“JINOYaTChILIKKA QARShI KURAShISh – HAR BIRIMIZNING BURChIMIZ, ZOʻRAVONLIKKA QARShI KURAShISh BARChAMIZNING VAZIFAMIZDIR” MAVZUSIDA TARGʻIBOT TADBIRI OʻTKAZILDI

Amudaryo tuman Tibbiyot birlashmasi hamda Navoiy mahalla fuqarolar yigʻinida “Jinoyatchilikka qarshi kurashish – har birimizning burchimiz, zoʻravonlikka qarshi kurash barchamizning vazifamizdir” mavzusida targʻibot tadbirlari boʻlib oʻtdi.

29-mart kuni tuman hokimligi, Ichki ishlar boʻlimi, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi hamkorligida tashkil etilgan ushbu targʻibot tadbirlari tibbiyot xodimlari, shifokorlar, hamshiralar hamda Navoiy nomli mahalla faollari, tijorat banklari xodimlari  ishtirokida oʻtkazildi.

Tadbirlarda tuman hokimi oʻrinbosari, oila va xotin-qizlar boʻlimi boshligʻi Goʻzal Saburova, tuman Tibbiyot birlashmasi boshligʻining davolash ishlari boʻyicha oʻrinbosari Shuhrat Jumaniyazov, Ichki ishlar boʻlimining xotin-qizlar masalalari boʻyicha katta inspektori Gavhar Oʻtemuradovalar soʻzga chiqib, xotin-qizlar tomonidan sodir qilinayotgan jinoyatlar, ularning oldini olish borasida amalga oshirilayotgan chora-tadbirlar xususida keng toʻxtaldilar.

Oʻtgan 2021-yilning 12 oyi davomida Qoraqalpogʻiston Respublikasi boʻyicha xotin-qizlar tomonidan sodir etilgan jinoyatlar 258 tani tashkil etgan boʻlsa, shundan 21 tasi, yaʼni, 8,1 foizi Amudaryo tumani hissasiga toʻgʻri kelganligi taʼkidlandi. Xotin-qizlar tomonidan sodir etilgan jinoyatlar turlari boʻyicha tahlil qilinganida firibgarlik, bezorilik, oʻzgalar mulkini oʻgʻirlash, qasddan tanaga ogʻir tan jarohati yetkazish kabi jinoyatlar avvalgi yilga nisbatan oshganligi eʼtirof etildi.

Soʻzga chiqqanlar Amudaryo tumani boʻyicha jami sodir etilgan 21 ta jinoyatda 26 nafar xotin-qizlar ishtirok etganligi oʻta ayanchli ekanligiga toʻxtalib oʻtishdi. Xotin-qizlar oʻrtasida jinoyatchilikning oldini olish boʻyicha Tibbiyot birlashmasining har bir boʻlimida keng tushuntirish ishlari olib borib, hammani turli jinoyatlar sodir etilishining oldini olishga, ogohlikka chaqirdilar.

Shuningdek, maʼruzachilar ijtimoiy jihatdan xavfli ahvolda boʻlgan oilalarni oʻz vaqtida aniqlab, ularga ijtimoiy, huquqiy va maʼnaviy jihatdan yordam koʻrsatish, huquqbuzarlik sodir etishga moyil shaxslar bilan manzilli profilaktika ishlarini tashkil etish, har bir sodir etilgan huquqbuzarlikning sabab va sharoitlarini chuqur oʻrganish va tahlil qilish maishiy zoʻravonlikning oldini olish borasidagi muhim qadam ekanligini eʼtirof etishdi.

Tadbir davomida xotin-qizlar manfaatlarini taʼminlash, jamiyat hayotidagi oʻrnini mustahkamlash davlatimiz ijtimoiy siyosatining muhim yoʻnalishlaridan biri ekanligi xususida soʻz yuritildi.

Taʼkidlanganidek, xotin-qizlarning jamiyatda oʻz oʻrnini topishiga toʻsqinlik qilib kelayotgan muammo va illatlar mavjud boʻlib, ularga qarshi kurashish dolzarb masalaga aylanmoqda. Shu bois bugungi kunda xotin-qizlarni zoʻravonlikdan himoya qilish borasida jamiyatda xotin-qizlarga nisbatan tazyiq va zoʻravonlikka doir murosasizlik muhitini yaratish borasida muhim chora-tadbirlar amalga oshirilmoqda.

Xususan, mamlakatimizda xotin-qizlarni zoʻravonlikdan himoya qilishga oid bir qator xalqaro hujjatlar ratifikatsiya qilindi. Milliy qonunchiligimizda inson huquq va erkinliklarini himoya qilish, uning hayoti, sogʻligʻi, qadr-qimmati va boshqa qonuniy manfaatlarini himoya qilish masalalari ustuvorlik kasb etadi. Xususan, Oʻzbekiston Respublikasi Konstitutsiyasining 26-moddasida: “Hech kimning qiynoqqa solinishi, zoʻravonlikka, shafqatsiz yoki inson qadr-qimmatini kamsituvchi boshqa tarzdagi tazyiqqa duchor etilishi mumkin emas“, deb qayd etilgan. “Xotin-qizlarni tazyiq va zoʻravonlikdan himoya qilish toʻgʻrisida“ Qonunining maqsadi ham xotin-qizlarni tazyiq va zoʻravonlikning barcha shakllaridan himoya qilish sohasidagi munosabatlarni tartibga solishdan iborat.

Tadbirlarda inson huquq va erkinliklarini, qonuniy manfaatlarini taʼminlashga ustuvor ahamiyat qaratilayotgani natijasida oilaga, ayol zotiga boʻlgan munosabat oʻzgarib, ularga hurmat-ehtirom koʻrsatish hayotimizning maʼno-mazmuniga, asosiy maqsadiga aylanayotgani eʼtirof etildi.

Darhaqiqat, ayol goʻzal boʻlsa – olam goʻzal, ayol baxtli boʻlsa – oila, butun jamiyat baxtli boʻladi. Bugun Oʻzbekistonda yashayotgan har bir ayol, chin maʼnoda baxtli. Zero, uning huquq va erkinliklari qonunlar bilan mustahkamlangan.

Gavhar ChIMBAYChIYeVA, Ayollarni reabilitatsiya qilish va moslashtirish Qoraqalpogʻiston Respublikasi tumanlararo markazi direktori.