“ЖИНОЯТЧИЛИККА ҚАРШИ КУРАШИШ – ҲАР БИРИМИЗНИНГ БУРЧИМИЗ, ЗЎРАВОНЛИККА ҚАРШИ КУРАШИШ БАРЧАМИЗНИНГ ВАЗИФАМИЗДИР” МАВЗУСИДА ТАРҒИБОТ ТАДБИРИ ЎТКАЗИЛДИ

Амударё туман Тиббиёт бирлашмаси ҳамда Навоий маҳалла фуқаролар йиғинида “Жиноятчиликка қарши курашиш – ҳар биримизнинг бурчимиз, зўравонликка қарши кураш барчамизнинг вазифамиздир” мавзусида тарғибот тадбирлари бўлиб ўтди.

29 март куни туман ҳокимлиги, Ички ишлар бўлими, Аёлларни реабилитация қилиш ва мослаштириш Қорақалпоғистон Республикаси туманлараро маркази ҳамкорлигида ташкил этилган ушбу тарғибот тадбирлари тиббиёт ходимлари, шифокорлар, ҳамширалар ҳамда Навоий номли маҳалла фаоллари, тижорат банклари ходимлари  иштирокида ўтказилди.

Тадбирларда туман ҳокими ўринбосари, оила ва хотин-қизлар бўлими бошлиғи Гўзал Сабурова, туман Тиббиёт бирлашмаси бошлиғининг даволаш ишлари бўйича ўринбосари Шуҳрат Жуманиязов, Ички ишлар бўлимининг хотин-қизлар масалалари бўйича катта инспектори Гавҳар Ўтемурадовалар сўзга чиқиб, хотин-қизлар томонидан содир қилинаётган жиноятлар, уларнинг олдини олиш борасида амалга оширилаётган чора-тадбирлар хусусида кенг тўхталдилар.

Ўтган 2021 йилнинг 12 ойи давомида Қорақалпоғистон Республикаси бўйича хотин-қизлар томонидан содир этилган жиноятлар 258 тани ташкил этган бўлса, шундан 21 таси, яъни, 8,1 фоизи Амударё тумани ҳиссасига тўғри келганлиги таъкидланди. Хотин-қизлар томонидан содир этилган жиноятлар турлари бўйича таҳлил қилинганида фирибгарлик, безорилик, ўзгалар мулкини ўғирлаш, қасддан танага оғир тан жароҳати етказиш каби жиноятлар аввалги йилга нисбатан ошганлиги эътироф этилди.

Сўзга чиққанлар Амударё тумани бўйича жами содир этилган 21 та жиноятда 26 нафар хотин-қизлар иштирок этганлиги ўта аянчли эканлигига тўхталиб ўтишди. Хотин-қизлар ўртасида жиноятчиликнинг олдини олиш бўйича Тиббиёт бирлашмасининг ҳар бир бўлимида кенг тушунтириш ишлари олиб бориб, ҳаммани турли жиноятлар содир этилишининг олдини олишга, огоҳликка чақирдилар.

Шунингдек, маърузачилар ижтимоий жиҳатдан хавфли аҳволда бўлган оилаларни ўз вақтида аниқлаб, уларга ижтимоий, ҳуқуқий ва маънавий жиҳатдан ёрдам кўрсатиш, ҳуқуқбузарлик содир этишга мойил шахслар билан манзилли профилактика ишларини ташкил этиш, ҳар бир содир этилган ҳуқуқбузарликнинг сабаб ва шароитларини чуқур ўрганиш ва таҳлил қилиш маиший зўравонликнинг олдини олиш борасидаги муҳим қадам эканлигини эътироф этишди.

Тадбир давомида хотин-қизлар манфаатларини таъминлаш, жамият ҳаётидаги ўрнини мустаҳкамлаш давлатимиз ижтимоий сиёсатининг муҳим йўналишларидан бири эканлиги хусусида сўз юритилди.

Таъкидланганидек, хотин-қизларнинг жамиятда ўз ўрнини топишига тўсқинлик қилиб келаётган муаммо ва иллатлар мавжуд бўлиб, уларга қарши курашиш долзарб масалага айланмоқда. Шу боис бугунги кунда хотин-қизларни зўравонликдан ҳимоя қилиш борасида жамиятда хотин-қизларга нисбатан тазйиқ ва зўравонликка доир муросасизлик муҳитини яратиш борасида муҳим чора-тадбирлар амалга оширилмоқда.

Хусусан, мамлакатимизда хотин-қизларни зўравонликдан ҳимоя қилишга оид бир қатор халқаро ҳужжатлар ратификация қилинди. Миллий қонунчилигимизда инсон ҳуқуқ ва эркинликларини ҳимоя қилиш, унинг ҳаёти, соғлиғи, қадр-қиммати ва бошқа қонуний манфаатларини ҳимоя қилиш масалалари устуворлик касб этади. Хусусан, Ўзбекистон Республикаси Конституциясининг 26-моддасида: “Ҳеч кимнинг қийноққа солиниши, зўравонликка, шафқатсиз ёки инсон қадр-қимматини камситувчи бошқа тарздаги тазйиққа дучор этилиши мумкин эмас“, деб қайд этилган. “Хотин-қизларни тазйиқ ва зўравонликдан ҳимоя қилиш тўғрисида“ Қонунининг мақсади ҳам хотин-қизларни тазйиқ ва зўравонликнинг барча шаклларидан ҳимоя қилиш соҳасидаги муносабатларни тартибга солишдан иборат.

Тадбирларда инсон ҳуқуқ ва эркинликларини, қонуний манфаатларини таъминлашга устувор аҳамият қаратилаётгани натижасида оилага, аёл зотига бўлган муносабат ўзгариб, уларга ҳурмат-эҳтиром кўрсатиш ҳаётимизнинг маъно-мазмунига, асосий мақсадига айланаётгани эътироф этилди.

Дарҳақиқат, аёл гўзал бўлса – олам гўзал, аёл бахтли бўлса – оила, бутун жамият бахтли бўлади. Бугун Ўзбекистонда яшаётган ҳар бир аёл, чин маънода бахтли. Зеро, унинг ҳуқуқ ва эркинликлари қонунлар билан мустаҳкамланган.

Гавҳар ЧИМБАЙЧИЕВА, Аёлларни реабилитация қилиш ва мослаштириш Қорақалпоғистон Республикаси туманлараро маркази директори.