“Беш муҳим ташаббус” доирасидаги олимпиадалар юқори савияда ўтказилди

Маълумки, Ўзбекистон Республикаси Президенти томонидан 2019 йилнинг март ойида “Беш муҳим ташаббус” илгари сурилди. Бу – ёшларни маданият, санъат ва спортга кенг жалб этиш, уларда замонавий ахборот технологияларидан тўғри фойдаланиш кўникмасини шакллантириш, китобхонлик маданиятини юксалтириш, хотин-қизлар бандлигини таъминлаш вазифаларини ўз ичига олади. Ушбу мақсад ва вазифалардан келиб чиққан ҳолда қолаверса, Ўзбекистон Республикаси Президенти томонидан қабул қилинган “Маҳаллаларда ёшлар билан ишлаш тизимини тубдан такомиллаштириш чора-тадбирлари тўғрисида”ги қарор ижросини таъминлаш мақсадида Республикамиз бўйлаб “Беш ташаббус олимпиадаси” ўтказилмоқда.

Жумладан Амударё туманида мавжуд 49 та овул ва маҳалла фуқаролар йиғинларида “Зукко китобхон” танловининг маҳалла босқичи ўтказилиб унда 250 та жамоа вакиллари иштирок этдилар.

25 апрель куни Ўрта қалъа ҳамда Қиличбой овул фуқаролар йиғинида “Зукко китобхон” танловининг маҳалла босқичи юқори савияда ўтказилди. Унда “Алпомиш”, “Буюклар”, “Зукколар”, “Донолар” жамоалари иштирок этиб, ўз билимларини синовдан ўтказдилар. Танлов шартлари тажрибали эксперт ва ҳакамлар томонидан одилона баҳолаб борилди. Якуний натижаларга кўра, “Алпомиш” жамоаси сектор босқичига йўлланмани қўлга киритди.

Шу куни Қиличбой овул фуқаролар йиғини ҳудудида жойлашган 15-сонли умумий ўрта таълим мактабида ҳам танловнинг маҳалла босқичи ўтказилди. Унда овул аҳолиси ёшларидан иборат “Истиқлол”, “Жайҳун” “Билимдон”, “Амударё” жамоалари қатнашишди. Ўқувчи ёшлар жаҳон ҳамда ўзбек адабиёти намуналаридан тузилган саволлар асосида ўз билимларини синовдан ўтказишди. “Жайҳун” жамоаси ёшлари ўз тенгдошларини ортда қолдириб биринчи ўринни ҳамда танловнинг сектор босқичига йўлланмани қўлга киритишди.

Шу ўринда айтиш жоизки, ёшларга бўлган эътибор бугун ҳар қачонгидан ҳам кучайган сабаби эртанги кун тақдири Ватан корига ярайдиган баркамол ўғил-қизлар қўлидадир. Уларни турли ёт ғояларга эргашиб кетмаслиги ва бўш вақтларини мазмунли ўтказишлари доимо диққат марказида бўлган. Шу маънода ёшларнинг бўш вақтини мазмунли ўтказиш бўйича илгари сурилаётган “Беш муҳим ташаббус” доирасидаги тадбирлар ўзининг ижобий самарасини бермоқда.

26 апрель куни Маҳалла ва нуронийларни қўллаб-қувватлаш бўлимида спортнинг шахмат тури бўйича “Ёшлар ишлари агентлиги кубоги”нинг сектор босқичи бўлиб ўтди.

Рақиблар учрашуви шиддатли ва муросасиз кечди. Якуний натижаларга кўра 1 сектордан Жаҳонгир Аминов, Зиёда Саъдуллаева, 2-сектордан Азимжон Pаҳимов, Дурдона Раҳимова, Раҳматжон Раҳимов, 3-сектордан Оғабек Тўраев, Камола Қадабоева, Райхон Шамурадова ва 4-сектордан Суҳроб Mақсудов, Машхура Ражаповлар ғолибликни қўлга киритишди. Сектор босқичида 1-ўринни эгаллаган иштирокчилар туман босқичи учун шахмат доналарини суради.

Шу куни Беруний маҳалласи ҳудудидаги “Истиқлол” тўйхонасида Ёшлар ишлари агентлиги Қорақалпоғистон Республикаси бошқармаси “Билим ринг” интеллектуал клуби ҳамда Ёшлар ишлари агентлиги туман бўлими ҳамда бир қатор ҳамкор ташкилотлар билан биргаликда интеллектуал ўйиннинг туман биринчилиги ўтказилди.

Турнирда 7 ёшдан 70 ёшгача бўлган ҳаваскор билимдонлар қатнашишди. Туман биринчилигида иштирок этган 42 та жамоа бир-бирларига муносиб рақиб эканлигини амалда исботладилар.

Турнир кўтаринки руҳда ва муросасиз тарзда кечди. Якуний натижаларга кўра, Оқ олтин овули жамоси 1-ўринни, Навоий маҳалласи жамоаси 2-ўринни, Намуна маҳалласи жамоаси 3-ўринни эгалладилар. Фаҳрли ўринни эгаллаган жамолар Ёшлар ишлари агентлиги томонидан диплом ҳамда ташаккурномалар билан тақдирланди.

Шу куни туманимизнинг Чордара маҳалласи ҳудудидаги Болалар ва ўсмирлар спорт мактабида стол тенниси бўйича сектор босқичи бўлиб ўтди. Унда иштирокчилар 16-21, 22-26, 27-30 ёш тоифасида куч синашдилар. Мусобақа ҳакамлар ҳайъати томонидан одилона баҳолаб борилди.

Мусобақада ғолиб бўлган 20 нафар иштирокчи туман босқичишга йўлланмани қўлга киритишди.

Кун бўйи давом этган барча мусобақалар ёшларда ўзгача тассурот ҳамда спортга бўлган иштиёқни уйғотди. Аслида мақсад ҳам шундай. “Беш муҳим ташаббус” доирасидаги мусобақалар янги қобилиятларни кашф етишда ҳамда ёшларнинг бўш вақтини мазмунли ўтказишда муҳим омил бўлиб хизмат қилмоқда.

Туман ҳокимлигининг Ахборот хизмати