АМУДАРЁДА НАВРЎЗ САЙЛИ КЎТАРИНКИ РУҲДА ЎТКАЗИЛДИ
Наврўз – шарқона янги йилнинг бошланиши, табиат уйғониши билан боғлиқ бўлган энг ардоқли, асл миллий байрамдир. Бугунги кунда халқимизнинг эзгу ва гўзал қадриятларини, орзу-интилишларини ўзида мужассам этиб, аждодлардан безавол ўтиб келаётган Наврўзи олам шу диёрдаги миллати, тили ва динидан қатъий назар, барча юртдошларимиз орзиқиб кутадиган том маънодаги умумхалқ байрамига айланди.
Амударё туманида ҳам халқимизнинг ушбу севимли ва азалий байрами муносабати билан катта сайил ташкил этилди.
19 март куни тумандаги Болалар-ўсмирлар спорт мактаби ўйингоҳида «Ассалом Наврўз – янгиланиш, меҳр-оқибат ва қадр-қиммат айёми!» шиори остида ўтказилган байрам тадбирига барча ҳудудлардан турли ёшдаги юртдошларимиз ташриф буюрдилар. Ўйингоҳдаги Наврўзни мадҳ этувчи шиорлар, ранг-баранг, турфа гуллар, чархпалаклар, арғимчоқлар, дорлар ва шу каби қадимий, миллий безаклар байрамга ташриф буюрганларга ўзгача руҳ бағишлади. Чор тарафдаги атлас кўрпачалар солинган сўри, шоҳсупаларда ўтирган кекса отахону-онахонларнинг ёр-ёр, лапар ва ўланлар айтишаётгани, қизалоқларнинг қошларига ўсма қўйиб, сочларига жамалаклар тақиб, миллий ўйинларни ўйнаётгани, болажонларнинг самони тўлдириб учираётган варраклари байрамга янада файз киритди.
Қатор расталардаги халқ миллий ҳунармандчилик, миллий таомлар кўргазмалари кўрган кўзларни яшнатди. Кўргазмаларда ҳунармандлар тайёрлаган бешик, мис обдаста, қумғон, патнис, сават ва шу каби рўзғор буюмлари ўрин олган. Миллий таомлар кўргазмасида эса турли қадимий ва тансиқ таомлар рамзий кўркам дастурхонига кўрк бағишлаган. Сайилгоҳда меҳмонларга туманимиз фермерлари ва оқсоқоллари томонидан катта дошқозонлар ўрнатилиб, шу ернинг ўзида тайёрланган ош ва бошқа баҳорий тансиқ таомлар ҳам тарқатилди.
Байрам томошаси бошланишидан олдин туманимиз раҳбарлари масъул меҳмонлар билан биргаликда кўргазмаларни томоша қилдилар ҳамда ташкилотчиларни байрам билан қутладилар.
Шундан сўнг, ҳашамат билан безатилган катта саҳнада байрам томошалари бошланди. Туман ҳокими Султонбой Йўлдашев сўзга чиқиб, бутун халқимизни Наврўзи олам билан муборакбод этди.
Табриклардан сўнг, туман Маданият бўлими томонидан тайёрланган байрамона мусиқий дастур намойиш этилди. Дастур давомида табиатнинг уйғониши, баҳор манзаралари, заминнинг гулга бурканиши майдон безаклари билан ҳамоҳанг тарздаги ажойиб композициялар, саҳна кўринишлари, рақс ва қўшиқлар гулдастаси билан кўрсатиб берилди.
Байрам томошасида “Учқун” ашула ва рақс халқ ансамбли, “Офарин” фольклор-этнографик халқ жамоаси, “Жайҳун мўъжизаси” анъанавий халқ жамоаларининг композицион чиқишлари намойиш этилди. Тумандаги таниқли ҳаваскорлик жамоалари ва ижодий тўгарак аъзолари, эстрада хонандаларининг янги оҳанглар билан бойитилган қадимий халқ қўшиқлари орқали она юртимиз гўзаллиги, тинчлиги ва дўстлик туйғулари тараннум этилди. Халқ қўшиқларининг услубий ранг-баранглиги эстрадамизда янгича жаранг касб этиши айтишувлар, янгича талқиндаги қўшиқлар мисолида кўрсатилди.
Амударё туманига хос бўлган мумтоз наволар, аскиячилик, масхарабозлик халқ санъати ўйинлари, расм-русумлари намоён этилган композицион чиқишлар ҳам барчага манзур бўлди.
Наврўз нафаси, шукуҳи уфураётган Аму эли аҳли Наврўзи олам шодиёналарига бағишланган сайилда кўтаринки руҳ, шод-у хуррамлик билан иштирок этиб, байрамни катта хурсандчилик кайфиятида нишонладилар. Эзгу тилаклар билдириб, юртимиздаги тинчлик-осойишталик, фаровон ҳаёт учун шукроналар айтдилар.
О.ХУДОЙБЕРГАНОВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
