“Besh muhim tashabbus” doirasidagi olimpiadalar yuqori saviyada oʻtkazildi

Maʼlumki, Oʻzbekiston Respublikasi Prezidenti tomonidan 2019-yilning mart oyida “Besh muhim tashabbus” ilgari surildi. Bu – yoshlarni madaniyat, sanʼat va sportga keng jalb etish, ularda zamonaviy axborot texnologiyalaridan toʻgʻri foydalanish koʻnikmasini shakllantirish, kitobxonlik madaniyatini yuksaltirish, xotin-qizlar bandligini taʼminlash vazifalarini oʻz ichiga oladi. Ushbu maqsad va vazifalardan kelib chiqqan holda qolaversa, Oʻzbekiston Respublikasi Prezidenti tomonidan qabul qilingan “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi qaror ijrosini taʼminlash maqsadida Respublikamiz boʻylab “Besh tashabbus olimpiadasi” oʻtkazilmoqda.

Jumladan Amudaryo tumanida mavjud 49 ta ovul va mahalla fuqarolar yigʻinlarida “Zukko kitobxon” tanlovining mahalla bosqichi oʻtkazilib unda 250 ta jamoa vakillari ishtirok etdilar.

25-aprel kuni Oʻrta qalʼa hamda Qilichboy ovul fuqarolar yigʻinida “Zukko kitobxon” tanlovining mahalla bosqichi yuqori saviyada oʻtkazildi. Unda “Alpomish”, “Buyuklar”, “Zukkolar”, “Donolar” jamoalari ishtirok etib, oʻz bilimlarini sinovdan oʻtkazdilar. Tanlov shartlari tajribali ekspert va hakamlar tomonidan odilona baholab borildi. Yakuniy natijalarga koʻra, “Alpomish” jamoasi sektor bosqichiga yoʻllanmani qoʻlga kiritdi.

Shu kuni Qilichboy ovul fuqarolar yigʻini hududida joylashgan 15-sonli umumiy oʻrta taʼlim maktabida ham tanlovning mahalla bosqichi oʻtkazildi. Unda ovul aholisi yoshlaridan iborat “Istiqlol”, “Jayhun” “Bilimdon”, “Amudaryo” jamoalari qatnashishdi. Oʻquvchi yoshlar jahon hamda oʻzbek adabiyoti namunalaridan tuzilgan savollar asosida oʻz bilimlarini sinovdan oʻtkazishdi. “Jayhun” jamoasi yoshlari oʻz tengdoshlarini ortda qoldirib birinchi oʻrinni hamda tanlovning sektor bosqichiga yoʻllanmani qoʻlga kiritishdi.

Shu oʻrinda aytish joizki, yoshlarga boʻlgan eʼtibor bugun har qachongidan ham kuchaygan sababi ertangi kun taqdiri Vatan koriga yaraydigan barkamol oʻgʻil-qizlar qoʻlidadir. Ularni turli yot gʻoyalarga ergashib ketmasligi va boʻsh vaqtlarini mazmunli oʻtkazishlari doimo diqqat markazida boʻlgan. Shu maʼnoda yoshlarning boʻsh vaqtini mazmunli oʻtkazish boʻyicha ilgari surilayotgan “Besh muhim tashabbus” doirasidagi tadbirlar oʻzining ijobiy samarasini bermoqda.

26-aprel kuni Mahalla va nuroniylarni qoʻllab-quvvatlash boʻlimida sportning shaxmat turi boʻyicha “Yoshlar ishlari agentligi kubogi”ning sektor bosqichi boʻlib oʻtdi.

Raqiblar uchrashuvi shiddatli va murosasiz kechdi. Yakuniy natijalarga koʻra 1 sektordan Jahongir Aminov, Ziyoda Saʼdullayeva, 2-sektordan Azimjon Pahimov, Durdona Rahimova, Rahmatjon Rahimov, 3-sektordan Ogʻabek Toʻrayev, Kamola Qadaboyeva, Rayxon Shamuradova va 4-sektordan Suhrob Maqsudov, Mashxura Rajapovlar gʻoliblikni qoʻlga kiritishdi. Sektor bosqichida 1-oʻrinni egallagan ishtirokchilar tuman bosqichi uchun shaxmat donalarini suradi.

Shu kuni Beruniy mahallasi hududidagi “Istiqlol” toʻyxonasida Yoshlar ishlari agentligi Qoraqalpogʻiston Respublikasi boshqarmasi “Bilim ring” intellektual klubi hamda Yoshlar ishlari agentligi tuman boʻlimi hamda bir qator hamkor tashkilotlar bilan birgalikda intellektual oʻyinning tuman birinchiligi oʻtkazildi.

Turnirda 7 yoshdan 70 yoshgacha boʻlgan havaskor bilimdonlar qatnashishdi. Tuman birinchiligida ishtirok etgan 42 ta jamoa bir-birlariga munosib raqib ekanligini amalda isbotladilar.

Turnir koʻtarinki ruhda va murosasiz tarzda kechdi. Yakuniy natijalarga koʻra, Oq oltin ovuli jamosi 1-oʻrinni, Navoiy mahallasi jamoasi 2-oʻrinni, Namuna mahallasi jamoasi 3-oʻrinni egalladilar. Fahrli oʻrinni egallagan jamolar Yoshlar ishlari agentligi tomonidan diplom hamda tashakkurnomalar bilan taqdirlandi.

Shu kuni tumanimizning Chordara mahallasi hududidagi Bolalar va oʻsmirlar sport maktabida stol tennisi boʻyicha sektor bosqichi boʻlib oʻtdi. Unda ishtirokchilar 16-21, 22-26, 27-30 yosh toifasida kuch sinashdilar. Musobaqa hakamlar hayʼati tomonidan odilona baholab borildi.

Musobaqada gʻolib boʻlgan 20 nafar ishtirokchi tuman bosqichishga yoʻllanmani qoʻlga kiritishdi.

Kun boʻyi davom etgan barcha musobaqalar yoshlarda oʻzgacha tassurot hamda sportga boʻlgan ishtiyoqni uygʻotdi. Aslida maqsad ham shunday. “Besh muhim tashabbus” doirasidagi musobaqalar yangi qobiliyatlarni kashf yetishda hamda yoshlarning boʻsh vaqtini mazmunli oʻtkazishda muhim omil boʻlib xizmat qilmoqda.

Tuman hokimligining Axborot xizmati