Сувни исроф қилманг!

 Сув—ҳаётнинг олий неъмати. У шундай мўжизаки, дунёдаги ҳар қандай тирик мавжудот уни истеъмол қилади. Aлбатта, ҳаётимизни сувсиз тасаввур қилиш қийин. Негаки сувсизликдаги чўлда на бир гўзаллик, на бир ҳаёт бор. Шунинг учун ҳам сувни обиҳаёт деб бежизга айтишмаган.
 Ҳар куни кундалик турмушимизда қанча сув исроф қилишимиз ҳақида ўйлаб кўрганмисиз? Aслини олганда тиш ювиш учун 200 мл. яъни бир стакан сув кифоя. Aммо аксарият кишилар тиш тозалаш чоғида жўмракни ўчириб қўйишни хаёлига ҳам келтирмайдилар. Натижада эса тишни тозалагунча камида 6-7 литр сув беҳудага оқиб кетади. Бунча сувга яна камида 30 та одам тиш тозалаши мумкин. Aгарда бутун Ўзбекистон аҳолиси бир марта тиш ювишида сувни оқизиб қўядиган бўлса, нақ 200 тоннадан ортиқ сув исроф бўлади. Бу ҳазилакам рақамлар эмас. Бир марта тиш ювиш учун шунча сув исроф бўлса, ювиниш ва бошқа эҳтиёжлар учун ишлатиладиган қанча сув исроф бўлиши ҳақида ўйлаб ҳам кўрмагандирмиз. Ваҳоланки, қайсидир ҳудудларда сув топишнинг ўзи муаммо. Шундай экан, исрофгарчиликдан чекланишимиз зарур.
 Ер юзида барча ресурслар чегараланганлиги каби сув ҳам ўз чегарасига эгалигини яхши биламиз. Ер сайёрасининг 70 фоизини қоплаган 1,5 миллиард куб километр нинг 97 фоизини океан ва денгизларнинг истеъмолга яроқсиз сувлари ва 2 фоизи музликларнинг сувлари ташкил этади. Инсоният заҳирасида эса атиги 1 фоиз истеъмолга яроқли чучук сув мавжуд. Aфсуски, у ҳам тобора қисқариб, глобал муаммога айланиб бормоқда.
 Сувни тежаш кераклиги ҳақида бизга болаликданоқ уқтирилади. Негаки, беҳудага ишлатилган сув исроф, исроф эса гуноҳ эканлигини унутмайлик! Шундай экан, сувни исроф қилманг!

Мухлиса Олимова ЎзЖОКУ 1-босқич талабаси.