МУЗАФФАРНИНГ ИШ КУНЛАРИ

Халқ депутатлари Амударё туман Кенгашининг 18-Хитой сайлов округидан депутати Музаффар Ешчанов ҳар гал сайловчилари билан учрашганида сайлов округи ҳудудида истиқомат қилувчи ҳар бир фуқаро, ҳар битта оила ва хонадон ҳаётига доир ютуқ ва муаммоларни аввалдан синчиклаб ўрганади.

М.Ешчановнинг депутат сифатидаги ўз ҳаёт шиори бор: “Якка одам ўзи муваффақият қозонолмайди, барча масалада уни рағбатлантириб турувчи куч − халқдир”. Шунинг учун ҳам у депутат бўлмасидан аввал, Тошкент Давлат аграр Университетини тугатиб, 2008 йилда “Шўр қалъа” фермер хўжалиги иш юритувчиси сифатида илк меҳнат фаолиятини бошлаган кунлариданоқ халқ ичига кириб бориш, улар билан бирга меҳнат қилиш, қувонч-у ташвишларини биргаликда баҳам кўриш орқали кундалик  иш режаларини муваффақиятли, тўсиқларсиз амалга ошириш мумкинлигини англаб етди.

Ишонч − инсон орзуларига қанот бағишлайди, дейдилар. Музаффар ҳам ана шу ишонч туйғусини ҳис этган сари ёш бўлса-да, нуфузли меҳнат жамоаларида, хусусан, туман қишлоқ ва сув хўжалиги бўлимининг ирригация-мелиорация тармоқлари ва қурилмалари бўйича етакчи мутахассиси, Намуна ММТП раиси, МЧЖ шаклидаги “Amudaryotex” хорижий корхонаси агрономи, Мелиоратив экспедициянинг Амударё мелиоратив участкаси бошлиғи вазифаларида сидқидилдан хизмат қилди. У қайси  жамоада, қай лавозимда ишлашидан қатъий назар, бир вақтнинг ўзида “Музаффар Ешчанов” фермер хўжалигига ҳам раҳбарлик қилди. Пахта ва бошқа қишлоқ хўжалиги маҳсулотлари етиштириш бўйича “Музаффар Ешчанов” фермер хўжалигини тумандаги илғор қишлоқ хўжалик корхоналари сафига  олиб чиқди.

У округ ҳудудидаги маҳаллаларда хотин-қизлар фаоллари, кўча бошчилари ва нуронийлар иштирокидаги ҳар бир учрашувида Президентимиз ташаббуси билан ишлаб чиқилган Янги Ўзбекистоннинг тараққиёт стратегияси мазмун-моҳияти хусусида тушунчалар бериб, ушбу стратегиянинг халқимиз ҳаётини тубдан яхшилаш, фаровонлигини таъминлашга хизмат қилишга қаратилган бандлари бугунги ҳаётимизда яққол намоён бўлиши учун ҳар битта хонадон ва оилада амалга оширилиши лозим бўлган вазифаларга алоҳида аҳамият қаратади. Хусусан, кам даромадли, эҳтиёжманд оилаларни камбағалликдан чиқариш бўйича ўз режалари асосида давлатимиз томонидан кўрсатилаётган эътибор юзасидан сайловчиларнинг фикрлари, таклифларини ўрганишдан асло чарчамайди.

М.Ешчанов  айни пайтда Намуна маҳалласида тадбиркорликни ривожлантириш, аҳоли бандлигини таъминлаш ва камбағалликни қисқартириш масалалари бўйича туман ҳокими ёрдамчиси сифатида деярли ҳар куни халқ билан бирга. 18-Хитой сайлов округи ҳудудидаги ва Намуна маҳалласи тасарруфидаги барча кўчалар ва маҳалла гузарида амалга оширилаётган ободонлаштириш ва кўкаламзорлаштириш ишларига бош-қош.

М.Ешчановнинг ҳам депутат, ҳам ҳоким ёрдамчиси сифатидаги фаолият кўлами  анча кенг. Ўзи туғилиб-ўсган  Намуна маҳалласи аҳли, қолаверса, 18-Хитой сайлов округи ҳудудидаги маҳаллаларда яшовчи сайловчилар ишончини оқлаш, халқнинг дард-у ташвишларига шерик бўлиб яшаш унинг зиммасидаги масъулиятли вазифадир. Оилада эса тартиб-интизомни хуш кўрадиган умр йўлдош ва меҳрибон ота. Рафиқаси Маъмурахон билан икки ўғил, икки қизни илмли-маърифатли қилиб вояга етказишмоқда. Обод ва чароғон оила қўрғони ҳамиша саранжом-саришта, яхшилар қадамидан файзли. Депутат ва ҳоким ёрдамчиси, намунали фермер хўжалиги раҳбари, ибратли оила соҳиби Музаффар Ешчановнинг ҳар бир иш куни халқ билан бирга, унга ишонч билдирган сайловчилар даврасида кечади. Мазмунли учрашувлар, самимий ва ошкора мулоқотларга бой бундай давралар ёш ва ташаббускор депутатга яна янги орзулар, режалар сари йўл очаверади.

Робия ЙЎЛДОШЕВА.