha qonun oldida javob beradi va qilmishiga yarasha jazoga tortiladi.