ЗЎРАВОНЛИК ЁКИ ШАФҚАТСИЗЛИК ТАРҒИБ ҚИЛИШ ИЖТИМОИЙ ХАВФЛИ ЖИНОЯТ

Шахс манфаатларини, унинг ҳуқуқ ва эркинликларини жиноий тажовузлардан ҳимоя қилиш Ўзбекистон Республикаси Жиноят кодексининг асосий вазифаларидан биридир.
Дарҳақиқат, инсоннинг ҳаёти ва соғлиғи шахснинг бебаҳо бойлиги ҳисобланади. Уни бу бойликдан маҳрум этиш ёки шикаст етказиш оғир жиноят ҳисобланади. Бу эса, ушбу турдаги жиноятларнинг хавфлилик даражаси юқори эканлигини кўрсатади. Шунингдек, шахсга қарши жиноятларни ижтимоий хавфлилик даражасининг юқорилиги, уларнинг содир этилиши натижасида ҳаёт ва соғлиқ, жинсий эркинлик, оила ва ёшларнинг манфаатлари, ахлоқ нормалари, шахснинг озодлиги, шаъни ва қадр-қиммати, фуқароларнинг конституциявий ҳуқуқ ва эркинликларига жиддий зарар етказилиши билан шартланади.
Зўравонлик ва шафқатсизликни тарғиб қилувчи маҳсулотларнинг тарқатилиши, намойиш қилиниши ёки реклама қилиниши жамиятимизда умумэътироф этилган анъана ва қадриятларимизга, шунингдек, маданий ва маънавий ҳаёт тарзимизда зўрлик ишлатиш, ҳурматсизлик, шафқатсиз муносабатлар ва ахлоқсиз хулқ-атвор шаклланишига сабаб бўлади. Айтиш жоизки, шахсни зўравонликка, шафқатсизликка чорловчи турли суратлар, матбуот нашрлари, видеокассеталарнинг тарқатилиши инсонлар онгида салбий ўзгаришларни юзага келтиради. Табиийки, бундай салбий омиллар шахснинг, айниқса, ёшларнинг шаклланишига салбий таъсир кўрсатади. Шу сабабли бундай ҳаракатларни содир этганлик учун жиноий жавобгарлик белгиланган.
Ўзбекистон Республикаси Жиноят кодексининг 130- ва 130/1-моддаларида назарда тутилган қилмишлар ахлоқий тарбия соҳасидаги давлат сиёсатига ва инсоннинг маънавий шаклланишига тажовуз ҳисоблангани учун ушбу моддаларда тегишли жазо чоралари кўрсатилган. Бинобарин, Ўзбекистон Республикаси давлати ва жамоатчилиги ўсиб келаётган ёш авлодни баркамол қилиб тарбиялаш, шу жумладан, ёшлар онгида умумэътироф этилган ахлоқий принципларни сингдиришга манфаатдордир.

Ш.Шерманов, ЎзР ИВВ академияси 3-босқич курсанти.
А.Тажиев, подполковник.
Д.Шарифова, капитан.