Қорақалпоғистон Республикаси Адлия вазирлигининг 2025 йилдаги фаолияти якунлари бўйича матбуот анжумани ўтказилди

Мамлакатимизда амалга оширилаётган кенг кўламли ҳуқуқий ислоҳотларнинг туб моҳияти инсон ҳуқуқ ва эркинликларини ҳимоя қилиш, давлат органлари фаолиятида қонунийликни таъминлаш ҳамда аҳолига кўрсатилаётган давлат хизматлари сифатини янги босқичга кўтаришга қаратилган. Ягона давлат ҳуқуқий сиёсатини амалга оширувчи асосий идора сифатида Адлия вазирлиги зиммасига бу борада улкан масъулият юкланган. 23 январ куни Қорақалпоғистон Республикаси адлия вазирилиги томонидан 2025 йил давомида амалга оширилган ишлар юзасидан ўтказилган матбуот анжумани ҳам ўтган давр мобайнида соҳада эришилган натижалар ва йўл қўйилган камчиликларни таҳлил қилиш, келгуси режаларни белгилаб олишда муҳим аҳамият касб этди. Матбуот анжуманида Қорақалпоғистонда фаолият юритаётган оммавий ахборот воситалари вакиллари ва журналистлар қатнашдилар.

Қорақалпоғистон Республикаси адлия вазирининг биринчи ўринбосари Амангелди Пренов таъкидлаганидек, ҳисобот даврида вазирлик томонидан энг аввало, фуқароларнинг бузилган ҳуқуқларини тиклаш масаласига устувор аҳамият қаратилган. Рақамларга мурожаат қиладиган бўлсак, 2025 йил давомида жисмоний ва юридик шахслардан вазирлик ва унинг қуйи тизимларига жами 5 минг 45 та мурожаат келиб тушган. Эътиборлиси, ушбу мурожаатларнинг 2 минг 779 таси, яъни 55 фоизи қаноатлантирилиб, фуқароларнинг ҳуқуқлари тикланишига эришилган.

Таҳлиллар шуни кўрсатмоқдаки, аҳолини кўпроқ меҳнат муносабатлари, уй-жой масалалари, ижтимоий ҳимоя ва давлат хизматларини кўрсатиш билан боғлиқ муаммолар ташвишга солмоқда. Шунингдек, ўтган йил давомида фуқаролар манфаатини кўзлаб судларга киритилган 13 минг 161 та даъво аризалари натижасида 7 миллиард 151 миллион сўмдан ортиқ маблағ ундириб берилган.

Вазирлик фаолиятининг яна бир муҳим йўналиши – бу давлат органлари ва ташкилотларида қонунчилик ижросини назорат қилишдир. Вазирлик томонидан амалга оширилган мониторинглар ва ўтказилган текширишлар натижасида давлат идораларида 45 мингдан ортиқ қонун бузилиш ҳолатлари аниқланган. Ушбу қонун бузилиши ҳолатларини бартараф этиш бўйича тегишли муассаса, идора ва ташкилотларга 1217 та таклиф, 317 та огоҳлантириш киритилди. Аниқланган камчиликларни бартараф этиш юзасидан киритилган тақдимномалар асосида аҳолига 23 миллиард 391 миллион сўмлик маблағлар қайтарилган. Шу билан бирга, ўз вазифасига совуққонлик билан қараган 789 нафар мансабдор шахс маъмурий жавобгарликка тортилган. Ушбу рақамнинг ўзиёқ жойларда ҳали-ҳануз қонунчиликка риоя қилишда масъулиятсизлик ҳолатлари учраётганидан далолат беради.

Аҳолига қулайлик яратиш, ортиқча оворагарчиликларнинг олдини олиш мақсадида давлат хизматлари кўрсатиш тизими ҳам тубдан такомиллаштирилмоқда. 2025 йилда Давлат хизматлари марказлари орқали 1 миллион 133 мингдан ортиқ хизмат кўрсатилгани, шундан 410 мингтаси онлайн тарзда амалга оширилгани рақамлаштириш жараёнининг жадаллашганини кўрсатади. Инфратузилмани яхшилаш мақсадида Нукус шаҳри ва 17 та туманда замонавий марказ бинолари фойдаланишга топширилди. Шунингдек, Фуқаролик ҳолати далолатномаларини ёзиш бўлимлари архивларидаги 3 миллион 700 мингдан ортиқ ҳужжатларнинг рақамлаштирилиши фуқароларга ҳужжат олишда тезкорликни таъминлашга хизмат қилмоқда.

Юридик хизмат кўрсатиш соҳасидаги ислоҳотлар ҳам эътиборга молик. Хусусан, туман ва шаҳар адлия бўлимлари ҳузурида ташкил этилган 17 та Юридик хизмат кўрсатиш маркази бугунги кунда мактаблар, боғчалар ва поликлиникалар каби ижтимоий соҳа объектларига сифатли ҳуқуқий хизмат кўрсатмоқда. Бу эса бюджет ташкилотларида қонун бузилишларининг олдини олишда муҳим омил бўлмоқда. Бундан ташқари, аҳолининг ҳуқуқий саводхонлигини ошириш мақсадида 51 мингдан ортиқ тарғибот тадбирлари ўтказилгани жамиятда ҳуқуқий маданиятни юксалтиришга хизмат қилади.

Хулоса қилиб айтганда, 2025 йилда амалга оширилган ишлар вазирлик жамоасининг "Инсон қадри учун" тамойили асосида, масъулият билан фаолият юритганидан далолат беради.